Savali a Faiaoga Asiasi
Faamalolosia o Aiga e ala i le Faalagolago o le Tagata ia te Ia Lava i le Faaletino
Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.
Faatuatua • Aiga • Toomaga
O le atiina ae o le faalagolago o le tagata ia te ia lava—o le gafatia e tausia ai i tatou lava ma o tatou aiga—o le tiutetauave lea o uso uma. E mafai ona tatou faalagolago ia i tatou lava pe a tatou aoao e fiafia e galulue, a o tatou sailia musumusuga e sue ai auala aupito sili e saunia ai mea mo i tatou lava, ma a o tatou galulue ma tagata o le aiga e taulima o tatou manaoga autu.
A oo ina tatou faalagolago ia i tatou lava, tatou te faaaogaina o tatou faamanuiaga ma punaoa e sauniuni ai ma taumamao ai mai faafitauli. Peitai, o le ola faalagolago o le tagata ia te ia lava, e faalauteleina pe a tatou tatalo mo le lototoa e taulima ai ma le faatuatua ia luitau o le a oo mai. O le ola faalagolago o le tagata ia te ia lava e mafai ai foi ona tatou faataunuu a tatou feagaiga e tausia isi tagata.
I le Aualofa, ua aoaoina ai i tatou i mataupu faavae ma tomai o le ola faalagolago o le tagata ia te ia lava. E mafai e uso ona aoao i le faiga o paketi, toomaga mai aitalafu, agavaa mo galuega, o tusitusiga paia ma le talalelei, aoao atu o isi ia faitau ma aoao, tekinolosi, soifua maloloina faaletino, malosi atoatoa, puipuiga ma le toe faaleleia mai mea ua fai ma vaisu, soifua manuia faaagafesootai ma faalelagona, puipuiga mai ma’i, faiga o togalaau, gaosiga ma le teuina o meaai, tapenaga mo faalavelave faafuasei, ma le tele o isi mea o le a fesoasoani tatou te ola faalagolago ai ia i tatou lava.1
Na faamatala e Julie B. Beck, le peresitene aoao o le Aualofa e faapea, “o le saunia o mea mo i tatou lava ma isi, o se faamaoniga lea o i tatou o soo o le Alii o Iesu Keriso. … Ina ua maliu faafuasei [le tina o lo’u toalua] i le tausaga ua tuanai atu nei, sa ia tuua ni faamaoniga o lona ola faalagolago ia te ia lava. Sa i ai sana pepa malumalu na aoga pea ma ni tusitusiga paia ua tuai i le faaaoga soo ma ni tusi lesona na suesue ai i le talalelei. Sa matou vaevaeina ma le alofa ana ulo, apa, ma ipu ia sa ia saunia ai le faitau afe o taumafataga. Sa ia tuua mo i matou ni ie soosoo na ia faia mai lavalava tuai. Sa talitonu o ia i le alagaupu anamua ‘Faaaoga ia uma le aoga, ofu seia masaesae, faaaoga le mea ua e maua, po o le ola foi e aunoa ma lena mea.’ Na matou vaaia le sapalai o meaai na ia totoina, tuufaguina, ma teuina. Na sili ona matou ootia i ana tamai tusitupe lea sa ia faamaumauina ai ma le faamaoni ana tupe faaalu i le tele o tausaga. Ona sa ola faautauta o ia o lea na ia tuua ai sina tupe, lea na ia sefeina mo mea e tutupu faafuasei ma na leai foi ni aitalafu na ia tuua! Ae o le mea aupito taua, sa ia aoaoina ma musuia le toatele o isi uso i tomai na ia maua i lona soifuaga faamaoni.2
Mai Tusitusiga Paia
Ioane 13:34–35; Iakopo 1:27; Mosaea 4:26; Mataupu Faavae ma Feagaiga 29:34–35; 38:30; 44:6
Mai lo Tatou Talafaasolopito
E galulue pea lava uso o le Aualofa i le galuega o le laveaiina o agaga i le faaletino ma le faaleagaga. O vaiaso taitasi pe a potopoto le Aualofa a Tamaitai o Navu, e lipoti atu e uso ia tagata e manaomia le fesoasoani. Sa faasafua atu foai o tupe, oloa, taleni, ma taimi e toomaga i ai ē le tagolima. O lea galuega faavae o le faamama avega i e puapuagatia ua faaauau pea e avea ma galuega a le Aualofa i augatupulaga.
Ina ua taunuu le Au Paia i le Vanu o Sate Leki, sa fautuaina e Peresitene Polika Iaga (1801–77) ia tuafafine ina ia fesoasoani ia i latou o loo manaomia le fesoasoani ma ia aoaoina tomai o le a mafai ai e i latou ona tausia i latou lava. Na ia saunoa, “Aoao ina ia iloa ona tausia outou lava; ia teuina falaoamata ma araisa, ma faasaoina mo aso leaga.”3 I lalo o le taitaiga a le perisitua, e faaauau pea e le Aualofa ona aoao atu le ola faalagolago o le tagata ia te ia lava, ia malupuipuia le aiga, ma ia uunaia le amiotonu o le tagata lava ia ma galuega o le alofa moni, o le alofa mama lea o Keriso.
Ata na tusia e Welden C. Andersen