Titiraki & Kaekaaia
“Tera ae I riai ni karaoia ngkana e uotaki rake te taobiki aio n te reirei are e kaitaraa ana reirei te euangkerio, n ai aron kabwakaan te ataei man te biroto?”
A mwaiti kawai ni kaeka—ke n aki—ni kaineti ma te bwai ae riki. Te Moan, iangoia bwa a na tera ae e na riki ngkana ko karaoa ke n aki taekina te bwai teuana. Ngkana aki karongoam na taku tabeman bwa ko kariaia naba te iango aio ma te bwai ae ko ataia bwa e kairua, ko na bae ni kakaea te kawai ae bebete bwa e na ataaki ae ko aki kariaia. Ngkana ko taku bwa am iango e na tii karika te itabaraaraa, ngkanne ko kona ni kakaea te tai teuana ni kaota iai am iango. Ma e boni ngae n anne, ngkana am kiraati bwa ai kakarinerine i bon imarenaia ao te tia reirei bwa e bubuti ibukin irakin te waaki, ko kona n tataro ibukin te kairi mai ieta ao ngkanne ko a kamatata am koaua.
Ko kona ni katauraoi imwain te tai ngkana ko ataia bwq am kiraati a na maroroakina te taobiki ae koaua. N raonaki ma booki aika tabu ao taian maroro n te maungatabu iaon te taobiki, karaua tara raoi Te Koaua nakon te Onimaki, Reirein te Euangkerio, ke Ibukin Kakorakoraia Kairake. Ko kona naba ni kataneiaiko ni kabwarabwara te taobiki n te botaki n utu n te tairiki. Ngkana ko a tauraoi, maroro ma am tia reirei ke kaain am kiraati.
E kangara arom ni kaeka e bon kakawaki n aron te bwai are ko taekinna. Bwaina te karinerine ao kataia n aki kabongana taetaen te Ekaretia. Kaain am kiraati a na aki ota ngkana ko taekinna, “Te Aetuwaitia ibukia Kairake n Ataeinaine n au uoote a reireinai bwa …”
Te bwai ae rang ni kakawaki ibukim bwa ko na ataia bwa tera are e reireia te Ekaretia ao tera are e tuangko te Tamnei ae Raoiroi n te aro bwa ko aonga n aki mwamwanaki man kairua ake ko na ongo ke ni wareki n te kiraati.
Kaeta te Reirei ae Kairua
Ngaira kaain te Ekaretia are e kaunga te mwakuri ni mitinare are ti bane ni weteaki iai bwa ti na taetaekina te euangkerio, ma ngaia are, ti aki kona ni kariaia ni kabuta te reirei ae kairua. Inanon taai ae aron aikai, ti riai n taetae n te aro bwa ti na kaeta te reirei ae kairua ao ni buokia aomata bwa aonga n ota n oin te kantaninga n te euangkerio are e a tia ni kaokaki n te bwai are e taekinaki.
David M., ana ririki 16, Kasaï-Occidental Province, Democratic Republic of Congo
Bwaina te Aro ae riai
I namakinna bwa I riai ni tibwaua au iango n te kawai ae riai ao ni kaotia bwa bukin tera I kakoaua. I taku bwa I aki riai ni karaoia tabeman bwa a na tibwaua au iango, ma I taku bwa a riai n ataia bwa te tabo raa ae I tei iai iaon taobiki aika koaua ao a na ota n au iango.
Sabrina S., ana ririki 16, Oregon, USA
Bwaina te Karinerine
E bon kakawaki bwa a na ongo bwanara, ma e boni kakawaki naba bwainakin te karinerine ibukin aia koaua tabeman. Tai kakauntaeka. Te kakauntaeka e karikiia am kairiribai ao te mangaongao. Ngkana e uotakirake te iango are e kaitara ara aro, kainabwabu, kakauongo raoi, ao bwaina te karinerine, tai mwaninga ni kakauongo nakon te Tamnei. Iai bwai ake ti aki ota iai ma te Atua e ota iai. Ti riai ni kakauongo ao n reiakinaki mairoun Tamneina.
Hannah M., ana ririki 18, Utah, USA
Tibwaua te Bwai are E Reireia te Ekaretia
I kataia ni kaekai titiraki nakon au kabanea ni kona ibukina bwa raoraou ao au tia reirei a aki ataia, ni karokoa are I tuangia, bwa tera ana koaua te Ekaretia iaon taobiki ae aron aikai. Man karaoan aei, a kona n atai bwai n ibuobuoki ibukin taai aika a na roko, ao ko na rang ni kakabwaiaki n te maiu n tamnei. Uringnga: “Kam na kaoti ami ota i mataia aomata n ai aron aikai, ba a na nori ami mwakuri aika raraoi, ao a na neboa Tamami are i karawa iai” (Mataio 5:16).
Joshua M., ana ririki16, Manchester, Engiran
Buokia Tabeman n Iangoia bwa Tera ae Eti
Tibwaua am namakin ma te kokoaua. Angin taian taobiki n te reirei, n aron kabwakaan te teei, e korakora te kakauntaeka iaona, ngaia are tai mamaa n taetae. Bon te tai ae tamaroa n tibwaua te euangkerio ao taian kainibaire ake ti kakoauai. Ngkana ko tibwaua am koaua, ko kona ni buokia aomata n iangoia bwa tera ae eti.
Madison R., ana ririki 14, Carolina Meang
Uringnga Bwa Antai ae Ko Tei Ibukina
Ngkana ko rinanon kangaangaa aikai, kataia bwa tabeman a na bae n aki tibwauai aia namakin ae ti te arona nakon te bwai are ko rinanona. Tai kakanneti ke ni kairoro, ma tai maaku ni katana am onimaki. Uringnga bwa ko tei ibukin Kristo.
Madeline K., ana ririki 16, Wyoming, USA
Ataa ana Koaua te Ekaretia
I mena n te kooti ike e kakauntaekaaki iai taobiki ake a maroroakinaki n angin te tai. Te moan bwai ae e na karaoaki bon karinean aia koaua tabeman, n aron ae ko kantaningaia mairouia raoraom n te kiraati. Ngkana te taobiki e kauntaba ma te Ekaretia, ko inaomata ni kaota am iango. Ko aki riai ni taekina te Ekaretia n am kaeka. Ma e ngae n anne, kakoaua raoi bwa ko na ataa ana koaua te Ekaretia iaon bwai aikai.
Joseph Z., ana ririki 18, Maryland, USA
Totokoa te Itabaraaraa
N na kamatata au aingo, ni katani au koaua ao reiren te Ekaretia, ni karinei aia iango tabeman. N na aki itabaraaraa, are e na kararoa te Tamnei, are e na kona n anai nanoia tabeman n te kawai ae raoiroi.
Daiana V., ana ririki 15, Buenos Aires, Argentina