Mwane ao Aine n ana Mwakuri te Uea
Man te taromauri are e karaoaki n te Brigham Young University n Aokati 20, 2013. Ibukin te koroboki ae bwanin n te taetae n Imatang, nakon speeches.byu.edu.
Inanon ana baire Tamara are i Karawa te nakoanibonga mai karawa ae korakora, mwaane ao aine iai kaokoron ma boraoin tibwangaia aika kakawaki.
I kakoaua bwa iai tabeua koaua are aine ao mwaane a kainnanoia n ota n taekan te tibwanga ae kakawaki ni kakorakoran ao katean abanuean te Atua iaon te aba. N anga aika mwaiti aine bon buroon te Ekaretia. Ai ngaia are n ana ibuobuoki te Uea, I tangiria n anga te kakaitau nakon aia kakaonimaki aine ao kairake n ataeinnaine n te Ekaretia. Nakoimi tititati aika tangiraki, n tabo nako are kam maeka iai n te aonaaba, taiaoka n ata aia tangira ae korakora ao aia onimaki iroumi te Moan Beretitentii ao Abotoro ake Tengaun ma Uoman.
N na waaki moa ni kauring ngkami taekan bwai aika ti karaoi ikai iaon te aba.
Ngaira natin Tamara are i Karawa mwaane ao aine n tamnei aika tangiraki. Ti maeka ma Ngaia n te abanuea n te maiu imwain te maiu n te aonaaba. N te aro are e na koro iai bukin te mition n te aki mamate ao te maiu are akea tokina nakon te aomata (tara Moses 1:39), Tamara are i Karawa e karaoa tebaire are e kantaningaaki ni buokiia Natina ni karikiia nakon are tokin aia konabwai. Ana baire Tamara e weteia aomata bwa a na bwaka bwa a na karaureaki ma Ngaia inanon te tai ae kimototo ao ni bungiaki inanon te rabwata ae mamate, karekea te rabwata, ao n rin inanon te tai ni kakaewenako ao ni kataaki. Ana baire bwa e na katauraoa te Tia Kamaiu ni kamaiuia aomata ni kabane man te Bwaka. Ana Mwakuri ni Kamaiu ara Uea Iesu Kristo e katauraoa te kawai rinanon ana otenanti te euangkerio ao berita aika tabu n oki rikaaki nakon te Atua. Ibukina bwa ti na maeka inanon te aonaaba ae mamateae e kaonaki ma kakamaku ao kariiri, Te Tama are i Karawa ao Natina a ataia bwa ti na kainnanoa te mwaaka ae korakora riki nakon are iroura. A ataia bwa ti na kainnanoa karekean Mwaakaia. Te euangkerio ao ana reirei Kristo e anganiira ni kabane ake a na butimwaia te mwaaka ni karekea te maiu ae akea tokina ao te mwaaka ni karekea te kimwareirei inanon te mwananga.
Tabeman aomata a titiraki n tibwangaia aine n ana baire te Atua ao inanon te Ekaretia. I a tia n intawiunaki irouia taan kareke rongorongo aika tau man te aba ao te aonaaba n tuangkami bwa mwaitiia taan kareke rongorongo are I a tia n aitara ma ngaia a tia ni karekei ake a kaman tia ni kateaki n akea te kakoaua ae tau n taekan te maroro aio. Inanon ririki aika bati a mwaiti aika a kanakoi aia titiraki ni katerea bwa aine a aki kakawaki n te Ekaretia. Te iango are [aine aki kakawaki n te Ekaretia] e aki koaua.
Kariaia bwa N na taekini nimaua koaua nakoimi bwa kam na iangoia raoi ni kaineti ma te maroro ae kakawaki aio.
