Faamanuia e ala i le Perisitua
Virginia Gillis, Massachusetts, ISA
Sa ou auai i le Ekalesia o se tina nofofua i le 1996, i nai tausaga mulimuli ane talu ona auai lo’u uso masaga o Theresa. Ina ua papatiso Theresa, sa fai mai sa’u uo, “Aisea o le a manao ai o ia e auai i lena lotu? Latou te tuuina o latou fafine i le pito i tua.”
Mai i au fegalegaleaiga ma tagata o le Ekalesia, sa ou iloa ai e le sa’o le malamalama o la’u uo—o ulugalii sa ou vaai i ai i tagata o le Ekalesia o nisi e sili ona malolosi ma tulaga tutusa ua ou vaai i ai. Sa ou iloa e na o alii i le Ekalesia e umiaina le perisitua, ae na ou lagona latou te faaaogaina le perisitua ina ia manuia ai tagata uma.
Sa faamautinoa mai lena upumoni ia te au ina ua ou maua i le kanesa o le susu ina ua mavae tausaga e 11 o lo’u papatisoga. Ina ua ou faalogo i le tala, sa ou maua se uunaiga faaleagaga e tatau ona ou sailia se faamanuiaga faaleperisitua, lea na ou faia i lena afiafi. I le faamanuiaga, sa folafola mai ai o le a aluese le kanesa mai lo’u tino, ma o le a toe malosi atoa lo’u tino, ma o le a taialaina a’u fomai e le Agaga.
O le faamanuiaga muamua lena o le tele o le a ou mauaina i le isi tolu tausaga o togafitiga ma taotoga. Na ou maua ai le faatuatua e iloa ai o le a oo mai le malosi faaletino pe afai o le finagalo lea o le Alii po o le oo mai foi i le faaleagaga—ma o le a ou maua le malosi e taulima ai o’u tofotofoga.
Sa ou oo i le ituaiga lona lua o faamalologa i se tasi o po ina ua mavae se taotoga. Ou te manatua lo’u ala a’e i se tiga ogaoga lava. Ona oo mai lea o le manatu lenei i lo’u mafaufau: “Ua e iloa o le a e malosi. Sa folafola atu ia te oe o le a toe malosi atoa lou tino. Ua e iloa o le tulaga lea e te oo i ai.”
O se tasi taimi na ou ala a’e i le tuneva o le po ma sa ou popole i le lumanai. “O le a le mea o le a tupu ia te au?” Na ou mafaufau ai. Na umi se taimi na ou gatete ai, a e na o le pau lena o le taimi i le tolu tausaga o la’u tauiviga na ou popole ai faapena. O le filemu mai faamanuiaga faaleperisitua na ou maua, na lagolagoina ai au ma mafai ai ona ou oo i mea sa ou manatu e le mafai ona ou onosaia.
Na faaauau pea ona faamalosiauina au e le perisitua i se fula ma se fiva matautia ina ua mae’a lo’u taotoga. Sa sau so’u tuagane faaletulafono i se tasi po i le falemai, ma fai so’u faamanuiaga. Na maualuga lo’u fiva i le aso atoa, ae ina ua uma le faamanuiaga na tea malie atu ai lava. Sa ou maofa ae ou te le’i te’i ai.
Sa ou vaai i le faataunuuina o le folafolaga o le a taialaina o’u fomai. Ina ua ou ala ina ua maea se tasi o o’u taotoga, sa sau le fomai tipitipi e vaai au.
“Sa uma lelei,” o lana faamalamalama mai lea, “peitai na i ai se mea na ta’u maia ia te au e saili tele i le totonu, ma sa ou maua ai nisi o vaega na ai le faafitauli, lea na mafai ona ou aveesea mai. Ua laki ona ua maua uma.”
E le o ia o se tagata o le Ekalesia, peitai ua faataunuuina le folafolaga na ou muai maua. Na taialaina o ia e le Agaga.
Ou te faafetai mo i latou ua agavaa e umia le perisitua i la’u uarota ma lo’u aiga o e na aapa mai ia te au ma faaaogaina le perisitua e faamanuia ai lo’u olaga. Ou te faafetai mo o latou faletua o e o loo fesoasoani ma lagolagoina i latou a o faamamaluina o latou perisitua ma faaaogaina e faamanuia ai isi. O le mea aupito sili, ou te faafetai ua faamanuiaina i tatou e le Tama Faalelagi i Lona mana i le lalolagi, o se mana ua faamanuiaina ai Ana fanau uma lava.