O Le Ala Moni i le Fiafia

Saunia e Elder Quentin L. Cook

O Le Korama a Aposetolo e Toasefululua

Mai se saunoaga na tuuina atu i le Iunivesite a Polika Iaga–Hawaii i le aso 10 o Aperila, 2010. Mo le anotusi atoa i le gagana Peretania, asiasi i le http://devotional.byuh.edu/node/416.

A o tatou tulimata’i atu i le ala moni o le fiafia i totonu o o tatou aiga ma galuega, ou te tatalo ina ia tatou faaaogaina lo tatou atamai ma uunaiga e aumaia ai le amiotonu, filemu, malamalama, ma le saolotoga sili i tagata o le lalolagi atoa.

Ata

Elder Quentin L. Cook

O le fua mo le “olaga lelei” ua leva ona finauina i le tele o seneturi. A o i ai le Aposetolo o Paulo i Atenai i le Mauga o Maresa, na fetaiai o ia ma le “au fiapopoto o le itu aiga o Epikuro, ma le itu aiga o Setoiko” (Galuega 17:18). Na talitonu le au Setoiko o le lelei aupito maualuga o le ola mama lea, ae na talitonu le au Epikuro o le lelei aupito maualuga o le tuinanau lea. E toatele le au Setoiko ua oo ina femitai ma ua faaaogaina le filosifia o se “alofaga mo … naunautaiga ma le amioleaga.” E toatele le au Epikuro ua tuuto atu i le tuinanau ma ua avea ma a latou mautauave le “Tatou aai ma inu, aua o a taeao tatou te oti ai.”¹

O le toatele i le lalolagi faaleaoaoga ua leva ona naunau atu i le fautuaga a Aristotle o le “faautaga atamai” o se ata faataatia mo “le olaga lelei.” Na tautino e se tagata na tusi i le New York Times Book Review e faapea ua faia le faaiuga a le aufaitofa manino faaonapo nei, e leai se paleni sa’o e tasi o elemene e faavae ai ‘le olaga lelei mo le tagata.’”²

Na tautino i se tusiga i le New York Times e faapea, “O le fiafia i le faaipoipoina e sili atu le taua na i lo se isi lava mea e maua ai le soifua manuia faaletagata lava ia.” Na lu’iina e le tusitala ia kolisi e faaitiitia le taimi e faaalu i le “tapenaina o le au aooga mo matata” ae ia sili atu le taimi e “tapena ai i latou e faia faaiuga faaleagafesootai.”³

A o ou faitauina nei faamatalaga, sa ou toe tomanatu i mea sa aoaoina mai e Iosefa Samita: “O le fiafia o le faamoemoega ma le fuafuaga lea o lo tatou olaga nei; ma o le iuga foi lena, pe afai tatou te tulitulimata’i atu i le ala e tau atu i ai; ma o lena ala o le amioatua, faamaoni, faatuatua, paia, ma le tausia o poloaiga uma a le Atua.”⁴

E tusa ai ma le faamatalaga i le New York Times e uiga i le faaipoipoga ma le folafolaga mautinoa a le Perofeta, ou te talitonu e mafai ona tatou maua le fiafia lea tatou te manaomia ma o loo finagalo ai le Atua mo i tatou. O le a se mea tatou te faia e maua ai?

Ia Faafetai mo Lou Tofi

Ia maua le lotofaafetai i taimi uma mo ou faamanuiaga, aemaise lava lou tofi. Pe a faamanuiaina i tatou i ni matua lelei, e tatau ona tatou lotofaafetai. O la tatou aitalafu lea i lo tatou tofi.

E i ai se alagaupu ua leva a Saina e faapea, “A e inuina le vai, aua nei galo le vaieli na puna mai ai.” O loo manino lava i tusitusiga paia e tatau ona tatou ava i o tatou matua. Fai mai le faataoto, “Lou atalii e, ia e tausi i poloaiga a lou tama; aua foi e te tuulafoaiina le upu e aoao atu a lou tina” (Faataoto 6:20). Na faaupuina e se faitofa manino taua o Siamani o Goethe faapea:

O mea mai le tofi o o outou tama, e nonō,

Toe faafou lou mauaina, ina ia e umia moni!⁵

E manino lava le manaomia ona tatou faafetai i o tatou matua ma faia ni faatinoga lelei ia maua ai mea latou te faamoemoe e faaee mai i o tatou luga. O se laasaga lenei e agai atu ai i le fiafia faaletagata lava ia.