1. Te Atua Iai ana Baire ni Buokiira ni Karekea te Maiu are Akea Tokina
Tamara are i Karawa e karikiia aine ao mwaane, ake bon Natina mwaane ao aine aika tamnei. Aio are nanona bwa te aine ao te mwaane bon akea tokina. Iai ana baire are e kateia ni kakoroa bukin buokaia ni kabane ake a na rineia n Iriria ao Natina, Iesu Kristo, ni karekei tibwangaia are a bwaibwai iai n te maiu are akea tokina.
Ngkana tokin karietatakira bon te Tama are i Karawa ao Iesu Kristo aia kouru ao aia kantaninga ao ngkana a atai bwaai ni kabane ao ni kororaoi, n aron ae ti ataia Ngaia, ngkanne A ata te kabanea n tamaroa ni kangara ni katauraoi, n anga reirei, ao ni kairiira bwa ti aonga ni karekea te tai ae te kabanea n tamaroa n tau ibukin te karietataki.
Angiira n tatabemaniira nako iai ara utu ke raoraora ake a tia n rootaki inanon kangaanga aika kakaokoro n aroia aika mwaiti ae irekereke ma te aroaro. Te kauntaeka iaon maroro aikai e ataaki bwa e aki karekea te boraoi ao, n te koaua, e kona ni karekea te itabaraaraa. Iai tabeua titiraki ibukin tein te Ekaretia iaon maroro aika a kona ni karekea te kauntaeka aika a matoa aron kaekakiia bwa e na waekoa n rauaki iai temanna. E ngae n anne, ngkana ti ukoukora te Uea inanon ara tataro bwa ti na namakina ke ae ti na karaoia n aro aikai, e na roko te kaeka: “Ko kakoaua Iesu Kristo ao ko Iriria ao te Tama? I kakoaua bwa angiina ni kabane n te Ekaretia n te tai teuana ma teuana ti na titiraki ngkana ti kona ni karaoi ni kabane ake ti tuangaki bwa ti na karaoi. Ma ngkana ti bon kakoaua raoi inanon te Uea, te manga kamatoa e na roko: “I kakoaua Iesu Kristo, ao I kataia ni karaoi bwaai ake E kainnanoai bwa N na karaoi.” Ngaia are ti waaki rake. Ai mwaakara taeka aika “I kakoaua Iesu Kristo”!
Ara kakoaua ao te rau n ara kantaninga ao arora e waaki ma te ingaingannano ni kakoaua bwa Tamara are i Karawa bon te kabane n atatai.
2. Te Ekaretia E Kairaki rinanon Kiingin te Nakoanibonga
Ana Ekaretia Iesu Kristo ni Bong Aika Kaitira bon ana Ekaretia te Uea, ao Ana Ekaretia e kairaki rinanon te nakoanibonga ae kariaiakaki ao kingin te nakoanibonga. “Kingin te Nakoanibonga bon ana kariaia are e a tia n anga te Atua nakon te tia kairiiri n te nakoanibonga bwa e na kairia, tautaekanna, ao ni kaira kabonganaan Ana nakoanibonga iaon te aba.1
Naake iai irouia kiingin te nakonibonga—bwa tao te riikan ake iai irouia kiing ibukin ana kooram ke te bitiobi are iai irouna kiing ibukin ana uoote ke te Beretitenti n te Ekaretia, ake iai irouna kiing ni kabane kiingin te nakoanibonga—ni koauana e na bon karekea nakoia ni kabane ake a beku ma te kakaonimaki iaan aia kairiiri ni kabonganai kariaiakaki n te nakoanibonga ao ni karekea mwaakan te nakoanibonga.
Mwaane ni kabane ao aine ni kabane iaan aia kariiri naake iai irouia te kiing. Aio aron te Uea ni kaira Ana Ekaretia.
