Kau Palōfita ʻo e Fuakava Motuʻá

Noa

“Pea kia [Noa] naʻe hoko hake hono mafaí kia ʻĀtama ʻi he Lakanga Fakataulaʻeikí; naʻe ui ia ʻe he ʻOtuá ki he tuʻunga ko ʻení, pea ko e tamai ia ʻa e kakai moʻui kotoa pē ʻi hono kuongá.”¹—Ko e Palōfita ko Siosefa Sāmitá

Naʻe fakahingoa au heʻeku tangataʻeikí ko Noa, ʻa ia ʻoku ʻuhinga ko e “mālōlō,” koeʻuhí he naʻá ne tui te u ʻomi e fakafiemālié ki hoku fāmilí. Ne u moʻui lolotonga e kuonga faiangahala naʻe lahi ai e fetāʻakí, tāufehiʻá, mo e ngaahi angahala kehekehe.²

Ne fakatokanga mai e ʻOtuá kiate au ʻe hanga ʻe ha tāfea ʻo fakaʻauha e kau angakoví, mo fekau ke u foʻu ha vaka mo tānaki e meʻakaí mo e fanga monumanú. Ne tokoni hoku ngaahi foha ʻe toko tolú pea ʻi he fakahinohino ʻa e ʻOtuá, ne u ngaohi e vaká ʻi he taʻu ʻe 120 hono hokó. Naʻe teʻeki hā mai ha fakaʻilonga ʻe ʻuha.³

Ne u malangaʻi foki e fakatomalá, ʻo ʻamanaki ʻe fanongo ha niʻihi pea nau hao ai mei he Lōmakí. Mei hono liliu ʻo ʻĪnoké ʻo aʻu ki he Lōmakí, ne tokolahi ha kakai angatonu ne ʻave ki he langí ʻo ʻikai te nau aʻusia e maté, ka naʻe ʻi ai ha niʻihi kehe ne ʻikai te nau fakatomala.⁴

ʻI he taimi ne heka ai hoku fāmilí ki he ʻaʻaké, ne mau tāpuni e matapaá pea ʻikai ke toe fakaava ia ʻi ha meimei taʻu ʻe taha, kae ʻoua ke ʻosi e ʻuhá pea mōmoa e kelekelé.⁵ ʻI he taimi ne mau hifo ai mei he vaká, ne fuakava e ʻOtuá he ʻikai toe lōmakiʻi e māmaní. Ne tuʻu ha ʻumata ʻi he langí ko ha fakaʻilonga ʻo ʻEne talaʻofá. Naʻá Ne fekau ke fakatokolahi homau fāmilí pea hoko atu hono moʻui ʻaki e ongoongoleleí, pea ne u hoko ko e tamai fika ua ki he faʻahinga ʻo e tangatá.⁶

Hili ha ngaahi senituli mei ai, ʻi heʻeku hoko ko e ʻāngelo ko Kepalelí,⁷ ne u fakahā ki he taulaʻeiki ko Sākalaiá te ne hoko ko e tamai ʻa Sione Papitaisó, pea ne u hā kia Mele ʻo fakahā kiate ia te ne ʻaloʻi mai ʻa e Fakamoʻuí.⁸

ʻOku hā ia mei heʻeku moʻuí, neongo e ngaahi taimi faingataʻá, he ʻikai pē ke teitei liʻekina koe kapau te ke muimui ki he ʻOtuá. ʻE faifai pea holo e lōmaki ʻo e moʻuí, pea te ke mamata ki he fakaʻofoʻofa ʻo e ongoongoleleí ʻi hoʻo moʻuí, ʻo hangē pē ko e fakalavalava ʻa e ʻumatá ʻi he langí.

Maʻuʻanga Fakamatalá

1. Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 119.

2. Vakai, Sēnesi 6:11; Mōsese 8:9; Bible Dictionary, “Noah.”

3. Vakai Sēnesi 6:14–22; Mōsese 8:17; Ngaahi Akonaki ʻa e Kau Palesiteni ʻo e Siasí: Sipenisā W. Kimipolo (2006), 175.

4. Vakai, Mōsese 7:21, 27; 8:15–24.

5. Vakai, Sēnesi 7:11; 8:13–14.

6. Vakai, Sēnesi 9:1–17.

7. Vakai, Ko e Fakahinohino ki he Ngaahi Folofolá, “Kepaleli,” scriptures.lds.org.

8. Vakai, Luke 1:11–20, 26–33.

9. Vakai, Sēnesi 5:3–28.

10. Vakai,Sēnesi 9:29.

11. Vakai, Taniela 8:15–19; 9:21–23.

Puha : Noa

• Hingoá: Noa, Kepaleli

• ʻAho fāʻeleʻí: hili ha meimei taʻu ʻe 1,056 meia ʻĀtama⁹

• Taʻu motuʻa he taimi ne pekia aí: taʻu 950¹⁰

• Tohi hohokó: foha ʻo Lēmeki, mokopuna tangata ʻo Mētuisela, hili ha toʻutangata ʻe hiva meia ʻĀtama

• Ngaahi fatongia fakamatelié: tokotaha malanga ʻo e māʻoniʻoní kimuʻa he Lōmakí; fakamoʻui ʻo e fāmilí mo e fanga monumanú mei he Lōmakí; tamai fika ua ʻa e faʻahinga ʻo e tangatá

• Fatongia he hili e moʻui fakamatelié: hoko ko Kepaleli, naʻá ne hā kia Taniela ʻo akoʻi e Hāʻele ʻAnga Uá;¹¹ kia Sākalaia, ko e tamai ʻa Sione Papitaisó; mo Mele ko e faʻē ʻa Sīsuú