Lahi Ange e Aʻu Atu e Konifelenisi Lahí Ki he Funga Māmaní ʻi he Tekinolosiá mo e Mītia Fakasōsialé
Makehe mei he toko 100,000 tupu ne kau ʻi he ngaahi fakatahaʻanga ʻe nima ʻo e Konifelenisi Lahi Fakataʻu hono 184 ʻi he Senitā Konifelenisí ʻi Sōleki Siti, ʻIutā, USA, ne mamata pe fanongo ha lauimiliona kehe ki he ngaahi fakatahaʻangá ʻi ha lea fakafonua ʻe 95 ʻo fakafou ʻi he televīsoné, letioó, satelaité, mo e ʻInitanetí.
Neongo ʻoku lava ke nofoʻi ʻe ha toko 21,000 ʻa e Senitā Konifelenisí ʻi Sōleki Sití, ʻoku aʻu ʻo laui miliona e kau mamata konifelenisi he funga māmaní ʻi hono mamataʻi ia ʻe he kāingalotu ʻo e Siasí mo e niʻihi kehé. Kuo laka hake ʻi he taʻu ʻe 50 tupú, ʻa hono liliu e ngaahi fakatahá ki ha ngaahi lea fakafonua lahi. ʻI he ʻaho ní, kuo malava ʻo fakafou ʻi he tekinolosiá ke mamataʻi ʻi ha fonua ʻe 200 tupu he māmaní.
Makehe mei he ngaahi fakamafola ʻi he falelotu fakalotofonuá, naʻe huluʻi fakahangatonu ʻe he Siasí e konifelenisí ʻi he LDS.org, BYUtv, BYUtv International, Mormon Channel, Roku, Facebook, mo e YouTube. Ne lahi hake ʻi he peseti ʻe 30 ʻa e kau mamata konifelenisi lahi ʻi he ʻInitanetí lolotonga e konifelenisi lahi ʻo ʻOkatopa 2013 ʻi hono fakatatau ki he ngaahi konifelenisi kimuʻá.
Ne tokolahi foki e niʻihi ne kau ʻi he konifelenisi lahí ʻo fakafou ʻi he mītia fakasōsialé. Ne lahi ha fakamatala he twitter ne nau ngāue ʻaki e hashtag #ldsconf ʻi he Twitter lolotonga e fakataha takitaha ʻe nima ʻo e konifelenisí, ʻo kau ai e konifelenisi lahí he ngaahi kaveinga ne lahi hono aleaʻi he Twitter he taimi ko iá. Hangē ko ʻení, ʻi ʻOkatopa ʻo e 2013, ne ʻi ai ha tweet ʻe 155,000 ʻo kau ki he konifelenisi lahí. (Ko e tweet takitaha ko ha fakamatala fakafoʻituitui ʻoku ʻi ai ha mataʻitohi ʻe 140 pe siʻi ange.)
ʻOku ʻoatu fakahangatonu ʻe he Siasí ha fakamatala ʻo fakafou ʻi heʻene mītia fakasōsialé ʻo e ngaahi pōpoaki mei he konifelenisí ʻi ha ngaahi lea fakafonua kehekehe, pea ʻokú ne poupouʻi e niʻihi kehé ke vahevahe e pōpoaki ko iá. Lolotonga e konifelenisi lahi ʻo ʻOkatopa 2013, ne toe tokolahi ha kau mamata pe kau fanongo ki he ngaahi pōpoaki ʻo e konifelenisi lahí hili ʻenau mamata ʻi ha fakamatala he mītia fakasōsialé. Kuo vahevahe ʻa e fakamatalá ʻi he lea faka-Pilitāniá, Sipeiní, mo e faka-Potukalí.