Tautino atu Oe Lava i le Aiga

Lona lua, tautino atu oe lava i le mafutaga e faavavau a le aiga e avea ma faavae o le fiafia. I le lalolagi, ua filifili le toatele e le faaipoipo pe faatuai foi ona faaipoipo. O le aiga o se mafutaga faavavau ua faauuina e le Atua a’o le i faavaeina le lalolagi. O le toatele o tagata o le a faaipoipo ma faamanuiaina i ni fanau. E leai se faamanuiaga sili atu i lenei lalolagi nai lo le mauaina o se fanau. O nisi o fuaitau sili ona faagaeetia loto i tusitusiga paia uma o loo ta’ua ai le tulaga matagofie o le taua o fanau i le fuafuaga a le tatou Tama Faalelagi. O i latou moni lava “o le tofi mai le Alii” (Salamo 127:3).

Ina ua 20 ma ona tupu o’u tausaga, na tuuina mai e Peresitene Tavita O. MaKei (1873–1970) se savali faaperofeta e uiga i le faaipoipoga ma fanau. Sa 95 tausaga o lona soifua ma o le tausaga mulimuli foi lea o lona soifuaga. Na ia aoao mai o le alofa mama i le va o se alii ma se tamaitai “o se tasi lea o mea e aupito sili ona tamalii i luga o le fogaeleele, ma o le fanauina ma le tausia o fanau o le tiute aupito maualuga lea o tiute uma o le tagata soifua.”⁶

Ona faasoa mai lea e Peresitene MaKei o lona popolega i le faateleina o le taliaina o teteaga. I le 1969 o Kalefonia le setete muamua lava i le Iunaite Setete na faatagaina le tulaga lea na taua o le “tetea e aunoa ma se amioga sese.” A o le i oo i lena taimi, e tatau ona i ai se mafuaaga e faamuta ai se faaipoipoga, e pei o le le faamaoni po o nisi tulaga matuia. Na manino lava le popole o Peresitene MaKei ona ua tulaga faaletonu le faavae o faaipoipoga. Na ia saunoa, “O le faateleina o le saoasaoa o faaipoipoga tatala i totonu o le Iunaite Setete i le asō o se tulaga lamatia taufaamatau lea i le tulaga maoae o lenei malo.”⁷

A tatou toe tepa i tua i mea na aoao mai e Peresitene MaKei, e moni lava o se faaaliga. Na tusi faasolo e le pule faatonu o Talafou a le I.S. ma Lipoti i le Lalolagi le talafaasolopito ma taunuuga na tutupu talu mai lena taimi. Na ia lipotia mai faapea “ua sili atu ma le faaluaina le saoasaoa o faaipoipoga ua tatala talu mai le vaitau o le 1960,” ma o pepe e fananau mai i tina e le i faaipoipo ua “siitia atu mai le 5 pasene sa i ai i le 1960 i le 35 pasene i le taimi nei.” Na ia faamatalaina le taunuuga ma le aafiaga lē lelei i tamaiti. Na ia faamanino mai e faapea “o le tulaga mautu o le aiga o loo i ai matua moni e toalua … ua avea o se auala sili mo le faatonutonuina o le amio, mo le faafaileleina, mo le faamautuina o tulaga faatauaina, ma mo le fuafuaina o le lumanai o se tamaitiiti.”⁸

Na faaiu le tusiga a le New York Times e faapea, “O tagata i lenei vaitaimi … ua tosina i popolega i oa faalelalolagi ma se fefe faaanamua i le tauleleia ma agafesootai” ma, o se taunuuga, ua i ai so latou “itu tauaso faaleagaga.”⁹ Pe le o le mea ea lea na valoia e Peresitene MaKei?

