Mauaina o se Vaaiga Mamao i le Ola Faalagolago o le Tagata ia te Ia Lava

E ono mafaufau le toatele o tagata o le ekalesia o le uelefea o se polokalama e fesoasoani ai i tagata o le ekalesia o loo i ai tulaga faigata le tumau. Peitai o le mafuaaga o le fuafuaga o le uelefea a le Ekalesia e sili atu le tele: e aofia ai foi le faalauiloaga o le ola faalagolago o le tagata ia te ia lava o se auala e ola ai. Na aoao mai Peresitene Thomas S. Monson o le ola faalagolago o le tagata ia te ia lava—“o le tomai, tautinoga, ma le taumafaiga ina ia maua mea e manaomia o le olaga mo ia lava ma le aiga”¹—o se elemene taua lea i lo tatou soifua manuia faaletino ma le faaleagaga.²

E le lava le na o le manao ia mafai ona ola faalagolago ia te ia lava. E tatau ona tatou faia se taumafaiga mataalia, ma lelei e maua ai mea tatou te manaomia ma mea e manaomia e o tatou aiga. Na faamanatu mai ia i tatou e Epikopo H. David Burton, o le Epikopo Pulefaamalumalu, pe a tatou faia mea uma tatou te mafaia ia tatou ola tutoatasi ai, “ona mafai lea ona tatou liliu atu i le Alii ma le mautinoa ma ole atu mo mea tatou te le gafatiaina.”³ O le ola faalagolago o le tagata ia te ia lava e mafai ai ona tatou faamanuia atu i isi. Na saunoa mai Elder Robert D. Hales o le Korama a Aposetolo e Toasefululua, “Ua na o le taimi lava tatou te ola faalagolago ai ia i tatou lava e mafai ai ona tatou faaa’oa’o moni i le Faaola i le auauna atu ma le faamanuiaina o isi.”⁴

O le ola faalagolago o le tagata ia te ia lava e aofia ai le tele o vaega o se olaga paleni, e aofia ai (1) aoaoga, (2) soifua maloloina, (3) galuega, (4) gaosiga ma le teuina o meaai i le aiga, (5) o mea tautupe a le aiga, ma le (6) malosi faaleagaga.

1. Aoaoga

Ua poloaiina i tatou e le Alii ina ia “saili i le aoao, e faapea foi i le suesue ma le faatuatua” (MFF 88:118). Na aoao mai Peresitene Gordon B. Hinckley (1910–2008): “Matou te talitonu i aoaoga. E uunaia e le Ekalesia lenei ia aoaoga. Ua faamauina i luga o tagata uma o lenei Ekalesia, o se poloaiga mai le Alii, ia maua aoaoga uma e mafai ona outou maua. … Ua faamauina i luga o le Au Paia o Aso e Gata Ai se poloai mai le Alii lava Ia ina ia aoao o tatou mafaufau ma lima.”⁵

O le mauaina o se aoaoga o le sini lena a Roberto Flete Gonzalez o le Ripapelika Tominika, o le na lesitala i le kolisi a o lei umi ona foi mai lana misiona. Sa malie lona tama e totogi le pili o le mea e nofo ai ina ia tulimatai atu Roberto i ana meaaoga, ae i se taimi mulimuli ane, na maliu le tamā o Roberto, ma tuua ai le aiga i se tulaga pagatia o mea tautupe.

Sa nofo Roberto mai le aoga ma amata ona faigaluega e tausi o ia, lona tina, ma lona tuafafine. Sa ia mafaufau pe o le a faapefea ona faauma ana aoga.

I nai vaiaso mulimuli ane, na fofoga mai ai e Peresitene Hinckley le Tupe Faaagaga mo Aoga, “o se taumafaiga matautia” lea o le a fesoasoani i tupulaga talavou i eria tau atia’e ia “o ese mai le mativa sa latou i ai faapea augatupulaga na muamua ia te i latou.”⁶ Na talosaga Roberto ma faamatuu mai ai se nonogatupe i le TFA, lea na mafai ai ona faaauau lana aoga. O lenei avanoa sa le gata ina fesoasoani i mea tau tupe sa vave manaomia, ae na fesoasoani foi ia Roberto ia maua le faatuatua e faaipoipo ai ma fausia se aiga e faavavau, aua na ia iloa o le a mafai ona ia tausia i latou.

