A Kanga n Ataia?
Gale Ashcroft, Arizona, USA
E anga te rongorongo nakoia aine n te Botaki n Aine Beretitenti Dieter F. Uchtdorf, Kauoman ni Kauntira n te Moan Beretitentii, n tain bowiin te Botaki n Aine ni Kabuta are e riinga nanou ao e anganai te rau. E taekina te uee ae uarereke ae te tai mwanuokai ao baana ake nimaua n tei ibukin bwaai ake ti riai n uringii n tainako.1
Imwiin te bowi natiu te aine Alyssa e karakina nakoiu raraona are Jessie, are iai ana bitineti n te kamwarake ae uarereke. Jessie e tuangaki iroun ana tia kairiiri n ana titeiki n te Botaki n Aine bwa e na karaoi tetieeti ni bwatinii imwiin te bowi ni maungatabu n te Botaki n Aine. Jessie e tuanga Alyssa bwa e waekoa n ataia bwa e riai ni karaoi—250 mwangko ni keke. Alyssa e anganano ni buoka baon mwangko ni keke nakon te tienta n te titeiki.
E a roko bongin te maroro, ao ngke e nako n ibuobuoki Alyssa, e kunea bwa Jessie e kuri n tang. A tauraoi mwangko nikeke, ma Jessie e a tia ni kanakoi tamneia nakon ana koraki are taku bwa aki rangi n tamaroa ibukin te bowi.
E a moanna n nanououa Jessie ibon irouna. E iangoia bwa taan kairiiri n te titeiki n te Botaki n Aine a na kantaninga te bwai ae rangi n tararaoi riki nakon ana mwangko ni keke aika bebete. E a nako n nano ni kataia ni kakaea te kawai ni manga katamaroai mwangko ni keke, ma e a bon aki tau te tai. Ngaia ao Alyssa a uoti mangko keke n aroia arei, ma ana namakin Jessie bwa e a tia n uotiia rikaaki aine—ni karokoa e taetae Beretitenti Uchtdorf.
Ngke e taekina te uee ae uarereke ae te tai mwanuokai, tamnein te uee ae buruu e kaoti iaon te tikuriin. Bon te uee ae bebete ma e rang n tikiraoi ma baana. Ana rongorongo Beretitenti Uchtdorf e riinga nanoia aomata ni kabane ngke e bubutiira bwa ti na aki rang n tarai uee aika bubura ake a otabwaniniira n te aro are ti na mwaninga te nimaua ni koaua ae bebete man kakaawaki are e reireiniira.
Imwiin te tataro ni kainiin, taian titita a rianna nakon te auti ni botaki. Ngke a rianna n rinnako Alyssa ao Jessie, a nooria aomata ni katobibia te taibora n amarake n teetiete ao n titiraki, “A kanga n ataia?”
Ni katoai mwangko ni keke a katamaroaki n te aiting ae mainaina ae ti teuana, tamaroa, weneraoi, ba nimaba te uee ae te tai-mwanuokai.