Aoao se Tagata e Fagota
Ina ua ia manaomia se fesoasoani, na liliu atu Ezra, e 16 tausaga le matua mai Samoa, i le mea na aoaoina ai o ia e lona tamā: i lona Tama Faalelagi.
Na taofi e Ezra le aloina o lana tamai paopao ma vaai atu i le goto ifo o le la e agai atu i le Pasefika i le isi itu o le vaifagaloa. Na la fagotaina nei ogasami ma lona tama mo le tele o tausaga, ae o le asō sa faigata ona ia vaai atu i se mea sa masani ai ona o ona loimata.
O le asō ua tuua na o ia.
A o luelue malie le paopao i luga o le sami, na mafai ona ia faalogoina upu na tele ina tautala ai lona tama: “Vaai faalelei, Ezra. E i ai se aso ou te oti ai ae o le a manaomia ona e iloa le auala e tausi ai le aiga.”
O le asō la le aso lea na lapataiina ai o ia e lona tama ma taumafai ai e tapena o ia. Ae ua vave tele ona oo mai. E na o le 16 ona tausaga. E lei saunia o ia.
O Le Tiutetauave
E faananau lava Ezra i lona tama. Sa faatalitali o ia ma le naunautai mo le tele o tausaga seia oo ina fai mai lona tama o le fitu o tausaga o Esera, na mafai ai e ia ona fesoasoani e faatulaga ma siaki ia upega faagota.
E lei tele ni tupe na maua mai i ona faiva, ae sa lava e fafaga ai Ezra, o ona tuafafine e toalima, ma lo latou tina; lagolago ai le tuafafine matua o Ezra sa faamisiona i le Iunaite Setete; ma fesoasoani ai foi i o latou tuaoi. Sa mafai foi ona amata teuina e Ezra se tupe mo lana lava misiona.
Peitai ua maliu nei lona tama. Na faafuasei lona maliu, ma sa nutimomoia ai le loto o Ezra. O le maliu ai o lona tama o le mou atu foi lea o lana toa magumagu, lona epikopo, ma lona faiaoga.
Ae sa faaopoopo atu la i le loto nutimomoia, le matautia o le iloa, o le tiutetauvae sa taumafai lona tama e sauniuni i ai o ia, o lea ua faafuasei nei ona avea ma ana. Ua tatau nei ia Ezra ona tausia lona aiga.
O Le Tatalo
Sa le mafai lava ona mafaufau o ia e fagota i le vaiaso muamua ina ua uma le maliu o lona tama. E lei te’a ona lagona mafatia. O le mafaufau e faaaoga le paopao a lona tama, faaaoga upega fagota a lona tama, ma le faia o galuega a lona tama e aunoa ma lona i ai, sa faigata ona talia.
O le vaiaso na sosoo ai, sa iloa ai e ia ua manaomia ona alu, ae sa matua mamafatu le avega. E ui i le naunau o Ezra ia faapei o lona tama, ae sa ia iloa e matua le’i taitai ona ia ausia lena sini.
“Sa ou lagona ua pei e leai se faamoemoe,” o lana tala lea. “Sa ou iloaina le faigata o le taimi muamua lava e savali ai i tulagavae a lo’u tama. A o ou aveina atu le paopao i le sami, sa ou lagona lona faatasi mai. Sa toe oo mai upu na tautala mai ai lo’u tama ia te au, ma sa ou lagonaina le mamafa o le tiutetauave mo lo’u aiga.”
A o tu o ia i le sami papa’u o le Pasefika, na ia liliu atu i le Tagata lava e toatasi e mafai ona fesoasoani ia te ia—o le Toatasi na aoaoina ai o ia e lona tama e faalagolago i ai.
“Faaali mai ia te au le mea na tu ai lo’u tama,” o le tatalo lea a Ezra. “Fesoasoani mai ina ia ou faataunuuina le manao o lo’u tama mo au.”
O Le Tali
I le toafilemu o le malu mai o le afiafi ina ua uma lena tatalo, na lagona ai e Ezra se mea ua suia. Na ia lagonaina le tata’i atu o ia i le mea tonu e fagota ai lona tama, ma na oo mai i lona mafaufau mea na aoaoina ai o ia e lona tama pe a manaomia.
