O Le Avea o Mataupu Faavae o le Uelefea o se Vaega o Lou Olaga

O le ola ai i mataupu faavae o le uelefea o le faatinoina lea o lo tatou faatuatua ia Iesu Keriso—e ala i le faaitiitia o aitalafu e le manaomia, ola i mea ua tatou maua, ma faia se tulaga o le teuina o meaai a le aiga ma teu se tupe faaleoleo, mo se faataitaiga. O lo tatou faatuatua e taitaiina i tatou ia aoaoina o tatou mafaufau ma lima e galulue i aso uma o o tatou olaga ia ola faalagolago ia i tatou lava. O le taulimaina o o tatou lava manaoga, o le a lelei ai lo tatou tausia o i tatou lava ma auauna atu i isi. Ia tatou mulimuli i fautuga e le na o le faia o le lelei ae ia taumafai ina ia lelei, e le na o le faia o le mea sili atu ae ia avea ma se e sili atu.¹ O le usiusitai i fautuaga a le Alii e aumai ai faamanuiaga faaletino ma le faaleagaga. E mafai ai ona tatou fetaiai ma luitau o le olaga ao faaauupegaina i le lototele ma le mautinoa nai lo le fefe ma le masalosalo.

Ua faamanatu mai ia i tatou e Peresitene Thomas S. Monson lo tatou tiute o le sii ae ma faamanuia atu i isi:

“Ou uso e ma tuafafine, ia tatou fesili ifo i tatou lava i lenei fesili … : ‘O le a se mea ua ou faia mo se tasi i le aso?’ Ia tuia o tatou agaga i upu o se viiga masani ma maua se nofoaga i totonu o o tatou loto:

“Ua ou faia ea se lelei i le aso?

Ua ou fesoasoani ea?

Ua ou faafiafia ea, i se ua faanoanoa?

A leai, ua le aoga.

Ua ou faamama i se ua mafatia

Ma faamafanafana i ai?

O e ua mamai, ua ou tausia ea?

Ma faainu ma fafaga i ai?

“O lena galuega lea ua valaauina i tatou uma i ai, o le galuega a le Alii o Iesu Keriso.”²

Faamatalaga

1. Tagai i le Robert D. Hales, “O Se Vaaiga a le Talalelei i le Uelefea: Faatuatua i Lona Faatinoga,” i le Mataupu Faavae Autu o le Uelefea ma le Ola Faalagolago o le Tagata ia te Ia Lava (tamaitusi, 2009), 1.

2. Thomas S. Monson, “O Le A Se Mea Ua Ou Faia mo Se Tasi i le Aso?” Liahona ma le Ensign, Nov. 2009, 87.

“Ia i latou uma e lagona mai lo’u leo, ou te tautino atu o le fuafuaga o le uelefea a Le Ekalesia a Iesu Keriso o le Au Paia o Aso e Gata Ai, e musuia mai e le Atua Silisiliese. Ioe, o le Alii o Iesu Keriso o lona Tusiata Mamanu ia. O loo geno mai o Ia ia te oe ma au, ‘Faauta, ou te tu atu i le puipui ma tu’itu’i atu; ai se tasi e faalogo mai i lo’u leo, ma tatala mai le puipui, ou te ulufale atu ia te ia’ (Faaaliga 3:20).

“Ina tatou faalogo atu ia i Lona siufofoga, ina tatou tatala atu ia o tatou loto ia te Ia, ma ina avea ia o Ia ma a tatou soa tumau a o tatou taumafai e tautuaina Ana fanau.”

Peresitene Thomas S. Monson, “O Le Ala a le Alii,” i le Mataupu Autu o le Uelefea ma le Ola Faalagolago o le Tagata ia te Ia Lava (tamaitusi, 2009), 13.

Ata na tusia e Jerry Garns