Kaungāmeʻa ʻi he Funga Māmaní
Ko ʻĒlina au mei Lūsia
Privet, drooks!*
ʻOkú ke saiʻia ʻi hono vahevahe hoʻo fakamoʻoní mo e niʻihi kehé? Mahalo pē te ke vahevahe ia ʻi he lotú. Pe te ke vahevahe ia mo ho fāmilí, kaungāmeʻá, mo e kau faiakó ʻaki haʻo hoko ko ha faʻifaʻitakiʻanga lelei. Ko e lau ʻeni ʻa ʻĒlina mei Kasani, Lūsia, pea ʻokú ne taʻu fitu. ʻOkú ne loto ke ke ʻilo ha meʻa lahi ange kau kiate ia mo e ngaahi founga lahi ʻokú ne ʻiloʻi ai ʻoku moʻoni e Siasí.
Kimuʻa peá u mohé ʻoku ou lau ʻeku folofolá mo ʻeku fineʻeikí. Ko e talanoa ʻoku ou manako taha aí ʻoku ʻi he 1 Nīfaí he taimi ne mavahe ai ʻa Līhai mei Selusalema mo hono fāmilí. ʻOku tokoni hono lau e folofolá, fai ʻeku lotú, mo fai ʻeku fakamoʻoní ke u mateuteu ai ke papitaisó.
ʻOku ou manako he fakaʻaliʻali he funga siteisí. ʻOku pau pē ne u maʻu ʻeni mei heʻeku fineʻeikí, koeʻuhí he ko ha fefine hiva fakapalofesinale ia. ʻOku ou saiʻia ke hiva mo tā vālingi.
ʻOku lahi ha ngaahi faingamālie lahi ke talanoa mo e niʻihi kehé ʻo kau ki he ongoongoleleí. ʻOku ou fakaafeʻi hoku kaungāmeʻá ke mau ō ki he Palaimelí. Ne u akoʻi ki heʻeku kui fefine hono uá ʻemau tāpuakiʻi e meʻakaí. ʻI he taimi ní, ʻoku mau lotu fakataha ʻi he taimi kaí.
ʻOku fakafiefia ʻeku moʻui ʻi Lūsiá. ʻI he taimi ʻoku māfana ai ʻa tuʻá, ʻoku ou kaukau mo ʻeku fineʻeikí he Vaitafe Volokaá mo ʻeva he paʻake ofi ki homau ʻapí. ʻI he taimi ʻoku momoko ai he faʻahitaʻu momokó, ʻokú ma saiʻia he sikeiti he ʻaisí. ʻOku ma toe ʻalu foki ʻo sio he faiva ʻa e fanga manú he circus mo mamata he faiva ʻaki ʻa e tamapuá he fale faiva ʻo e tamapuá.