N tataninga Otintaai

Julia Wagner, Ohio, USA

Te nuu e a karika rotongitongin te ruu ngke I tabe n wene n taratara ao ni kakauongo nakon ikeiken kainnabau te mwaane, ni kataia n iangoia ngkana e boni matu. Ai bon tibwa uabong te bong man te tai are e mate iai natira te aine ae 12-ana-ririki ni maiu are mate man te kabuanibwai ae karina ae kananokawaki. I a manga moan kamatui riki matau, ao I aki namakinna ae I a matunako. I rangin tangiria bwa e na mena natiu te aine irarikiu. Te atatai ni kabane ibukin te babaire ni kamaiu e aki kabebetea aron rawawatau ngkai akea ngaia irarikiu.

Ngke e a kaan te ingabong, I a namakina, te bwai ae korakora inanou. Taai e na bae ni waekoa n oti ao n au iango I noora karawa n onrake n te ota ma karana ae bingke. Natira te aine e tangira te kara ae bingke. Otintaai ae bingke bon tii te bwai ae I rangin kainnanoia bwa I aonga n namakina ae I a kaan riki ma ngaia.

“Ti a nako ni mataku n otintaai,” I wirikiriki nakon kainnabau te mwaane ae nimatutu.

Ti tei inanon kawain te kaa n rin, ni kaitara mainiku … man tataninga. E ngae ngke e ota karawa, taai e aki ninianako naang aika riri-nano.

I karara atu nako aon angan kaainabau ao n ikenrawa, ni kataia angkoa akea te bwai ae riki. Ma I tangira riki ae mwaiti. I kainnanoa riki ae mwaiti. Ni koauana te Tama are i Karawa e kona n anganai te nano aei imwin kairan natira te aine ae tangiraki Nakoina.

Ngke e rairaki kainnabau bwa e na rinnako, n taratara mai akuura ni kaineta maeao, e taku, “Taraia!”

I rairaki. Mai akuura ao e bon onrake te nang n te kara ae bingke, te ota ae tokatoka baboboona ni katobibia. I ikentauti ao ni moanna n tang. E a bon riaon tamaroana nakon are I kona n iangoia. Kanga titebo ma ai aron te irabwati mairoun natira te aine. I ataia bwa te Tama are i Karawa e ataa rawawatan nanou ao e kanakoa ana berita ibukin te kantaninga nakontaai aika a na roko—te kauring ae maem ibukia utu aika akea tokia ao taai ni kabane aika a koro tamaroaia aika iaon kawaia ni kaoti.

N angin te tai ao I tabe n iaiangoa te tai ae tamaroa anne ao te taratara ae boou are e anganai. Antai ae tara otintai mai maeao? Ao irarikina bon anne te tabo are e tataningaai au kakai. Mwaitira kakabwaia ao kakai ake I kabuai ibukina bwa a kaoti man taabo aika aki kantaningaki? Mwaitira taai ake I kabanea nanou iaona ni baike I taku bwa a riai ao n aki karekei mimitongia are a reke mai iai?

Ti a tia n tataro n akea te motirawa ibukin te kakai are e aki kaekaki, ma ngke I taratara nako ma au taratara ae boou, I noora te kakai ni maiua aomata aika aman aika rikirake n tamaroa man kabonganaan bwain rabwatan nako natira te aine ake a kanakoaki (nakoia aoraki ake a kainnanoi), te kakai man ana tangira te utu ao ana katiteuanaki te uoote, ao kakai n te mwakuri n ibuobuoki. I a tia n namakina te rawawata ae korakora, ma I namakina naba mwaakan te kantaninga are e kaona nanou man otintaai ae bingke, bungintaai ae bingke, ao te uee ae bingke n tatabeua are e kaoti inanon kawaiu.

Ngkai e a oti taai, I tara mainiku ao ngkanne I a manga rairaki n tara maeao. I moangare ma te atatai bwa iai kakai n tainako ao kakabwaia aika a na kuneaki—ao bwa taai ngaia are e na kabebetea rawawatara n tainako ngkana ti butimwaia.