Nai Otootoga o le Lalolagi
Tauaao Atu i le Palemia o le Atu Solomona le Folafolaga i le Aiga
Sa tauaaoina atu e le Ekalesia se kopi “O Le Aiga: O Se Folafolaga i le Lalolagi” (Liahona ma le Ensign, Nov. 2010, 128) i le palemia o le Atu Solomona, o Danny Philip, i se sauniga puupuu i le Aso Faraile, 21 Ianuari, 2011.
Sa feiloai ia Elder Dirk Smibert, le Fitugafulu Eria, ma isi sui o le Ekalesia i le maota o le palemia ma tauaao atu ia te ia le folafolaga faapea ma se faatagata o se aiga.
Fofoga Mai Aso o le Malumalu o El Salvador
Ua valaaulia e le Au Peresitene Sili o le Ekalesia ia tagata o le au paia ma tagata lautele e maimoa i le Malumalu o San Salvador El Salvador i le taimi o lona faletatala e faia mai i le Aso Faraile, 1 Iulai, 2011 e oo atu i le Aso Toonai, 23 Iulai, 2011, vagana ai Aso Sa.
O le a faia se faafiafiaga faaleaganuu i le Aso Toonai, 20 Aokuso, 2011, ona sosoo ai lea ma le faapaiaga o le malumalu i le aso e sosoo ai.
O Le Saite e Mafai ai e Tagata o le Ekalesia ona Faasoa atu Taleni e Fausia ai le Ekalesia
O le Fesoasoani i le Tovine, o se uepisaite fou a le Ekalesia ua fatuina e tuu i ai le anoano o galuega faatino volenitia e mafai ona fesoasoani i ai tagata o le Ekalesia. O galuega faatino e aofia ai faaliliuga, aoina mai o faamaumauga a le FamilySearch, puega o ata, faaigoaina o vitio ma ata, ma galuega faatonutonu, ma e maua mai i soo se nofoaga e mafai ona faaaoga ai le Initoneti.
Ua faamoemoe i latou na fatuina le Tovine, ia maua le 10,000 o tagata volenitia e lesitala ma auai i galuega faatino e faia i le initoneti i le 2011. E mafai e tagata o le au paia ona saini e auai ai i le vineyard.lds.org, e na o le Igilisi o loo maua ai i le taimi nei.
Tatala e le Fale Mataaga ia Faaaliga [Faatufugaga] Fou a Tamaiti
Ua tatalaina e le Fale Mataaga o Talafaasolopito a le Ekalesia i le Aai o Sate Leki, ni faaaliga fou se lua e faaali ai siosiomaga fatufatuai faaleaoaoga ma faatufugaga a tamaiti.
The Gospel Blesses My Life ua faaalia ai faatufugaga na saunia e tamaiti mai atunuu e 42 i le lalolagi atoa, ua faaalia ai le ala ua faamanuiaina ai o latou olaga e se malamalamaaga o le talalelei a Iesu Keriso.
A Book of Mormon Fiesta: A Latin American Celebration ua faaalia ai vaega fesootai e faamanatuina ai le talatuu o Latina i totonu o le Ekalesia ma faaalia ai tala e uiga i le au paia Latina Amerika.
Mo faamatalaga atili e uiga i faaaliga, asiasi i le churchhistorymuseum.org.