Na faaiuina le aoga faafomai a Roberto a o avea o ia o se epikopo ma na avea ai ma uluai tagata o le Ekalesia sa i ai i le Au Faatonu o Aoga Faafomai a le Malo o Tominika. Ae o taunuuga silisili, na ia fai mai ai, sa i ai lea i le aiga. “Ua i ai ni suiga i lo’u aiga ina ua matou mamao ese nei mai le li’o o le mativa,” o lana tala lea. “Ou te faafetai o le a le oo lo’u atalii i lea lava tulaga na ou ola a’e ai aua ua matou o ese mai lena li’o.”

Mo nisi faamatalaga, asiasi i le vaega o le Education and Literacy i le providentliving.org ma asiasi foi i le besmart.com, o se uepisaite e fesoasoani i tagata talavou o le Au Paia o Aso e Gata Ai mo aoaoga e maualuluga atu.

“O mea moni uma lava e mafai ona tatou aoaoina a o tatou i ai i lenei olaga o le a tutu faatasi ma i tatou i le Toetutu. Ma o mea uma foi e mafai ona tatou aoaoina o le a faalauteleina ai lo tatou mana e auauna atu ai.”

Peresitene Henry B. Eyring, Fesoasoani Muamua i le Au Peresitene Sili, “Education for Real Life,” Ensign, Oke. 2002, 21.

2. Soifua maloloina

Ona ua foafoaina i tatou i le faatusa o le Atua (tagai i le Kenese 1:27), o o tatou tino o malumalu ma e tatau ona tausia lelei ma le faaaloalo (tagai i le 1 Korinito 3:16–17).

O le Upu o le Poto, o loo maua i le Mataupu Faavae ma Feagaiga 89, o le tulafono lea a le Alii o le soifua maloloina ma na faaalia ia Iosefa Samita i le 1833. O loo aoao mai ai e tatau ona tatou taumamafa i meaai lelei ma aloese mai mea e le lelei. Na aoaoina mai e aposetolo ma perofeta nei mea talu mai lena taimi, e tatau ona tatou tetee atu i mea po o faatinoga e faaleagaina ai o tatou tino ma mafaufau ma e ono taitaiina atu ai i le avea ma mea e fai ma vaisu.⁷

Na aoaoina e Sainimere Balenacagi o Fiti le lesona lenei i lona talavou a o ia auai atu i se faaipoipoga ma nisi o ana uo e le auai i le Ekalesia. O le toatele o tagata iina, e aofia ai ma uo a Sainimere, na inupia ma ulaula ma na valaaulia o ia e inu. “Sa aoaoina au i lou olaga atoa e ola i tulaga faatonuina o le talalelei, ma o lea sa ou teenaina le ofo e aunoa ma le faatuai,” o le tala lea a Sainimere.

Na ia iloaina o faamanuiaga o le pipiimau i le Upu o le Poto e sili atu nai lo le soifua maloloina faaletino: “Sa ou mauaina le puipuiga faaopoopo i le tulaga o le mafai lea ona ou faia ni filifiliga sili ona o le latalata mai o le Agaga Paia. E manino lava la’u vaai e le o tuuitiitia e tulaga faatonuina lo matou saolotoga; o loo puipuia i matou mai taunuuga lea e ono taitaiina atu ai i se saolotoga faatapulaaina.”

Mo nisi faamatalaga, tagai i le vaega o le Soifua Manuia Faaletino i le providentliving.org.

“E moni lava o o tatou tino faaletino o malumalu ia o le Atua. O lea la, e tatau ia te oe ma au ona mafaufau ma le faaeteete i mea tatou te tuuina i totonu o o tatou malumalu, mea tatou te tuuina i luga o tatou malumalu, mea tatou te faia i o tatou malumalu, ma mea tatou te faia ma o tatou malumalu.”

Elder David A. Bednar o le Korama a Aposetolo e Toasefululua, “Ye Are the Temple of God,” Ensign, Sete. 2001, 18.