“Ina ua uma lena tatalo, sa ou lagona se malosi faaopoopo, “ o lana tala lea. “Sa ou iloa o le a fesoasoani mai le Tama Faalelagi ia te au.”
E pei lava foi ona faailoa atu e le Faaola i Ana Aposetolo anamua le mea e lafo i ai a latou upega, na maua foi e Ezra se fesoasoani. “Sa tele i’a na ou maua i lena aso,” o lana tala lea.
Ua Soo Lava le Atalii i le Tama
E ui ina sa masalosalo o ia e le mafai ona ia faia le mea na faia e lona tama, ae na iloa e Ezra e sili atu mea e mafai ona ia faia nai lo le mea na mafaufau ai.
“Ua avea o se suiga tele i lo’u olaga—o le auala ou te mafaufau ai, vaai ai i mea, ma faia,” o le tala lea a Ezra. “Sa ou iloa e mafai ona ou faia mea na faia e lo’u tama.”
Ua so’o uma lava Ezra i lona tama nai lo le mea na ia talitonu ai. Ua mulimuli o ia i tulagavae o lona tama e avea o se faifaiva—ma se faiaoga.
O le vaiaso lona lua na alu ai Ezra e fagota, na fesili atu lana uo o Fetu pe mafai ona la o ma aoao ai. Na aoaoina Fetu e Ezra i le auala e fagota ai, ma na fesoasoani foi Fetu ia Ezra i lana galuega ma ua la o toalua ai.
“Ou te faafetai mo le avanoa e aoao atu ai isi e pei ona aoaoina a’u e lo’u tama,” na fai mai ai Ezra. “Ou te fiafia ai aua ua ou iloa ua le na o a’u o se faifaiva e pei o lo’u tama ae ua avea foi au o se faiaoga.”
Aoao se Tagata e Fagota
Fai mai le faaupuga, pe a e tuuina atu i se tagata se i’a, ua e fafagaina o ia mo se aso, ae afai e te aoaoina o ia e fagota, ua e fafagaina o ia mo lona olaga atoa. Na faia moni lava e le tama o Ezra le vaega lona lua.
Peitai, na sili atu mea na aoao e Ezra mai lona tama nai lo le fagota. Na ia aoao e mafai ona ia faalagolago atu i lona Tama Faalelagi. O lenei malamalama o le a aoga ia te ia i lona olaga atoa e sili atu foi nai lo lona tomai e fagota.
O lona iloaina na te moomia tele le fesoasoani a lona Tama Faalelagi, ua faaeteete ai Ezra i le faataunuuina ma le agavaa o ona tiutetauave o se aoao, o le tofi lea na faauuina ai o ia e lona tama i le vaiaso ao lei maliu. Na te faatulagaina foi ana fagotaga ina ia lē faalavelave i lana aoga ma le seminare.
O le mea pito i sili, o loo ia teuina foi se tupe na te mafai mai ana fagotaga ina ia avea o ia ma faifaiva i tagata i se aso (tagai i le Mataio 4:19).
“I se tasi o afiafi faaleaiga na faaalia ai le manao o lo’u tama, ina ia matou o uma i ni misiona,” o le tala lea a Ezra. “O lau sini maualuga lena.”
Na manatua e Ezra le tali mai a le Alii ina ua ia valaau atu. “Ou te manao e tali atu ia te Ia pe a Ia valaauina au.”
O le toe taliu mai lea o Ezra ma lana uo o Fetu i le paopao ina ua uma ona ao la la’ua upega.
Ata na pueina e Adam C. Olson, vagana ua faamatalaina
Ata o tulaga vae © iStock
O loo fuafua Ezra e alu i se misiona. Na te manatua le tali mai o le Tama Faalelagi ina ua ia valaau atu. “Ou te manao e tali atu ia te Ia pe a Ia valaauina au,” o le tala lea a Ezra.
O le faataunuuina o le matafaioi a lona tama e avea ma se tagata e tausia le aiga, na fai mai ai Ezra, “Sa ou lagona le faigata i le taimi muamua o le savali i tulagavae o lo’u tama.”