tauraoi ni Beku, BEKU MA TE TAURAOI
Te Atua e anganingkami te Nakoanibonga ae te Aaron ibukina bwa iai ami mwakuri aika kam na karaoi—ngkai ao n taai aika a na roko.
Kamataata n te Tamnei iroun Taia Morley
Jonathan bon raraou are e kaaina te Ekaretia aua te ririki n nako. Bon tii ngaia te membwa n te Ekaretia n ana utu. Imwiin karekean te Nakoanibonga irouna ae te Aaron, e waaki ni buokiia tabeman n aron are e tuai ni kakaraoia mai imwaina. Jonathan e ataia bwa n te aro bwa e na kona n ibuobuoki, e riai n atai bwaai aika mwaiti. E tangiria naba bwa e na tau ao e na kona riki n tei iaon waena, ngaia are e kamatebwaia te euangkerio, tataro, ao e irii botaki n Tabati ao tieminarii. E mwakuri korakora ni kawakin tua ao ni maeka nakon ana kainibaire te Ekaretia. E mwakuri korakora ni kakoroi bukin tibwangana n te nakoanibonga, n ikotaki naba ma rikina bwa te tia reirei n te mweenga ae korakora. Ana boki Beku Ibukin te Atua e buokia ni kaota n tibwanga akanne ao n reiakinna bwa e na kanga ni kakoroi bukiia.
Ana mwakuri ni kakaonimaki Jonathan n te nakoanibonga e anganna te korakora n te maiu n tamnei. E ibuobuoki ni katanna man ana kariiri teuare e buakaka. E waekoa rikirakena ngkai e beku ao ni katauraoi ibukin arona n taai aika a na roko. N te ririki ae nako, n arona n tau ao e karekea te Nakoanibonga ae te Merekitereka ao te entaumente n te tembora. Ngkai e a karaoa ana mwakuri ni mitinare i Brazil.
Te Nakoanibonga ae te Aaron e bon aki toki n aranaki bwa “te nakoanibonga ni katauraoi.” Te Atua e angani ngkami te Nakoanibonga ae te Aaron ibukina bwa iai te mwakuri Ibukimi—ngkai ao n taai aika a na roko. Ami mwakuri ni kakaonimaki n te Nakoanibonga ae te Aaron e katauraoiko imwain tibwanga aika korakora riki ni karaoi n ririki aika a na roko. N aron Jonathan, ko katauraoi ni “karekea te Nakoanibonga ae te Merekitereka, ni karekei kakabwaia man te tembora, n riki bwa te mitinare ae bwanin taina, n riki bwa te buumwane ao te karo ae tangira, ao n reitinako n te maiu ae abwabwaki ni beku ibukin te Uea” (True to the Faith: A Gospel Reference [2004], 4).
Ko na bae n aki atai kabwarabwarakiia ni kabane tibwanga aika kamimi are e katauraoi ibukimi te Tama are i Karawa, ma I kakoaua raoi bwa ko na tauraoi ni kaitibo ma ngaia ngkana ko uringnga n tou mwiin aikai ngkai ko taua te Nakoanibonga ae te Aaron.
Iriira Iesu Kristo
Ngkai ko taua te nakoanibonga, ko tia tei ibukin Iesu Kristo. Anne nanona bwa ko tuangaki bwa kona iriiria ao ni karaoi bwaai ake E na kona ni karaoi. Tera ae e kona ni karaoia? N aro nako, E kabanea Maiuna ni beku ao ni kakabwaiaia tabeman. Ngaia are ko riai naba ni karaoia. Anga rabwatam bwa e na beku ibukiia tabeman—ao imwiina kona rikirake ao n tamaroa bwa e aonga n raka riki mairoum are kona anga! Uringa aron Iesu n rikirakena n rorona ni kairake: E “rikirake Iesu n rabakau ma n ikawai, ma n akoaki iroun te Atua ma aomata” (Ruka 2:52).
Mwakoron irirakin te Tia Kamaiu bon te rikirake n rabakau ao ni marurung rabwatam n am tai ni kairake. Aio e na kantaningaiko bwa kona mwakuri korakora n tainako ni karaoa am kabanea n tamaroa (tara D&C 4:2). Ko na tatangiraki iroun te Atua ngkai ko kaan riki nakoina inanon te tataro ni katoabong, kamatebwai n te euangkerio, ongotaeka, ao mwakuri n ibuobuoki. Kona tatangiraki irouia tabeman ngkana ko akoi ao ko onimakinaki irouia am utu ao n riki bwa te rao n aiaron Iesu nakoia ni kabane.