Ou te faamautinoa atu ia te outou e anoanoai faaipoipoga a tagata faamaoni o le Ekalesia o loo fiafia ma faamanuiaina. Mo i latou e le i faaipoipo, e tatau ona outou agai i luma ma le faatuatua ma le mautinoa i le sini autu o le faaipoipoga ma le aiga. Ou te fautuaina outou ina ia saili se toalua amiotonu o le a e faamemelo i ai ma o le a avea ma au uo mamae. Ou te tautino atu ia te outou o le fiafia, alofa, ma le faamalieina lea e maua i totonu o aiga fealofani, ma amiotonu e fua mai ai le fiafiaga sili e tatau ai, lea e mafai ona tatou ausiaina. O lena fiafia o le faavae lea mo se sosaiete manuia. O i latou o e amiotonu ma e le o mafai ona ausia lenei sini ua ia i latou le aia tatau mo faamanuiaga uma a lo tatou Tama Faalelagi mo Ana fanau.

Ia Aofia ai i se Auala Lelei

Lona tolu, ia e aofia ai i le lalolagi i se auala lelei ma ia avea ma se uunaiga malosi mo le lelei. O se luitau taua le taofimau lea i le tulafono faatusi paia ia ola i le lalolagi a e le ni ō le lalolagi (tagai i le Ioane 17). Na aoao mai Peresitene Iosefa Filitia Samita (1876–1972), a o avea ma se tasi o le Korama a Aposetolo e Toasefululua e faapea, e ui o loo tatou i ai i le lalolagi, “ae le o i tatou o ni ō le lalolagi i le uiga e tatau ona tatou faatinoina … aga masani leaga, … tifiga, … o mea faavalea, aoaoga faavae sese ma teori.”¹⁰ E le gata i lea, o lou sao i le mea o loo e ola ai o se vaega lea o lau lu’i ia avea o se faataitaiga, faasoa atu le talalelei, ma ola e tusa ai ma upumoni na aoaoina ai oe e matua ma perofeta.

Ina ia ausia lenei lu’i, o le a e manao ma e tatau ona e aofia ai i le lalolagi i se auala lelei. E tatau ona tofotofoina ma suesueina i tatou ma ia agavaa mo se malo e sili atu. E pei ona aoao mai e Peresitene Thomas S. Monson, “O filifiliga e iloa ai le taunuuga.”¹¹

E le o se olaga faigofie lenei; e le i fuafuaina ia faigofie. Ae ui i lea, ua tatou iloa o le a faatupuina e le Alii o tatou tofotofoga ina ia faamanuia ai i tatou mo lo tatou lelei. O le a Ia tuuina mai ia i tatou le malosi e tumau mausali ai e ui i faigata. O le amiotonu o lona lava lea taui, ma ua folafola mai ia i tatou e tusitusiga paia le taui o le amiotonu o le “filemu lea i lenei lalolagi, ma le olaga faavavau i le lalolagi a sau” (MFF 59:23). Ou te fautuaina outou ina ia aofia ai i le lalolagi i se auala lelei.

Ola ma Faasoa atu Ou Tulaga Faatonuina

Lona fa, ola ma faasoa atu ou tulaga faatonuina ia i latou o loo outou fegalegaleai. O le a oo mai luitau i le toatele o outou a o outou sailia ni galuega. E manaomia ia e atamai. O la’u fautuaga o le faailoa atu lea i pule o falefaigaluega e maualuga ou tulaga faatonuina lelei ma talafeagai, e aofia ai se tautinoga i lou aiga.

Sa ou aoaoina le taua o lenei mea i le amataga o la’u galuega. Ina ua uma la’u aoga i le Aoga Faaloia i Stanford, sa ou tulimatai atu loa e faigaluega i se ofisa loia faapitoa. E le i i ai ni tagata o le Ekalesia na faipaaga ma lenei ofisa, ae o ona loia o ni tagata e eseese uiga ma tomai. Ina ua uma ni faatalanoaga o le taeao, na ave a’u e le loia aupito sinia ma isi loia e toalua matou te fai ‘aiga i le aoauli. Na fesili mai le loia sinia pe ou te fia manao e inu se pia a o le i faia le matou meaai ona inu ai lea o se uaina mulimuli ane. Sa ou teena vaega uma e lua. Ma i lona toe fai mai faalua, sa ou ta’u atu ai ia te ia o au o se tagata malosi o le Au Paia o Aso e Gata Ai ma e ou te le inu ava malosi.

