Kabonganaan te Babaire ni Kamaiu ni Kaekai Titiraki
Ngkana ngaira ke tabeman iai ara titiraki ibukin ana euangkerio Iesu Kristo, ti ataia bwa ti na karekei ma iaa taian kaeka?
Ti maiu n te tai ae kakukurei. Ana euangkerio Iesu Kristo are e kaokaki e nang “otinako man te roo” (tara D&C 1:30). N tokina, angiina natin Tamara are i Karawa ake tiaki kaain te aro a ongora taekan “te Moomon.” Tabeman a ongo bwai aika aki tataneiai iai ao n aki ota. Tabeman a ongo bwai ake a tataneiai iai ao ni karaunano. Aomata nako man kurubu aikai a kona ni kawariira n ukoukori kaekaan aia titiraki. Kaeka aika mwaiti a kuneaki n te babaire ni kamaiu, are e kinaaki bwa te “babaire ni kakukurei are e korakora” (Aramwa 42:8).
Titiraki aika aki toki ni kakaoti bon “I nako mai ia?” Bukin tera I mena ikai? Ao “N na nakea imwiin te maiu aei?” Titiraki aikai ni kabane a kona ni kaekaaki ma te koaua are e kuneaki n te babaire ni kamaiu. Te rongorongo aei e tibwai tabeua kaeka n koroboki aika tabu ao ana kaeka ara burabeti, Beretitenti Thomas S. Monson, ae anga ni kaineti ma titiraki aikai.
I nako mai ia?
Ngaira rikira bon akea tokina. Ti maeka ma te Atua imwain te maiu aei bwa Natina aika tamnei. “Te Abotoro are Bauro [e reirei] bwa ‘ngaira bon kanoan te Atua [Makuri 17:29],” e taku Beretitenti Monson. “Ngkai ti ataia bwa rabwata bon kanoaia karo aika mamate rabwataia, ti riai ni ukoukora nanon ana taeka Bauro. Te Uea e a tia n taekinna bwa ‘tamnein te rabwata bon tamnein te aomata’ [tara D&C 88:15]. Ngaia are bon te tamnei are kanoan te Atua. Te tia koroboki n Ebera e taekinna bwa ‘Taman tamneira’ [Ebera 12:9].”1
Bukin tera I mena ikai?
Maiura iaon te aba, e taku Beretitenti Monson: “Ti riai ni kukurei bwa te Tia Karikibwai e wanawana e karika te aonaaba ao e katikuira ikai, ma rabunan te ururing bwa ti mwaninga arora n riki mai imwaina bwa ti aonga n rinanon te tai ni kataaki, te tai ni kakoauaira bwa ti tau ibukin bwai ni kabane ake e a tia ni katauraoi ibukira te Atua bwa ti na karekei.
“E matata, teuana oin bukin rokora iaon te aba bwa ti na karekei rabwatara ae te iriko ao te rii. Ti anganaki naba te bwaintangira n inaomata n rinerine. Ni kawai aika nga ma nga ti tekeraoi bwa ti kona n rinerine bon ibukira. Ikai ti reiakinaki man mwakuri aika matoatoa ake ti rinanoi. Ti noora te kaokoro man ae tamaroa ao ae buakaka. Ti kaokoroi bwaai nakon ae mao ao ae karewe. Ti kunea bwa iai mwiin bwai ake a reitaki ma mwiin ara mwakuri.”2
N na nakea imwiin te maiu aei?
Te mate e roko nakoia membwa ni kabane n te utu te aomata. Ma “ngkana tao e mate te aomata, e na manga maiu ke e aki? (Iobi 14:14). “Ti ataia bwa te mate tiaki te toki,” e taku Beretitenti Monson. “Te koaua aei e a tia n reiakinaki irouia burabeti aika a maiu inanon roro nako. E kona naba ni kuneaki inanon ara booki aika tabu. N ana Boki Moomon ti wareki taeka aika onoti ao taeka ni karaunano:
‘Ngkai, ni kaineti ma aron te tamnei imarenan te mate ao te mangauti—Nooria, e a bon tia ni kaotaki nakoiu iroun te anera, bwa tamneia aomata ni kabane, man te tai are a kitana iai te rabwata ae maamate aio, eng, tamneia aomata ni kabane e ngae ngke a raoiraoi ke a buakaka, a bon uotaki n okira mweengaia nakon te Atua are e anganiia te maiu.
