Tokoni e Senitā Akoʻanga Fakafaifekaú ke Fakavaveʻi e Ngāue ʻo e Fakamoʻuí

ʻI he funga ʻo e māmaní, ne fakahoko ʻe he ngaahi senitā akoʻanga fakafaifekau ʻe 15 ha ako ki ha kau faifekau ʻe toko 85,000 tupu mei ha ngaahi fonua ʻe 143. Fakakātoá, ʻoku ako ʻe he kau faifekaú ha lea fakafonua ʻe 55 mei ha kau faiako ʻe toko 1,600, pea nau ngāue ʻi ha taʻu ʻe ua ʻi ha misiona ʻe 405 ʻi ha fonua ʻe 150 tupu.

ʻI he tupu tokolahi e kau faifekaú talu mei hono liliu e taʻu motuʻa ki he ngāue fakafaifekaú ʻi ʻOkatopa 2012, ʻoku toe tokolahi ange e kau faifekau ʻi he MTC ʻi ha toe taimi kimuʻa. ʻI he ʻi ai ha MTC ʻi he hemisifia kotoa pē, ʻoku ʻikai tuʻu e akó he tō ʻa e laʻaá.

Ko e angamahení, ʻoku aʻu mai e kau faifekaú ki ha MTC mo ha fakavaʻe ʻo e ʻilo fakalotu kuo maʻu mei he fakahinohino ʻi ʻapí pea ʻi he Siasí. ʻOku ʻomi ʻe he ngaahi senitaá ha toe ako makehe ʻoku kau ai e faiako ʻi he founga ʻa Sīsū Kalaisí mo e founga ke fakaafeʻi ʻa e kakaí ke muimui kiate Iá. ʻOku fakaangaanga e kau faifekaú ʻi ha ngaahi tūkunga faiako, maʻu ha ako ki he lea fakafonuáʻo ka fie maʻu, fakafanongo ki he ngaahi lea ʻo e fakataha lotu fakauike mei he kau taki ʻo e Siasí mo e MTC pea kau atu ki ha ngaahi ngāue tokoni.

ʻOku tuʻu e MTC lahi tahá ʻi Polovo, ʻIutā, USA. ʻOkú ne ʻomi ha ako ki ha kau faifekau e laui afe ʻi ha ngaahi lea fakafonua ʻe 55. ʻOku tuʻu e MTC lahi taha hono uá ʻi Mekisikou Siti, Mekisikou. ʻI Sune ʻo e 2013, ne ʻave ia mei ha kiʻi fale siʻisiʻi ange ki ha ʻapiako ʻeka ʻe 90 ne tuʻu ai e ʻapiako ʻo e Siasí, ko e Penemalito ti lasi ʻAmeliká. ʻE lava nofo ʻi he ʻuluaki falé ha kau faifekau ʻe toko 125 nai ʻi ha taimi ʻe taha; ʻe lava ke nofo ʻi he feituʻu foʻoú ha toko 1,000 tupu.

ʻOku ʻi ai ha ngaahi MTC kehe ʻi Puenosi ʻAealisi, ʻAsenitina; Sao Paulo, Palāsila; Sanitiako, Silei; Pokotā, Kolomupia; Sanitō Tomingikou, Lepupelika Tominikení; Pelesitoni, ʻIngilani; ʻAkalā, Kana; Kuatemala Siti, Kuatemala; ʻOkalani, Nuʻu Sila; Lima, Pelū; Manila, Filipaini; Siohanesipeeki, Saute ʻAfilika; mo Metuliti, Sipeiní.