Sa ofo mai se galuega mo a’u i le kamupani, ma i ni nai masina mulimuli ane na tau mai ai e le loia sili ia te au, o le ofoina atu o le meainu malosi sa avea o se suega. Na ia iloa i la’u pepa o faamatalaga o loo tau manino atu ai sa ou auauna atu i se misiona a le Au Paia o Aso e Gata Ai. Sa tonu ia te ia e na te faafaigaluegaina au pe afai ou te faamaoni i aoaoga a la’u lava lotu. Na ia manatu o se mataupu taua o le amio ma le faamaoni.

Sa ou iloa i tausaga sa ou i ai i San Francisco, Kalefonia, ISA, e mumusu nisi tagata o le ekalesia e iloa e a latou paaga o i latou o ni tagata o le Au Paia o Aso e Gata Ai. E masani lava, ona aafia i latou i ni tulaga fetuutuunai semanu e mafai ona aloese ai, pe ana latou ta’u sao atu mea na latou talitonu i ai.

Ia Avea o se Malamalama

O le mea mulimuli, ia avea o se malamalama i tagata i le mea o loo e aumau ai. Ina ua avea i ma’ua ma lou toalua o se ulugalii fou faatoa amata i le Eria o San Francisco Bay i le ogatotonu o le 1960, sa matua toalaiti le aofai o tagata o le Au Paia o Aso e Gata Ai. E le gata i lea, sa avea le Eria o le Faga o San Francisco ma se nofoaga faatosina mo fualaau faasaina ma isi tulaga faatautala uma ma le agasala. Sa fesili se peresitene popole o le siteki i lena taimi i le au taitai o le Ekalesia pe tatau i taitai o le Ekalesia ona fautuaina tagata o le Ekalesia e nonofo ai pea i le Eria o le Faga o San Francisco.

Sa tofia Peresitene Harold B. Lee (1899–1973), lea sa sui sinia o le Korama a Aposetolo e Toasefululua i lena vaitaimi, e taulimaina lea mataupu. Sa feiloai o ia ma se vaega o taitai perisitua ma sa tau atu ia i latou e le i musuia e le Alii le fausiaina o se malumalu i lo latou eria, ae o ese mai tagata o le ekalesia. O lana fautuaga ia:

Fausia Siona i o tatou loto ma aiga.
Ia avea o se malamalama ia i latou o loo tatou nonofo.
Taulai atu i sauniga ma mataupu faavae o loo aoaoina i le malumalu.

Afai tatou te mulimuli i fautuaga a Peresitene Lee i le aso, o le a mafai ona tatou ola manuia i le lalolagi a e le o ni ō le lalolagi.

I le aluga o o tatou olaga o le a tatou feagai ma le tele o luitau faalelalolagi. O se tasi o nei luitau o le iloaina lea e le o malamalama [tagata] i le Ekalesia ma ona aoaoga, ma o nisi foi taimi e faauiga sese ai. I nai tausaga ua mavae na oo mai ai se valaau mai ia Elder M. Russell Ballard o le Korama a Aposetolo e Toasefululua, i tagata o le Ekalesia e tatala atu o latou finagalo ia lagona o latou leo mo le puipuiga o le faatuatuaga ma faasa’o ai ni faamatalaga sese. Na ia faama’oti mai e matua taua lava lo tatou faaaogaina o le “‘new media [ala fou o faasalalauga],’ lea ua maua mai e ala i le Initoneti.”¹² I se lalolagi ua tele ai fesootaiga eseese faatasi ma tagata o le ekalesia ua salalau i le lalolagi atoa, o loo manaomia ai le tali atu o tagata o le Au Paia o Aso e Gata Ai ma puipuia mai i faamatalaga le talafeagai ma le le sao pe a tupu, e uiga i le Ekalesia. Tatou te faafetai mo mea ua tulai mai talu le tusiga a Elder Ballard, ma e ou te toe ta’ua lana lu’i.

Ou te mautinoa e mafai ona tatou maua le fiafia lea tatou te manaomia ma o loo finagalo ai foi le Atua mo i tatou. O lau tatalo ia tatou tulimatai atu i le ala moni o le fiafia i o tatou aiga ma galuega, o le a faaaogaina lo tatou malamalama ma faatosinaga e toe aumai ai le amiotonu sili, filemu, malamalama, ma le saolotoga i tagata i le lalolagi atoa.

Ata na tusia e Robert Casey, Welden C. Andersen, ma John Luke