3. Galuega

I le tele o uarota ma paranesi, o le mauaina o galuega o le manaoga aupito taua lea o loo feagai ma tagata o le ekalesia a o latou taumafai e ola tutoatasi. E mafai ona fesoasoani ia korama a le au perisitua ma tagata o le aufono a le uarota i nei tagata o le ekalesia. E tatau ona latou galulue vavalalata ma nei tagata, e faailoa atu i ai punaoa aoga o i ai i le lotoifale, avea o ni faufautua e mafai ona fesoasoani patino ia i latou e i ai manaoga, ma ni avanoa faigaluega o loo i ai. O le mana o tagata o le ekalesia e galulue faatasi i le faatuatua e faamanuia ai i latou e le tagolima, o le a tele lava ina taitaiina atu ai i se galuega faamanuiaina.

Ua faatuina e le Ekalesia, i nisi o eria o le lalolagi, ni nofoaga autu o punaoa mo galuega. I le taimi nei, e silia ma le 300 nofoaga autu i totonu o atunuu e 56 o loo ofoina atu ai le tautua e pei o mafutaga faaleaoaoga, fonotaga i upegafesootai, ma le fautuaina o tagata taitoatasi mo galuega. O le uepisaite fou a le Ekalesia LDSjobs.org o loo maua ai foi punaoa mo tagata e saili galuega, falefaigaluega, ma taitai o le Ekalesia.

Ina ua faamalolo Oséias Portinari o Pasila mai lana galuega, sa ia faaaluina le silia ma le lua masina e saili ai se galuega fou. I lona le mauaina o se galuega, sa ia filifili loa e ofo atu lona taimi i lo latou nofoaga autu o punaoa mo galuega i São Paulo. O lona fesoasoani i isi i a latou sailiga galuega na maua ai e Oséias se avanoa e faaleleia atili ai ona lava tomai mo faatalatalanoaga ma le sailia o galuega. Sa auai o ia mo ni nai taimi i le mafutaga faaleaoaoga mo matata eseese ma na iu ai lava ina avea o se faiaoga. I lona ofo tele, a o ia auauna atu ma le maelega i isi, sa vave ona maua e Oséias ni valaau mai fale faigaluega, ma oo atu ai i le mauaina o se galuega.

E faafetaia e Oséias ia punaoa a le Ekalesia lea e maua ai e tagata o le ekalesia e leai ni galuega se vaaiga sili atu i le olaga. Fai mai a ia, “Ou te iloa pe a tatou tuuina i ai se taumafaiga, e tatalaina e le Alii ia faitotoa.”

Mo nisi faamatalaga, asiasi i le LDSjobs.org, employment.lds.org, po o lo outou nofoaga autu e lata ane o punaoa mo galuega.

“Pau lava le mea o loo finagalo ai lo tatou Tama Falelagi, o lo tatou faia lea o le mea sili tatou te mafaia—ia tatou galulue e tusa ma lo tatou malosi atoatoa, pe o le a lava le tele po o le laitiiti foi e mafai ai.”

Peresitene Dieter F. Uchtdorf, Fesoasoani Lua i le Au Peresitene Sili, “O Mataupu Faavae e Lua mo Soo se Tamaoaiga,” Liahona ma le Ensign, Nov 2009, 56.

4. Gaosiga ma le Teuina o Meaai a le Aiga

Na faalauiloa mai e le Ekalesia i le 2007 se tamaitusi Ia Saunia Mea Tatau Uma: Teuina o Meaai a le Aiga, lea e tuuina mai ai se metotia faigofie i le teuina o meaai a le aiga. Ua fautuaina e le Au Peresitene Sili ia tagata o le ekalesia i le lalolagi atoa ina ia tulimatai atu i le i ai o se sapalai masani o meaai ma vai ma sina tupe e teuina. E mafai e tagata o le ekalesia ona amata i le faatauina o ni nai mea faaopoopo ma tuu ese sina tupe laitiiti i vaiaso taitasi pe a mafai. O le mulimuli i lenei mamanu i le aluga o taimi, o le a mafai ai e tagata o le ekalesia ona faavaeina se sapalai o meaai e teuina a le aiga ma se tupe faaleoleo e talafeagai mo mea latou te manaomia.⁸

Ina ua latou iloa lenei fautuaga, na musuia le aiga o Lugo i Valencia, Venesuela e amata ona teuina meaai a lo latou aiga. Sa amata ona latou tuueseina i vaiaso taitasi se vaega laitiiti o meaai, vai, ma se tupe. E iu lava i le le lava o la latou faasoa, ae sa mafai lava ona latou faaputuina se vaega talafeagai ina ua mavae ni nai masina. I le faaiuga o lena tausaga sa i ai se solo tetee a tagata faigaluega i Venesuela ma na lamatia ai galuega a tagata o le eria. O Uso Omar Lugo o se tasi o i latou na iu ina leai ni galuega.