“Ao ngkanne e na koro bukina bwa … tamneiia naake a raoiroi a na butimwaaeaki nakon te aro ni kakukurei, are e bon aranaki bwa bwaretaiti, n te aro ni motirawa, te aro n rau, are a na motirawa iai man aia kaangaanga ni kabane ao man raraoma ni kabane, ma n nanokawaki” (Aramwa 40:11–12).3
Imwiin kautakira man te mate, ti nakon te abanuea ae te tiretio mimitongina kanga ai aron taai, abanuean te teretirio kanga ai aron namwakaina, ke mimitongin abanuean te teretio kanga ai aron itoi ke te rotongitong are itinaniku (tara D&C 76).
Bon iai te Atua? Bon iai Tatan?
Te Tama are i Karawa, Iesu Kristo, ao Tatan bon ni kabane mwakoron te Kauntira ae korakora i Karawa are e karaoaki imwain ae ti bungiaki. Ni mwakoron te babaire ni kamaiu, Tamara are i Karawa e titiraki ibukin temanna are e na nakon te aonaaba ni mate ibukin ara bure. E taku “Antai ae N na kanakoa? Ao temanna [Iesu Kristo] e kaeka n ai aron Natin te Aomata: Aio ngai, kanakoai. Ao temanna [Tatan] kaeka man taku: Aio Ngai kanakoai: Ao te Uea e taku: N na kanakoa te moan.
“Ao te kauoman [Tatan] e un, ao e aki tiku n ana moan tabo; ao, n te bong anne, a mwaiti ake a iria” (Abraham 3:27–28; tara naba D&C 29:36–37; Moses 4:1–4).
Iai iroura te mwaaka n totokoa ana kariri Tatan?
Te katenimwakoro mai irouia tamnei ake a rineia bwa a na ira Tatan imwin te Kauntira i Karawa a teweaki nako ma ngaia. Ngaia ao Tatan a tiku n rabwataia n tamnei n akea rabwataia n aomata. Te Burabeti Iotebwa Timiti e reirei: Aomata ni kabane ake a reke rabwataia iai mwakaia iaoia naake aki reke.”4 Imwiin anne Tatan e kona ni kaririira, ma iai mwakara n totokoia.
Bukin tera n tabetai e tara n aki kaekai au tataro te Tama are i Karawa?
“Te Tataro bon te mwakuri are ana kantaninga te Tama ao ana kantaninga te nati are a uotaki bwa a na boraraoi imarenaia. Te kantaninga n te tataro e aki bita ana kantaninga te Atua.” (N ana Rikitinare te Baibara, “Tataro”). Te Tataro bon te bwai are e buokiira ni baireia ngkana ti na kabongana inaomatara ni mwakuri ma ana kantaninga te Atua (tara Abraham 3:25). Tamara are i Karawa e kaekai n tainako ara tataro, ma kaeka akanne a kona n roko n aroia aika kakaokoro n eng, tiaki, ke tiaki ngkai moa. Te tai e rangi ni kakawaki.
Bukin tera N na kaitara ma kangaanga ngkana I kataia ni maiuakina te maiu ae raoiroi?
Kakaewenako bon mwakoron te babaire ni kamaiu. A kakorakoraira, kaitiakiira, ao kaitiaki nanora ngkai ti katan iaon Iesu Kristo ao Ana euangkerio. Te Tama are i Karawa e kateimatoaira inanon ara kakaewenako. Katakira e na “angan[iira] te taneiai, ao e na riki bwa katamaroaki[ra]” (D&C 122:7).
N na kanga n ata ae e eti ao ae bure?
Ni kabane natin te Atua a bungiaki ma Otan Iesu Kristo, are e buokiira n “ata ae raoiroi man ae buakaka” (Moronaai 7:16). N reitia, te Tamnei ae Raoiroi e kona ni kakoaua nakoira n te koaua inanon ara iango ao nanora ma namakinan te rau ao te tangira (tara D&C 8:2–3).
A Kona ni kabwaraaki au bure ngkana I karaoi bure aika kakaiaki?
E ataira te Atua ae nikabane ngaira ti na bure ngkai ti reireiniira n rinerine imarenan te eti ao te bure.5 Bure ni kabane, n aroia nako, iai katuua ae airi ma ngaiia. Te motikitaeka e bairea te tuua are ko na rootaki iai. N ana nanoanga, te Tama are i Karawa e kataua Iesu Kristo bwa e na karaoa te Mwakuri ni Kamaiu ao ni kaitarai kairoro n te motikitaeka ibukira ni kabane (tara Aramwa 42). N taekan teuana, Korakain Kristo i Keketemwane ao ni matena i Korokota e kabooi ni kabane bure ngkana ti karekea ana Mwakuri ni Kamaiu Kristo man te rairannano ao ni karekean otenanti n te euangkerio. Ara bure a na kabwaraaki (tara D&C 1:31–32).