N na kaoka te bwaiare I taekinna inanon Eberi 2013 n te maungatabu ni kabuta: “N ana baire Tamara are i Karawa n te nakoanibonga are ruo mai karawa, mwaane iai tibwangaia ae onoti ni bairea karaoan te nakoanibonga, ma tiaki ngaia nakoanibonga. Mwaane ao aine iai kakawakiia aika kakaokoro ma a uaia n titebo kakawakin tibwangaia. N aron are te aine e aki kona ni karekea te teei n akean te mwane, n aron naba te mwane e aki kona ni kabongana mwaakan te nakoanibonga ni katea te utu ae akea tokina n akean te aine. … N te kantaninga ae akea tokina, ni kauoua te mwaaka ni karikaia ataei ao te mwaka n te nakoanibonga a tibwauaki iroun te buumwaane ao te buuaine.”2
Bukin tera ngkai mwaane a katabuaki nakon nakoaia n te nakoanibonga ao tiaki aine? Beretitenti Gordon B. Hinckley (1910–2008) e kabwarabwara bwa bon te Uea, tiaki te aomata, “are e rineia bwa mwaane inanon Ana Ekaretia a riai n taua te nakoanibonga” ao bon te Uea naba are e anganiia aine te kona ni katea te botaki ae korakora ao ae kamimi aei, are bon ana Ekaretia ao abanuean te Atua.” …3 N tokina, te Uea e tuai ni kaotia bwa bukin tera E a tia ni katea Ana Ekaretia n are E karaoi.
Ti na aki mwaninga bwa e kaniia teuana mwakoron ana reirei ni kabane ake a karaoaki n te Ekaretia e karaoaki irouia tititati. Mwaitin te kairiiri e katauraoaki mai irouia titita. Mwaitin mwakuri n ibuobuoki ao waaki ni kakukurei a baireaki ao ni kairaki irouia aine. Te reirei ao aia mwakuri aine n te uoote ao titeiki kauntira ao inanon kauntira ni kabuta ni kautuun te Ekaretia a katauraoi iango aika kainnanoaki, wanawana, ao baeranti.
E anaia mwaane ake a karineia aine ao aia bwai n tituaraoi ake bwain te tamnei ao aine ake a karinei kiing n te nakoanibonga are irouia mwaane ni kaoi kakabwaia aika bwanin mai karawa ni mwakuri nako inanon te Ekaretia.
3. Mwaane ao Aine A Uaia ni Kakawaki
Mwaane ao aine a katiteboaki ni matan te Atua ao ni matan te Ekaretia, ma te katiteboaki e aki kananonaaki bwa a na titebo. Te tibwanga ao aia bwaintangira mai karawa mwaane ao aine a kaokoro n aroia ma tiaki ni kakawakiia ke n aron kabonganakiia. Ana reirei ara Ekaretia e katitebooia aine ngke a bon kaokoro ma mwaane. Te Atua e aki kananona bwa te riki n aine ke ni mwaane bwa e tamaroa riki ke ni kakawaki riki nakon are teuana. Beretitenti Hinckley e taekinna nakoia aine bwa “Tamara ae Akea Tokina … e aki nanonna bwa ko riai ni kee nakon te kabanea n tamaroa ni mimitong n Ana karikibwai.”4
Mwaane ao Aine iai aia bwaintangira aika kakaokoro, korakora aika kaokoro, ao kaokoron aia iango ao are a tangiria. Anne teuana bukina ae aanaki bwa bukin tera ti kainanoira ibon imarenara. E kainnanoa te mwaane ao te aine bwa a na karika te utu, ao e kainnanoa te mwane ao te aine bwa a na karaoi ana mwakuri te Uea. Te buumwane ao te buuaine a ikotaki ni mwakuri inanon te raoiroi ni katiteuanaaki. Ti na taratara raoi bwa ti aki kataia n uruana ana baire Tamara are i Karawa ao te kantaninga inanon maiura.
4. Ni Kabane A Kakabwaiaki ni Mwaakan te Nakoanibonga
Ngkana mwaane ao aine a nakon te tembora, a uaia n anganaki te mwaaka ae titebo, are mwaakan te nakoanibonga. Ngkai te kariaiakaki n te nakoanibonga e kairaki rinanon kiingin te nakoanibonga, ao kingin te nakoanibonga e reke tii irouia mwaane aika tau, ni karekea te mwaaka ao te kakabwaia n te nakoanibonga e tauraoi nakoia ni kabane natin te Atua.