Sa toeitiiti lava atoa le lua tausaga o saili e Uso Lugo se galuega fou. I lena taimi, sa ola Uso Lugo ma lona aiga ia latou tupe teu ma meaai na latou teuina. E ui i luitau faigata o le leai o se galuega, na lagona lava e le aiga o Lugo le toafilemu ma le mafanafana aua sa saunia i latou. Sa latou faafetaiaia ma le lototele le lumanai le mautinoa, ma le iloaina sa latou mulimuli i fautuaga ia faasolosolo malie ona teu a latou meaai i le fale.⁹

Mo nisi faamatalaga, asiasi i le vaega o le Teuina o Meaai a le Aiga i le providentliving.org po o le tagai foi i le tamaitusi Ia Saunia Mea Tatau Uma: Teuina o Meaai a le Aiga.

“O le polokalama fou lenei [teuina o meaai a le aiga] e mafai lava ona fai e tagata uma. O le laasaga muamua lava o le amata. O le lona lua o le faaauau ai pea. E le afaina pe o le a le vave tatou te ausiaina ai, ae tau lava o le amata ma faaauau ai lava e tusa ai ma mea tatou te gafatia.”

Bishop H. David Burton, O Le Epikopo Pulefaamalumalu, i le “Teuina o Meaai a le Aiga: O Se Savali Fou,” Liahona, Mat. 2009, 14; Ensign, Mati 2009, 60.

5. O Mea Tau Tupe a le Aiga

O le isi vaega o le ola fuafua lelei mo le lumanai o le puleaina ma le atamai o tupe maua ma tupe faaalu. Na fautua mai le Au Peresitene Sili:

“Matou te uunaia outou ina ia faautauta i a outou tupe faaalu; ia pulea lelei outou lava i a outou faatauga ina ia aloese ai mai le aitalafu. …

“Afai ua totogi au aitalafu ma ua i ai se tupe faaleoleo mo le lumanai, e tusa lava pe laitiiti, o le a lagona e oe ma lou aiga le faateleina o le saogalemu ma ‘ae’ae ai i le filemu sili i o outou loto.”¹⁰

O le manuia o mea tautupe a le aiga e amata i le totogiina o sefuluai ma taulaga. Pe a faamuamua e tagata o le ekalesia le Alii, ona mafai lea ona latou tausia i latou lava faapea ma isi.

O le isi vaega o le pulea manuia o mea tautupe e aofia ai le iloa o au tupe maua ma tupe faaalu ma le puleaina o tupe nai lo le tuu o tupe e pulea oe. Ina ua faia e Devon ma Michaela Stephens o Arisona, ISA, se paketi, sa le i manino i laua i le aofai o tupe na la faaaluina i masina taitasi. A e o le faavaeina o se paketi ma ni vaega faapitoa na fesoasoani lea ia i laua “e o ese mai ai i ao a e o mai i lalo i le fogaeleele,” o le tala lea a Michaela. Sa faapopoleina i maua ina ua iloa e itiiti a ma tupe nai lo le mea na ma mafaufauina, ae sa faagaeetia malosi foi i le lagonaina faafuasei e mafai ona tatou pulea ma le mausali mea ua tatou maua.”

Mo nisi faamatalaga, asiasi i le vaega O Mea Tautupe a le Aiga i le providentliving.org po o le tagai i le tamaitusi Ia Saunia Mea Tatau Uma: O Mea Tautupe a le Aiga.

“O i tatou uma lava ua nafa ma le saunia o mea mo i tatou lava ma o tatou aiga, i mea faaletino ma le faaleagaga. O le tuuina atu ma le faautauta o mea e manaomia, e ao ai ona tatou ola i mataupu faavae o le ola faautauta po o le faasoasoa tatau: o le ola fiafia i mea ua tatou maua, o le faamalieina i mea ua tatou maua, aloese mai le soona fai o aitalafu, ma ia faaputuputu ma le filiga ma saunia mo faalavelave faafuasei i aso leaga.”

