Ana Berita Porter
From “We Have Great Reason to Rejoice,” Liahona, Nobembwa 2013 115–16.
Ngke e a mate taman kaain abau, ara utu a bane ni bootaki ni kamauriia aomata ake a roko ni kaota nanokawakiia ma ngaira. Inanon te tairiki anne, ngke I a kakawari ma te utu ao raao, I aki toki n noora tibura te ataeinimwaane ae 10-ana ririki, Porter, n tei irarikin tinan kaain abau—tibuna te unaine. N tabetai e tei ibukina, n taratara riaona. N te taina ao I noora angana n nim ma angana. I nooria n riinga baina ni karaurau, n aganna te irabwati ae uarereke, ao n tei irarikina.
Inanon tabeua boong imwiin te mwakuri anne, I aki kona ni kanakoa te tamnei anne man au iango. I kaumakaki ni kanakoa te imeeri nakon Porter. I tuangnga bwa tera are I a tia n nooria ao n namakinna. I kauringnga naba man berita aika tabu are e a tia ni karaoia ngke e bwabetitoaki, ao n taekina ana taeka Aramwa inanon ana booki Motiaea mwakoro 18:
“Ngkai ko ingainga ni kan okira ana nanai te Atua, ao n aranaki bwa ana aomata, ao n ingainga ni uota rawawatan temanna, bwa a aonga ni kabebeteaki;
“Eng, ao n tauraoi n tang ma ake a tang; eng, ao ni karau nanoia ake a kainnanoa karauan nanoia, ao n riki bwa taan kakoaua ibukin te Atua n taainako ao ni bwaai nako, n taabo nako ake kam nako iai, ni karokoa matemi, … bwa e aonga n reke iroumi te maiu are akea tokina—
“Ao ngkai I kangai nakoimi, ngkana aio are tangiria nanomi, ao tera bukina ba kam na aki kan bwabetitoaki inanon aran te Uea, n riki bwa te tia kakoaua ibukina ao ni karaoa te berita ae tabu mangaia, bwa kam na toro irouna ao ni kawakin ana tua, bwa e aonga ni kabatia Tamneina ni karuoa nako aomi?” (kiibu 8–10).
I kamatata nakon Porter bwa Aramwa e anga reirei bwa te koraki ake a tangiria ni kan bwabetitoaki a kainnanoia n tauraoi ni mwakuri ibukin te Uea man buokakiia tabeman—ibukin maium ni kabane! I taku: “I aki ataia ngkana ko kinaa, ma te kawai ae ko kaota te tangira ao raraomam ibukin tibum te uanaine bon kawakinan am berita aika tabu. Ti kawakina ara berita aika tabu ni katoabong ngkana ti akoi, kaota te tangira, ao ni kawakiniira ibon iroura. I tii tangiria bwa ko na ataia ae I kakatonga iroum ngkai ngkoe te tia kawakina te berita ae tabu! Ngkai ko kawakina te berita ae tabu are ko karaoia ngke ko bwabetitoaki, ko na tauraoi ni katabuakaki nakon te nakoanibonga. Te berita ae tabu aio e na anganiko riki am tai ni kakabwaia ao ni buokia tabeman ao ni buokiko ni katauraoiko ibukin berita aika tabu ake ko na karaoi n te tembora. Ko rabwa n rikim bwa te banna ae tamaroa nakoiu! Ko rabwa ibukin kaotakim nakoiu bwa tera aron taraan te tia kawakina te berita ae tabu!”
E kaeka rikaaki Porter: “Kuranimwa, ko rabwa ibukin te rongorongo. Ngkana I aki toki n taainako n rabwata Kuranimwa, I aki ataia ae I bon kawakina au berita aika tabu, ma I namakina te abue inanou ao n namakina ae raoiroi. I ataia bwa bon te Tamnei ae Raoiroi e mena inanou.”
I namakinna naba inanou te aabue ngkae I ataia bwa Porter e ataia bwa ngkana e kawakina ana berita aika tabu, e na kona “n taainako ni karekea Tamnein[te Tama are i Karawa ] ni bootaki ma [ngaia]” [D&C 20:77]. Aio bon te berita are e katauraoaki man karekean ana bwaintituaraoi te Tamnei ae Raoiroi.