Urinnga bwa Iesu e karaoa n tainako ana kantaninga te Tama. Ko iriira Kristo ngkana ko ukoukora ana kantaninga te Atua inanon auan te bong bwa e na kaira am mwakuri ao ni karaoi ana wirikiriki te tamnei ake ko karekei.
Bairei Otenanti n te Nakoanibonga
Otenanti n te Nakoanibonga a kakawaki ibukiia ni kabane natin te Atua ao e kakabwaiaia ni uakoraki bwa Natina mwane ao aine ni kaboraoia. Man te tai are ko riki bwa te riikan, ko buokia ni kaira karaoan te ibuobuoki n te otenanti n te nakoanibonga man kabutan te toa. Ko reitinako ni kaira karaoan otenanti n te nakoanibonga n te Nakoanibonga ae te Aaron imwiina ngkai ko katauraoi ao ni kakabwaia te toa, bwabetito, ao n kairii otenanti irouia tabeman ake iai irouia te Nakoanibonga ae te Aaron.
N irii karaoan otenanti aika tabu, ko riai n itiaki. Itiakin rabwatam e kona ni karaka riki te mwaaka n te maiu n tamnei nakon otenanti ake ko karaoi. Kataia bwa ko na tau n aro nako are kona riki iai bwa ana bwai ni mwakuri n ana toa te Uea (tara D&C 38:42). Ngkana e reke anne nakoim, ko kona n tei I moa n am uoote ke mwaanga bwa te tia tei ni koaua ibukin Iesu Kristo. A na bon bane ni kakabwaiaki man am nanomatoa ni kawakin berita aika tabu are ko buokiia ni manga kabooui.
Ibuobuoki n Tainako
Ngkai ko taua te Nakoanibonga ae te Aaron, ko ibuobuoki. N tainako, ukoukori tibwanga ni buokiia am utu, raraom, membwa n te kooram, ao tabeman. Bwaai ni kabane ake ko karaoi n te nakoanibonga e buokiko ni buokiia tabeman n te maiu n rabwata ao n tamnei. Te katooto, ngkana ko buoka am bitiobi ke am beretitenti n te mwaanga man am beku nakon te utu are ko reireiniia ni mwengaia, ko a reiakina aron kinaakin ao tararuakiin kainnanoia tabeman. Ko na ibuobuoki naba nakoia tabeman ngkai ko kawariia tabeman ni kakorakoraia membwa n am kooram ao ko kamaiuia naake aki kakaonimaki, rikoi anganano n te aki mamatam ni buokiia rarikin ao kainnano, ni karaoi mwakuri ibukiia aoraki ao mwauku, reirei ao ni kakoaua iroun Kristo ao Ana euangkerio, ao ni kabebetei uotaia naake a bwarannano.
Ko ibuobuoki ngkai ko anga reirei n am boowi ni kooram ao n am bootakin te utu n te tairiki. Ko ibuobuoki ngkana ko kaoia ni kabane nakon Kristo (tara D&C 50:29)—n te mweenga, n am kooram, n te reirei, ma mitinare ake a bwanin aia tai, ao n tabo nako are ko mena iai.
Arom n Tai aika A na Roko
Maororo ma am karo ke taan kairiiri bwa tera ae e na kantaningaaki mai iroum n tibwangam n tai aika a na roko n nakoam ngkai ko taua te Nakoanibonga ae te Merekitereka, mitinare, buumwane, ao te karo. Koreia n te marena are e katauraoaki tabeua man tiwanga akana a korakora akanne ao kona kanga n tauraoi ibukiia n te bong aei ngkana ko beku n te Nakoanibonga ae te Aaron. E na tara n rangi ni mwaiti ngkai, ma uringnga bwa te kawai ae tamaroa ni katauraoi e bebete ni karaoi bwai ake e tuangko bwa kona karaoi te Tama are i Karawa n te bong aei. Ko bia kunea te kukurei ngkai ko beku ngkai ao ni katauraoi ibukin mimitongim n tai aika a na roko.