Elder Robert D. Hales o le Korama a Aposetolo e Toasefululua, “Ia Avea ma E Tuuina Atu ma le Faautauta Mea e Manaomia Faaletino ma le Faaleagaga,” Liahona ma le Ensign, Me 2009, 8.

6. Malosi Faaleagaga

E taua le tulaga faaleagaga i lo tatou soifua manuia faaletino ma le faavavau. Tatou te oo uma lava i tofotofoga. O le taumafai e faateleina lo tatou faaleagaga o le a fesoasoani i lo tatou feagai ai ma nei tofotofoga ma aumaia ia i tatou le faamoemoe mo ni aso e sili atu.

O Nirina Josephson-Randriamiharisoa o Madagascar o loo nofo nei i Farani a o tulitulimatagauina ana aoaoga. Ina ua ia faatoa taunuu, sa ia tauivi ma le lagona tuua toatasi ma le toe fia foi i le aiga. “Sa ou saili mo se faamafanafanaga e ala i le tatalo, faitauina o tusitusiga paia, ma musumusuga lemu a le Agaga Paia,” o le tala lea a Nirina. “Na faalatalataina atili au e nei mea i le Tama Faalelagi ma le Faaola, ma sa ou lagonaina ai le filemu.”

E le i leva ae faia loa e Nirina ni uo ma auai atu i gaoioiga i totonu ma fafo atu o le Ekalesia ma na ia mauaina le fiafia. A e o ni tala faanoanoa mai lona aiga na luluina ai lona lalolagi. “Sa ou mauaina i se tasi taeao se feau na ta’u mai ai ua maliu lo’u tuagane. Ou te le i manatu ou te lagonaina sea ituaiga faanoanoa. I aso ma vaiaso na sosoo ai, sa ou tauivi ai i taimi o le tuua toatasi, ita, ma le leai o se faamoemoe. O le faia o se mea e sili ona taua o ni luitau ogaoga ia.”

O ni nai masina mulimuli ane, sa maliu ai foi sa’u uo mamae. Na faateleina e lenei faanoanoa faaopoopo le avega mamafa sa i ai ia Nirina. Na mafaufau Nirina mo sina taimi o le a le toe alu i le lotu, ae na ia toe manatuaina o mea lava e tasi ia na fesoasoani ia te ia i ona faafitauli muamua e mafai ona toe faamalosiauina o ia i le taimi nei.

“Faapei ona ou faia ina ua ou faatoa siitia atu i Farani, sa ou saili le toafilemu i le tatalo, faitauina o tusitusiga paia, ma le Agaga Paia. Sa ou mauaina ma le malosi e ala i nei mea, o le Agaga ma aoaoga faavae o aiga e faavavau e mafai ona aumaia ia i tatou le toafilemu ma o le Togiola a Iesu Keriso e i ai se aafiaga moni lava i o tatou olaga,” o lana tala lea.

“Po o a lava tofotofoga tatou te feagai, e ‘le tapunia faitotoa’ a le Alii. O Lana fuafuaga o le fuafuaga o le fiafia.”

“O se molimau malosi e aumaia ai le filemu, mafanafana, ma se faamautinoaga. Na te fatua’ia le talitonuga maumaututu e faapea, a usitaia pea lava pea ia aoaoga a le Faaola, o le a matagofie le olaga, mautu le lumanai, ma o le a tatou maua le gafatia e faatoilalo ai luitau e faasalaveia lo tatou ala. E tupu se molimau mai le malamalama i le upumoni, e faasolosolo mai e ala i le tatalo ma le mafaufau loloto i aoaoga faavae faatusi paia. E faateleina e ala i le ola ai i na upumoni faatasi ai ma le faatuatua e taulaina i le mautinoa maumaututu, o le a maua lava taunuuga folafolaina.”

Elder Richard G. Scott o le Korama a Aposetolo e Toasefululua, “O Le Mana e Liua ai o le Faatuatua ma Uiga Tauleleia,” Liahona ma le Ensign, Nov. 2010, 45,46.

Mo nisi faamatalaga e uiga i le ola faalagolago o le tagata ia te ia lava ma le ola fuafua lelei mo le lumanai, tagai i le O Le Faia i le Ala a le Alii: O Le Otootoga o le Taiala a se Taitai i le Uelefea, o loo maua i le tele o gagana i le providentliving.org.

