Siamani

E ui lava na amata le galuega faafaifeautalai i Siamani i le vaitau o le 1840, ae o le 1851 na papatisoina ai tagata e toalua na foliga mai o uluai tagata liliu mai ia. I lena lava tausaga, na malaga ai i Hamburg ia Peresitene Ioane Teila, o le sa avea ma se tasi o le Korama a Aposetolo e Toasefululua i lena taimi, e fesoasoani i le faatonutonuina o le faaliliuga o le Tusi a Mamona i le gagana Siamani. Sa faatulagaina se paranesi i Hamburg i le 1852, a e o le toatele o tagata na muai liliu mai na malaga atu i Iuta ona o sauaga. Na aofia ai ia Karl G. Maeser, lea na mulimuli ane avea ma peresitene o le Brigham Young Academy i Provo, Iuta.

Ina ua mavae le Taua Muamua a le Lalolagi, na matuai toatele tagata na liliu mai o le Ekalesia i Siamani, aemaise lava mai le 1921 i le 1925. Na vaeluaina le Misiona a Siamani i le Misiona a Siamani-Auseteria ma le Misiona a Suisi-Siamani. Na faatulagaina le Misiona a Siamani Sasae i le 1937. Na aveesea mai faifeautalai mai Siamani i le taimi o le Taua Lona Lua a le Lalolagi. Ina ua latou toe foi atu i le 1947, ua vaeluaina le atunuu e avea ma Siamani Sasae ma Siamani Sisifo. Ae ui i lea, na faaauau pea le galuega faafaifeautalai, ma o le aso 19 o Iuni, 1985, na faapaiaina ai le Malumalu o Freiberg Siamani i Siamani Sasae—o le uluai malumalu i se atunuu komenisi. Na faapaiaina le isi malumalu i le lua tausaga mulimuli ane, i Frankfurt, Siamani Sisifo. Na tuufaatasi le atunuu i le 1990.

O Le Ekalesia i Siamani
Tagata o le Ekalesia	38,204
Misiona	3
Siteki	14
Uarota ma Paranesi	173
Malumalu	2

Luga: O se vaaiga i Munich, Siamani. Lalo: O le Malumalu o Frankfurt Siamani, na faapaiaina i le 1987.

O le Malumalu o Freiberg Siamani, na faapaiaina i le 1985.

Na tuua e Karl G. Maeser lona atunuu moni o Siamani mo Iuta, ma taunuu ai i le 1860.

Siamani

Freiberg

Frankfurt

Berlin