Tamara are i Karawa e tituaraoi ni Mwakana. Ni kabane mwane ao aine a kona ni karekea te mwaaka aio ibukin te ibuobuoki inanon maiura. Ni kabane ake a tia ni karaoi berita aika a tabu ma te Uea ao ake a karinei berita aika tabu akanne a kona ni karekea oin aia kaotioti, ni kakabwaiaki man aia ibuobuoki anera, n reitaki ma te Atua, ni karekei bwaninin te euangkerio, ao n tokina, n riki bwa taan bwaibwai irarikin Iesu Kristo n ana bwai ni kabane Tamara.
5. Ti Riai n Ataia ao ni Kaoti Kakoaua n te Reirei
Ti kainnanoia aine n te Ekaretia bwa a na ata ana reirei Kristo ao ni kaota aia kakoaua ni Kaokan Bwai n aro nako ake ko kona. Bon akea riki te tai n taai aika mwaiti n rongorongon te aonaaba. Tatan ao naake a iriria a tia n taim aia bwai ni buaka inanon nga n ririki ao a rang mwaatai ni urubekei onimaki ao onimakinan te Atua ao inanon te Uea Iesu Kristo ibuakoia aia utu aomata.
Ngaira ni kabane—mwane, aine, kairake n ikawai, roronrikirake, ao ataeinimwane ao ataeinnaine—butimwaea te Uea ao Ana Ekaretia ni katanna, ni kamanoa, ao ni katabangakia ni kabuta nako te aonaaba. Ti kainnanoa ae bati riki man bwanaia aine ae teretere man korakora ao aia onimaki. Ti kainnaiko n reiakina te reirei ao n ota n te bwai are ti kakoaua bwa ko aonga ni kaota am kakoaua ibukin koauan bwai ni kabane—tao koaua akanne a kanakoaki n tain te katobibi n te kauraai n te kaebwa irouia Kairake n Ataeinnaine, n tain bootaki ni kaoti kakoaua, n te buraoki, ke iaon te Facebook. Bon tii nkoe ae ko kona ni kaotia nakon te aonaaba aroia aine mai iroun te Atua ake a tia ni karaoi berita aika a tabu aron tarakiia ao aia kakoaua.
Tititati, ami konabwai ni karaoa te bitaki bon te konabwai ae onoti—teuana are e aki kona ni katotongaki irouia mwaane. Akea ae e kona ni katana ara Tia Kamaiu n mwaitin riki te anainano ke te mwaaka iaomi, natin te Atua aika aine, ae kona—ngkoe ae iai te korakora inanom ao te onimaki ae matoatoa. Mwaakan bwanaan te aine ae rairaki bon akea tokina, ao te Ekaretia e kainnanoi bwanaami ngkai riki nakon are mai imwaina.
I katuka au kaotioti iroumi ao auka koaua bwa ti mena inanon te tai are ti riai n tei iai ni katiteuanaki. Ti riai ni bane n tei—mwane ao aine, kairake mwane ao kairake n aine, ataeinimwane ao ataeinnaine. Ti riai n tei ibukin ana baire Tamara are i Karawa. Ti riai ni katea bukina. E a tia ni kebutiaki nakon te iterana. Ti aki kona n tei n aki kakamwakuri irarikina ngkai mwembwa n ana Ekaretia Iesu Kristo ibukiia Aika Itiaki ni Bong Aika Kaitira ao ni kariaia anne bwa e na reitinako n riki n aki bati ni kaninikoriaira ni kaoti ara iango ao ara namakin.
E bia kakabwaiai ngkami te Atua ni karekea te ninikoria ni kamatebwai ao n atai koaua aika bebete n te euangkerio ao imwina n tibwauaia n reken taina.