Kiʻi Tohi Fakamatala ʻo e Konifelenisi ʻo ʻOkatopa 2013
ʻI hoʻo toe vakaiʻi ko ia ʻa e konifelenisi lahi ʻo ʻOkatopa 2013, ʻe lava ke ke fakaʻaongaʻi ʻa e ngaahi pēsí ni (mo e ngaahi Tohi Fakamatala Fakakonifelenisi ʻi he ngaahi pulusinga he kahaʻú) ke tokoni atu ki hoʻo akó mo fakaʻaongaʻi ʻa e ngaahi akonaki fakamuimuitaha ʻa e kau palōfita mo e kau ʻaposetolo moʻuí mo e kau taki kehe ʻo e Siasí.
“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia; … neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38).
Ko ha Talaʻofa Fakaepalōfita
“He ʻikai ke tau lava ʻo fakamālohiʻi ʻa e fānau ʻa e ʻOtuá ke nau fili e hala ki he fiefiá. He ʻikai fai ʻeni ʻe he ʻOtuá koeʻuhí ko e tauʻatāina ke fili kuó Ne foaki kiate kitautolu.
“ʻOku ʻofa ʻa e Tamai Hēvaní mo Hono ʻAlo ʻOfaʻangá ʻi he fānau kotoa ʻa e ʻOtuá, tatau ai pē pe ko e hā ʻoku nau fili ke fai pe tuʻunga te nau aʻusiá. Naʻe totongi ʻe he Fakamoʻuí ʻa e angahala kotoa pē, tatau ai pē pe ko e hā honau fulikivanú. Neongo kuo pau ke ʻi ai ha fakamaau totonu, ka he ʻikai kaihaʻasi ʻe he faingamālie ʻo e ʻaloʻofa ʻoku faí ʻa e fakamaau totonú. … Te tau lava maʻu pē ʻo lotolahi ʻi he ʻiloʻi pau ko ia ne tau maʻu kotoa ʻi ha taimi e ongoʻi fiefia ʻo e fakataha ko ha mēmipa ʻo e fāmili ʻofeina ʻo ʻetau Tamai Hēvaní. Te tau lava ʻi he tokoni ʻa e ʻOtuá ʻo ongoʻi e ʻamanaki lelei ko iá mo toe fiefia.”
Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Ki Hoku Makapuná,” Liahona, Nōvema 2013, 71, 72.
Lea Fakaepalōfita ʻo kau ki he Ngaahi Faingataʻa Fakaeʻatamaí mo e Fakaelotó
Ko e hā e founga lelei taha ke tali ʻaki e ngaahi faingataʻa fakaʻatamai mo fakaeloto ʻokú ke fehangahangai mo iá pe niʻihi ʻokú ke ʻofa aí? Ko e meʻatēpuú, ʻoua ʻaupito naʻa teitei mole hoʻo tui ki hoʻo Tamai Hēvaní, he ʻokú Ne ʻofa lahi ʻiate koe ʻo mahulu hake ia he mahino ʻokú ke maʻú. … ʻOua ʻaupito naʻá ke tālafili ki ai, pea ʻoua ʻaupito naʻá ke fakafefeka ho lotó. Tulifua faivelenga ki he ngaahi founga fakalotu ʻoku nau ʻomi ʻa e Laumālie ʻo e ʻEikí ki hoʻo moʻuí. Kumi faleʻi mei he niʻihi ʻoku nau maʻu ʻa e ngaahi kī ki hoʻo lelei fakalaumālié. Kole peá ke mataʻikoloaʻaki ʻa e ngaahi tāpuaki ʻo e lakanga fakataulaʻeikí. Maʻu fakauike ʻa e sākalamēnití peá ke pikitai ki he ngaahi talaʻofa haohaoa ʻo e Fakalelei ʻa Sīsū Kalaisí. Tui ki he ngaahi maná. Kuo lahi ha ngaahi mana kuó u mātā neongo hono talamai he ʻikai toe felave ha meʻá. He ʻikai ʻaupito teitei mole ʻa e ʻamanaki leleí ia. Kapau he ʻikai hoko mai leva mo kakato e ngaahi mana ko iá, manatuʻi ʻa e sīpinga ne tā ʻe he Fakamoʻuí Heʻene mamahí: kapau he ʻikai fakalaka ʻa e ipu mahí meiate koe, inu ia peá ke toʻa, ʻo falala ʻoku ʻi ai ha ngaahi ʻaho fakafiefia ʻoku toka mei muʻa. …
“… ʻOku ou fakamoʻoni ʻe ʻi ai e ʻaho ʻe tuʻu ai ʻi hotau ʻaó ʻa hotau ngaahi ʻofaʻanga ne tau ʻiloʻi ne faingataʻaʻia fakaesino ʻi he matelié, kuo nāunauʻia mo fakaʻeiʻeiki ʻi he sino mo e ʻatamai haohaoa.”
ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, “Hangē ha Ipu Kuo Maumaú,” Liahona, Nōvema 2013, 40–41, 42.