Faamatalaga

1. O Le Faia i le Ala a le Alii: O Le Otootoga o le Taiala a se Taitai i le Uelefea (tamaitusi, 2009), 1.

2. Tagai i le Thomas S. Monson, “O Mataupu Taiala o Filifiliga Patino ma Faaleaiga,” Liahona, Fep. 1987, 3; Ensign, Sete. 1986, 3.

3. H. David Burton, “O Le Faamanuiaga o le Galue,” Liahona, Tes. 2009, 37; Ensign, Tes. 2009, 43.

4. Robert D. Hales, “O Se Vaaiga a le Talalelei i le Uelefea: Faatuatua i Lona Faatinoga,” i le Mataupu Faavae Autu o le Uelefea ma le Ola Faalagolago o le Tagata ia te Ia Lava (tamaitusi, 2009), 2.

5. Teachings of Gordon B. Hinckley (1997), 724.

6. Gordon B. Hinckley, “O Le Tupe Faaagaga mo Aoga,” Liahona, Iulai 2001, 62; Ensign, Me 2001, 52.

7. Tagai, mo se faataitaiga, Russell M. Nelson, “Ulufia po o le Saolotoga,” Liahona, Ian. 1989, 6; M. Russell Ballard, “E O Le Togafiti Poto a Le ua Leaga,” Liahona ma le Ensign, Nov. 2010, 108.

8. Tagai Ia Saunia Mea Tatau Uma: Teuina o Meaai a le Aiga, (tamaitusi, 2007).

9. Tagai “Teuina o Meaai a le Aiga: O Se Savali Fou,” Liahona, Mati 2009, 12–13; Ensign, Mati 2009, 58–59.

10. Ia Saunia Mea Tatau Uma: O Mea Tautupe a le Aiga (tamaitusi, 2007).

“Pe a tatou anapopogi, … tatou te lagonaina le fiaai. Ma, mo se sina taimi puupuu lava, tatou te tuuina moni ai i tatou lava i le tulaga o le tagata fiaai ma le le tagolima. A o tatou faia faapea, ua ia i tatou se malamalamaaga tele i lagona o le le maua o se mea lea atonu o loo latou lagonaina. Pe a tatou tuuina atu i le epikopo se foai e tuumama ai mafatiaga o isi, ua le gata ina tatou faia se mea lelei mo isi, ae ua tatou faia foi se mea matagofie mo i tatou lava.”

Elder Joseph B. Wirthlin (1917–2008) o le Korama a Aposetolo e Toasefululua, “O Le Tulafono o le Anapogi,” Liahona, Iulai 2001, 90; Ensign, Me 2001, 73.

Agavale i le pito: O tamaiti aoga a le Au Paia o Aso e Gata Ai o loo tulitulimatagauina a latou aoaoga, ina ia saunia lelei ai e fetaiai ma tulaga faigata o le lalolagi faatautauva i lenei vaitaimi. Agavale: O le faamalositino ma taumafa tatau o ni vaega taua lea o le tausia lelei ma le faaaloalo o o tatou tino.

Ua iloa e Sainimere Balenacagi ia faamanuiaga faaletino ma le faaleagaga e maua mai i le mulimuli i le Upu o le Poto.

Luga, mai le agavale: ata na tusia e John Luke, Israel Antunes, ma Craig Dimond

Luga: O se tamaitai talavou o loo fesoasoani atu i ai le nofoaga autu o punaoa mo galuega i Mekisiko. Luga: Fai mai Oséias o le nofoaga autu o punaoa mo galuega i São Paulo, Pasila, “e maua ai e tagata o le ekalesia e leai ni galuega se vaaiga sili atu i le olaga.”

E galulue faatasi aiga i le Ripapelika Temokalasi o Congo e toto le kasava o se meaai autu ma faaaoga ona aa e maua mai ai le falaoamata e faaaoga i aso taitasi ma teuina i se taimi umi.

Luga agavale: ata na tusia e Welden C. Andersen; luga taumatau: ata na pueina e Howard Collett

Fai mai Devon ma Michaela Stephens o le faia o se paketi na fesoasoani ia i laua i le “puleaina mausali” o a laua tupe.

Ua iloa e Nirina Josephson-Randriamiharisoa o le ola ai pea e le aunoa i le talalelei e mafai ona siitiaina i tatou i luga e oo lava i taimi e sili ona faigata.

Luga: ata na tusia e Robert Casey