ʻEletā Lynn G. Robbins
Kau Palesitenisī ʻo e Kau Fitungofulú
Talu mei hono ui ia ko ha Taki Māʻolunga ʻi ʻEpeleli ʻo e 1997, kuo fiefia ʻa ʻEletā Lini G. Lōpini ʻi he “tāpuaki fakaʻofoʻofa ʻo e maheni mo e Kāingalotu ʻi he funga māmaní.”
ʻOkú ne pehē “ʻOkú ke ongoʻi ha fehokotaki ʻi he taimi pē ko iá mo e kakaí ʻi ha feituʻu pē ʻokú ke ʻalu ki aí.”
ʻOku ʻamanaki ʻa ʻEletā Lōpini ke hokohoko atu ke feʻiloaki mo e Kāingalotu ʻi he funga māmaní lolotonga ʻene hoko ko ha mēmipa ʻo e kau Palesitenisī ʻo e Kau Fitungofulú.
Naʻe fāʻeleʻi ʻa Lynn Grant Robbins he ʻaho 27 ʻo ʻOkatopa 1952, ʻi Peisoni, ʻIutā, kia Sōsiua Kalānite mo ʻEvelini R. Lōpini. Naʻá ne tupu hake ʻi Sipilingivila, ʻIutā, naʻá ne fetaulaki ai mo Sani Nilasoni, naʻá ne ʻiloʻi talu mei heʻene kei siʻí. Naʻá na mali he ʻaho 27 ʻo Sune, 1974, ʻi he Temipale Manitai ʻi ʻIutaá pea ko e mātuʻa ki ha fānau ʻe toko fitu; pea ʻi ai haʻana makapuna ʻe toko 15.
Ne maʻu e mataʻitohi B.A. ʻo ʻEletā Lōpini ʻi he lea faka-Sipeiní mo e saienisi fakapolitikalé mei he ʻUnivēsiti ʻo e Siteiti ʻIutaá pea mo ha MBA ʻi hono tokangaʻi e ngaahi meʻa fakavahaʻa-puleʻangá mei he ʻApiako Fakavahaʻapuleʻanga ʻo ʻAmeliká, ʻi Keleniteila, ʻAlesoná, USA. Naʻá ne kaungā fokotuʻu pea hoko ko e tokoni palesiteni lahi ʻo e Franklin Quest.
Naʻe hoko ʻa e ʻEletā Lōpini ko e palesiteni ʻo e Misiona ʻUlukuai Monitiviteó he taimi naʻá ne maʻu ʻa hono uiuiʻi ki he Kōlomu hono Ua ʻo e Kau Fitungofulú. Hili ha taʻu ʻe tolu mei ai naʻá ne hoko ko ha mēmipa ʻo e Kōlomu ʻUluaki ʻo e Kau Fitungofulú. Naʻá ne hoko ko ha palesiteni ʻo e ʻĒlia Saute ʻAmelika Sauté, ʻĒlia ʻAmelika Lotolotó, pea mo e ʻĒlia ʻAmelika Noate Hihifó. Naʻe ʻosi ngāue foki ʻi he ʻĒlia ʻAmelika Noate Lotolotó.
Ko e taha ʻo e ngaahi tāpuaki maʻongoʻonga ʻo e ngāue tokoni ko ʻení, ko ha faingamālie ke toe foki ki ʻĀsenitina, ne ngāue fakafaifekau taimi kakato aí. Lolotonga ʻene hoko ko ha faifekau kei talavou ʻi ʻĀsenitiná ne ngāue ʻi Susui, ko ha ʻēlia mo ha kolo pē ʻe taha ʻo e Siasí. ʻI heʻene foki ki he ʻēliá hili ha ngaahi taʻu, naʻá ne maʻu ha siteiki ʻo e Siasí mo ha ngaahi ʻiuniti ʻe hongofulu mā ua nai.
ʻOkú ne pehē, “ʻOkú ke mamata ʻi he meʻa ko iá ʻi he funga māmaní.” “Ko e kuonga ʻeni ʻo e ngaahi maná.”