Ko ʻEtau Maama ʻi he Fakapoʻulí

Sūsana Uaimeni, Siōsiá, USA

Ne toki aʻusia ʻe homau fāmilí ha vela mo ha maumau lahi ki homau falé, pea ne mau nofo kotoa ʻa kimautolu toko valú ʻi ha fale fakataimi loki tolu ʻoku lava pē ke ʻunuakiʻi holo ʻi he konga kimuʻa homau ʻapí. Ne fehangahangai homau fāmili mo e faingataʻá mo e moveuveú.

ʻI he taimi ko iá ne ʻikai ke mālohi hoku husepānití ʻi he Siasí. Ne fai ʻe homa ongo foha kei īkí ha ngaahi fili ʻe iku ki he mamahi. ʻI he taimi ko iá, ne u hoko ko e palesiteni ʻo e Kau Finemuí ʻi homau uōtí, pea ne fefaʻuhi ha kau finemui tokolahi mo ha ngaahi fakatauele faingataʻa. Ne toe fehangahangai foki mo ʻenau mātuʻá mo ha ngaahi faingataʻa pea ʻikai ke nau tokoniʻi honau ngaahi ʻofefiné he taimi mahuʻinga ko ʻení.

Ne u ʻilo ʻoku fie maʻu au ʻe he kau finemuí ni ke u tokoni ʻi honau ngaahi faingataʻa fakalaumālié. Ne u ʻilo ʻoku fie maʻu au ʻe hoku ngaahi foha ʻe toko onó. Ne u ʻilo ʻoku fakafalala mai hoku husepānití ki hoku mālohí. Ka naʻe hangē ne ʻikai ha toe meʻa ke faí he kuo ʻākilotoa au ʻe he fakapoʻulí, pea ne u ongoʻi ʻoku ʻikai ke toe ʻi ai haku ivi, ongoʻi vaivaia, mo ʻikai ke lava ʻo tataki e niʻihi ʻofeina ko ʻení ke nau hao.

ʻI ha pō ʻe taha ʻi heʻeku fuofua homa foha siʻisiʻí ʻi he lōngonoa homau ʻapi fakataimí, ne u fakakaukau kiate kinautolu ʻoku nau fie maʻu au ke u loto mālohí. Ne u ongoʻi e fuʻu fakapoʻuli ʻokú ne ʻākilotoa kinautolú. Lolotonga ʻeku faingataʻaʻiá ne u lotu ʻaki hoku lotó kotoa ki he Tamai Hēvaní ke Ne fakahaaʻi mai kiate au ha founga ke tokoniʻi ai kinautolu neongo ʻeku taʻe feʻungá. Naʻá Ne tali mai he taimi pē ko iá mo fakahinohino mai e foungá.

Ne hangē ʻoku ou sio atu ki homau holo lahi faiʻanga faiva he uōtí, ʻa ia ʻoku ʻikai ke ʻi ai hano matapā sioʻatá. Ne fuoloa e poʻulí, pea ʻikai ke ulo mai ha maama. Ne u tutuʻi leva ha foʻi teʻelango faiʻaho. Ne hangē ʻoku ʻikai ke fuʻu mahuʻingá, ka naʻe feʻunga pē e kiʻi maama siʻisiʻi ko iá ke ne tekeʻi atu e fakapoʻulí.

Ko ʻeku talí ia! ʻOku ʻikai ke fuʻu mahuʻinga e lahi ia ʻo e fakapoʻuli ʻokú ne ʻākilotoa kitautolu ʻi he māmaní. ʻOku taʻengata e māmá pea ʻoku mālohi lahi ange ia ʻi he fakapoʻulí (vakai, 2 Kolinitō 4:6; Mōsaia 16:9; T&F 14:9). Kapau te tau moʻui taau maʻu pē mo e takaua ʻa e Laumālie Māʻoniʻoní, ʻe lava ke ulo atu ha maama feʻunga mei hotau laumālié ke ne tekeʻi atu ha faʻahinga lahi pē ʻo e fakapoʻulí, pea ʻe ʻi ai ha niʻihi te nau fakatokangaʻi e maama ʻoku ʻiate kitautolú.

Ko e meʻa pē ia ne u fie maʻú. Kuo hanga ʻe he kiʻi foʻi fakakaukau faingofua ko ʻení ʻo fataki mai au he taʻu ʻe 25 kuohilí ʻaki e ʻilo ʻe lava ke tau fai ha meʻa ʻi he tokoni mo e tataki ʻa e ʻEikí—pea hoko ai—ʻa e meʻa kotoa ʻokú Ne finangalo ke tau fai ʻi he māmani fakapoʻuli ko ʻení.