Ngāue tokoní

ʻOku fakamatalaʻi ʻi he peesi 58–59 ʻo e Liahona ko ʻení ʻe Kalo F. Makongikī ko e tokoni ʻuluaki ʻi he kau palesitenisī ʻo e Kau Finemuí, ko e ngāue tokoní ʻa e ngāue ʻi he ongoongolelei ʻo Sīsū Kalaisí: “ʻI he taimi ʻoku tau tokoniʻi ai e niʻihi kehé, ʻoku tau fai ai e ngāue ʻo e fakamoʻuí. Pea hangē ko e akonaki ʻa e Tuʻi ko Penisimaní, ‘ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá’ (Mōsaia 2:17). ʻE tokoniʻi koe ʻe he ngaahi fokotuʻu ʻi laló ki hono akoʻi ʻo e toʻu tupú mo e fānaú ʻo kau ki he ngāue tokoní mo hono fatongia ʻi he ongoongolelei ʻo Sīsū Kalaisí.

Ngaahi Fokotuʻu ki hono Akoʻi ʻo e Toʻu Tupú

Ko e Pōpoaki Faka-Māmonga he foʻi vitiō maʻá e Toʻu Tupú ko e “Meʻa Foaki Makehé” (he ʻinitanetí ʻi he lds.org/go/E24service) ʻokú ne fakamatalaʻi ha talanoa ʻo ha talavou kui ʻokú ne fakaʻaongaʻi hono talēnití ke tāpuakiʻi ʻaki e niʻihi kehé. Mahalo te ke loto ke mamataʻi e foʻi vitioó mo ho fāmilí pea talanoa ki he ngaahi meʻa foaki makehe kuo foaki ki he mēmipa takitaha ʻo e fāmilí. ʻE fakaʻaongaʻi fēfē e ngaahi meʻa foaki ko ʻení ke ne tokoniʻi e niʻihi kehé?
ʻOku tau lau ʻi he Ki Hono Fakamālohia ʻo e Toʻu Tupú,, “Ko e niʻihi ʻo e ngaahi tokoni mahuʻinga taha ʻe lava ke ke faí ʻe fakahoko pē ia ʻi ho ʻapi ʻoʻoú” (32). Aleaʻi mo hoʻo toʻu tupú e mahuʻinga ʻo e tokoni ʻi ʻapí. Ko e hā e ngaahi tāpuaki ʻoku maʻu ʻi he fetokoniʻaki ʻa e kau mēmipa ʻo e fāmilí? Palani ha founga ʻe lava ai hoʻomou toʻu tupú ʻo fai ha ngāue tokoni mahuʻinga mālie ange ʻi ʻapi.
“ʻOku faʻa fakahaaʻi ʻa e ngāue tokoni mahuʻinga tahá ʻi he ngaahi ngāue faingofua ʻoku fai fakaʻaho ʻi he angaʻofá” (Ki Hono Fakamālohia ʻo e Toʻu Tupú, 32). Fakaafeʻi e toʻu tupú ke nau faʻu ha ʻekitivitī ngāue tokoni ʻoku kau ai e “ngāue fakaʻaho ʻi he angaʻofá.” Aleaʻi e founga ʻoku fekauʻaki ai e ngāue tokoní mo e ngaahi fuakava ʻoku tau fai ʻi he papitaisó (vakai, Mōsaia 18:8–10).
Fakakaukau ke fekumi ʻi ha konifelenisi lahi ha ngaahi meʻa ʻoku ʻaonga maʻá e efiafi fakafāmili ʻi ʻapí ʻa ia ʻe fakaʻaongaʻi ʻe he kau mēmipa ʻo e fāmilí ha ngaahi fakahinohino ke kumi ha ngaahi fakamatala ki he ngāue tokoní mei he konifelenisi lahi fakamuimuitahá. Vahevahe e meʻa ʻokú ke maʻú pea aleaʻi e founga te ke muimui ai he faleʻi kuo fai mai ʻe hotau kau takí.

Ngaahi Fokotuʻu ki hono Akoʻi ʻo e Fānaú

Tokoni ke mahino ki hoʻo fānaú ʻoku ʻi ai e ngaahi faingamālie ke fai ai ha tokoni ʻi he feituʻu kotoa pē. Tuku ke kumi ʻe he kau mēmipa ʻo e fāmilí e ngaahi founga te nau lava ai ʻo tokoni lolotonga ʻenau ngaahi ngāue fakaʻahó, pea fakataha mai ʻo vahevahe hoʻomou ngaahi aʻusiá.
Vahevahe e ngaahi talanoa ʻo e ngāue tokoní mei ho hisitōlia fakafāmilí, mei ha makasini ʻa e Siasí, pe ko ha lea mei he konifelenisi lahí. Lau e Mōsaia 2:17 pea talanoa ki he founga te tau tokoni ai ki he Tamai Hēvaní ʻaki ʻetau tokoniʻi e niʻihi kehé.
Tuku ke tā ʻe hoʻo fānaú ha ngaahi fakatātā ʻoku hā ai e anga ʻenau tokoni ki he niʻihi kehé. Fehuʻi kiate kinautolu pe ko e hā ha ngaahi meʻa te nau lava ʻo fai ke tokoniʻi ai honau tokouá mo e tuofāfiné, kaungāmeʻá, kau faiakó, pe mātuʻá.