Ne u Taukapoʻi ʻEku Tuí
Kalina Pitasoni, ʻAitahō, USA
Lolotonga hoku taʻu ʻuluaki ʻi he ʻunivēsití, ne u ʻiloʻi ai e foʻi moʻoni he ʻikai maluʻi ʻeku moʻuí ko ha tokotaha ako mei he ngaahi tākiekina ʻa e māmaní ʻo hangē ko ia kimuʻá. Pea he ʻikai foki ke tali lelei mo e meʻa ʻoku ou mahuʻingaʻia aí.
Ne u ʻiloʻi ʻa e fuʻu mahino lelei ʻeku fakafisi ke kau he ngaahi ʻekitivitī ne u ʻilo te ne uesia fakaesino aú pe uesia ai hoku vā mo e Tamai Hēvaní. Neongo ia, ne u manavahē ʻi hano fakaangaʻi au ko ha mēmipa ʻo e Siasí pea ne u feinga ke fakaʻehiʻehi mei he kaveingá.
ʻI ha kalasi hoʻatā ʻi ha ʻaho ʻe taha, ne tataki ai ʻe he palōfesá ha fealeaʻaki ki he founga ʻe tupulaki ai e toʻu tupú neongo e hokohoko ʻa e fakatangá. Ne tali ʻe ha taʻahine ʻi mui ʻiate au ʻo pehē ʻoku hanga ʻe he fealeaʻakí ʻo ʻai ia ke ne fakakaukau ki he kau Māmongá. Ne u ongoʻi taʻe fiemālie koeʻuhí ko e taimi pē ʻoku ʻo hake ai e Siasí ʻi ha kalasi, ʻe lahi maʻu pē e ngaahi lea taʻe taau ki aí.
ʻI heʻeku teuteu ke fanongo ki ha ngaahi lea koví, ne ʻeke ʻe he faiakó pe ʻoku ʻi ai ha taha siasi ʻi he kalasí. Ne u ʻohovale he fehuʻí ʻo sio takai holo he lokí ʻo ʻilo ʻoku fai ʻe he taha kotoa pē mo e meʻa tatau. Kimuʻa peá u toe fakakaukaú, ne hiki hake hoku nimá. Ne u fanongo ki he fefanafanahi holo he lokí.
Ne pehē ʻe he faiakó, “Toko taha.” Ne tatangi e foʻi leá ʻi hoku telingá. Hili ha fakalongolongo fuoloa, ne kole mai ke u tali e fehuʻi kau ki he fakafekiki pe ko ha kau Kalisitiane e Kāingalotú. Ne ʻikai ko ha fehuʻi foʻou ʻeni kiate au pea ne u mateuteu ke tali.
Ne u tali fakapapauʻi atu, “‘ʻOku mau lea ʻia Kalaisi, ʻoku mau fiefia ʻia Kalaisi, [pea] ʻoku mau malanga ʻaki ʻa Kalaisi’” (2 Nīfai 25:26). Ko ha kau Kalisitiane moʻoni kimautolu.”
Ne longo e fefanafanahí, ka ne u ongoʻi ʻoku siofi au ʻe he tokotaha kotoa pē. Ne u fakakaukau te u ongoʻi liʻekina. Neongo ia, ne u ongoʻi hangē pē ʻoku tangutu mai e Fakamoʻuí ʻi hoku tafaʻakí mo ala mai Hono toʻukupú kiate au. Ne ʻikai ha toe meʻa ia ʻe mahuʻinga, he ne u fonu he fiefia naʻá ne fakamālohia ʻeku fakamoʻoni kiate Iá. Ne u taukapoʻi ʻeku tuí.
Ne u vahevahe ha meʻa lahi ange mo e kalasí ki he ʻuhinga ʻoku hoko ai e Kāingalotú ko ha kau Kalisitiané. Ne u fakakaukau ki he taimi ne vahevahe ai ʻe Palesiteni Tōmasi S. Monisoni e ongoongoleleí ʻi haʻane heka pasi. Mei he meʻá ni naʻá ne poupouʻi e kāingalotú ke “loto toʻa mo mateuteu ke taukaveʻi ʻetau tuí.”1 ʻI heʻeku fakakaukau ki heʻene ngaahi leá, ne u ʻilo ne u fai e meʻa ne u ilifia taha ke faí.
ʻOku ʻikai te u ʻilo pe naʻe liliu ʻe he ngaahi meʻa ne u leaʻakí e fakakaukau ʻa ha taha ki he Siasí, ka ʻoku ʻikai fie maʻu ke tau ilifia ke loto toʻa ʻo vahevahe e ongoongoleleí—ʻi ha faʻahinga feituʻu pē te tau ʻi ai. Neongo kapau heʻikai ke tau tāpuekina ai ha taha, ka te tau fakamālohia maʻu pē ai ʻetau fakamoʻoní mo hotau vā mo ʻetau Tamai Hēvaní.