Ko ha Miniti ʻe Taha mo e Konga ʻi he ʻUhá

Seisoni Pouseni, ʻIutā, USA

ʻI heʻeku tupu haké, ko ha kiʻi tamasiʻi au he ʻikai fai ha hohaʻa ki ai. Talu ʻeku tupu mo ʻeku mālohi pē ʻi he Siasí. Ne u hoko ko e palesiteni ʻeku kōlomu lakanga fakataulaʻeikí mo e ngaahi kalasi seminelí. Ne u ʻalu ki he konifelenisi kotoa pē ʻa e toʻu tupú, fononga ki he temipalé, polokalama ʻa e Sikautí, mo e pō Mutualé. Ne u maʻu foki mo ha fakamoʻoni ʻo e ongoongoleleí. Ka ʻi he taimi ne u hoko ai ko ha mēmipa heʻeku kōlomu ʻo e taulaʻeikí, ne u kiʻi faingataʻaʻia, neongo ne ʻikai ke ʻiloʻi ʻe ha taha. Ko hono ʻuhingá, he ko e tamasiʻi au he ʻikai te ke hohaʻa ki aí.

Ne u fai maʻu pē e meʻa ne u faʻa faí ʻi he ngaahi ʻuluaki uiké mo e māhina ʻo ʻeku ʻi he kōlomú: ne u ʻalu ki he lotú, Mutualé, mo e ngaahi ʻekitivitī ʻa e Sikautí. Neongo ia, ne u faingataʻaʻia fakaeloto. Ne ʻikai te u ongoʻi ʻoku ou hoko ko ha konga ʻo e kulupú pe loto e kau talavou kehé ke u ʻi ai. Ne u fuʻu fie maʻu moʻoni ke u kau.

ʻI he fāi atu ʻa e taimí, ne u fehuʻia mo veiveiua pe naʻá ku fie hoko ko ha konga ʻo e kōlomú. Ka ne u kei mālohi pē, mo faingataʻaʻia fakalongolongo pē mo e ʻamanaki ʻe ʻi ai ha meʻa pe ko ha taha te ne tokoniʻi au ke u ongoʻi ʻoku talitali lelei au.

Ne toki ʻosi pē haʻaku ngaohi mo ʻeku tangataʻeikí ʻeku fuofua kaá, ko ha Footi Mustang fakaʻofoʻofa ʻo e taʻu 1967. Ne toutou ʻeke mai ʻe Misa Sitei ko ʻeku palesiteni Talavoú e kaá. Ne u fakakaukau pē ʻoku fakahaaʻi mai heʻene fehuʻí ʻene tokanga ki he kā fakaʻofoʻofá—kae ʻikai ki ha talavoú.

Ne liliu kotoa ʻeni ʻi ha efiafi ʻuha ʻe taha hili ʻa e Mutualé. Koeʻuhí ko e lahi ʻa e ʻuhá, ne ʻave kotoa kimautolu ʻe Misa Sitei ki homau ʻapí pea ko au ne ʻave fakamuimuitahá. ʻI heʻene sio ki heʻeku kā lanu puluú ʻi hono tauʻangá, naʻá ne toe ʻeke mai e kaá. Ne u loto ke ne sio ki he mīsini ne ʻosi ha ngaahi houa lahi ʻeku fakaleleiʻí.

Ne ʻikai ke ʻilo lahi a Misa Sitei ia ki he kaá, pea ʻoku ʻi ai hano uaifi mo ha foha kei siʻi ʻoku tatali mai kiate ia ʻi ʻapi. Ka naʻá ne tuʻu pē ia he fakapoʻulí, ʻi he ʻuhá, ʻo sio ki ha mīsini ʻo e kā ʻoku ʻikai ke ʻasi lelei mai koeʻuhí ko e fakapoʻulí. Ne u ʻilo he taimi ko iá ʻoku ʻikai ko ʻene fai e meʻa ko iá koeʻuhí ko haʻane fie sio ki ha kā fakaʻofoʻofá—ka ko ʻene fai iá koeʻuhí ko ʻene tokanga mai kiate aú.

Koeʻuhí ko e miniti ʻe taha mo e konga ko ia ʻene tuʻu he ʻuhá, ne u maʻu e meʻa ne u fie maʻú. Ne u toki ongoʻi ʻoku talitali lelei au. Kuo tali ʻeku ngaahi lotu fakalongolongó.

Talu mei ai kuó u ʻalu ki he temipalé, ngāue fakafaifekau, ʻosi mei he kolisí, mo feinga ke tauhi ʻeku ngaahi fuakavá. Mahalo he ʻikai ke manatuʻi ʻe Misa Sitei ia e mōmeniti ko iá, ka he ʻikai ke teitei ngalo ia ʻiate au.

ʻOku tau faingataʻaʻia kotoa, ka te tau lava kotoa ke maʻu ha miniti ʻe taha mo e konga he ʻaho takitaha ke fakahaaʻi ai ha ʻofa ki ha taha e fānau ʻa e ʻOtuá. ʻE malava ke ne fakahoko ai ha meʻa makehe—ʻo aʻu ki he tokotaha ʻoku tau fakakaukau ʻoku ʻikai fie maʻu ke fai ha hohaʻa ki aí.