Reni i ni‘a i te Reni
Te Parau Haapiiraa e te mau Parau Fafau 76:22-24
Te faaite nei teie mau irava i te hoê iteraa no teie nei tau no ni‘a ia Iesu Mesia: te ora nei Oia !
« E i teie nei, i muri mai i te mau parau faaite e rave rahi o tei horo‘ahia no’na ra, o teie ho‘i te parau faaiteraa hopea roa ra, o ta maua e faaite atu nei no’na ra; Oia ho‘i te ora nei oia »
23 No te mea ua ite mata’tura maua ia’na, i te pae atau hoi no te Atua; e ua faaroo maua i te reo i te faaiteraa mai e o Oia Ana‘e te Fanau Tahi ra no te Metua —
Na’na, e na roto ia’na, e no’na ho‘i, te mau ao e hamanihia nei e i hamanihia na ho‘i, e te mau taata ho‘i no reira e mau tamaiti e e mau tamahine fanau ho‘i ratou no te Atua ra.
Mau Iteraa Papû e rave rahi
E rave rahi mau iteraa papû tei horo‘ahia no ni‘a i te Mesia tei ti‘a-faahou hou teie nei heheuraa. Teie te tahi mau hoho‘a:
-
Maria i Magadala (a hi‘o Ioane 20:11-18)
-
Te mau Aposetolo no te tau o Iesu (a hi‘o Mataio 28:9-20 ; Mareko 16:14-20 ; Luka 24:36-53 ; Ioane 20:19-29 ; 21)
-
Na pĭpĭ e piti i ni‘a i te poromu no Emausa (a hi‘o Luka 24:13-35)
-
Setephano (a hi‘o Te Ohipa 7:55-56)
-
Paulo (a hi‘o Te Ohipa 9:1-6)
-
Te Ati Nephi (a hi‘o 3 Nephi 11-28)
-
Moroni (a hi‘o Etera 12:39)
-
Iosepha Semita (a hi‘o Iosepha Semita – Aamu 1:16-20)
Te Ora nei Oia !
Ua tai‘o vau – e ua ti‘aturi au – i te mau iteraa papû o te feia tei ite i te mauiui o te Faasatauro-raa-hia te Mesia e te oaoa no To’na Ti‘a-faahou-raa. Ua tai‘o vau – e ua ti‘aturi au – i te mau iteraa papû o te feia i roto i te Ao Api tei farereihia e taua iho â Fatu ra tei ti‘a-faahou.
« Te ti‘aturi nei au i te iteraa papû o te hoê tei paraparau, i roto i teie tau tuuraa evanelia, i te Metua e te Tamaiti i roto i te hoê uru raau tei parauhia i teie nei e vahi mo‘a e tei horo‘a i to’na iho ora, ma te taati i taua iteraa papû ra i to’na ra toto ».
Peresideni Thomas S. Monson, « Ua Ti‘a faahou Oia ! » Liahona, Me 2010, 89.
Te mau Ao e Vai nei e tei Hamanihia
« I raro a‘e i te arata’iraa a te Metua, ua riro te Mesia te Fatu no te ao nei, tei hamani i te mau ao aore e hope ia tai‘ohia no roto mai ho‘i to tatou ao (a hi‘o Ephesia 3:9 ; Hebera 1:2).
« E fea rahiraa palaneta e taata to ni‘a iho e vai nei i roto i te ao ? Aita tatou i ite, e ere râ o tatou ana‘e i roto i te ao nei ! E ere te Atua te Atua no te hoê noa iho palaneta ! »
Elder Neal A. Maxwell (1926-2004) no te Pŭpŭ no te Tino Ahuru ma Piti Aposetolo, i roto i « Te mau Ite Taaê no te Mesia », Liahona, Eperera 2001, 5.
E mau Tamaroa e mau Tamahine Fanauhia e te Atua
« E ere outou e mau taata noa, e to’u mau hoa apî here na te ao taatoa nei. E mea hanahana e e mea mure ore outou. …
« O ta’u ïa pure e ta’u haamaitairaa e ia feruri ana‘e outou i ni‘a ia outou iho, ia nehenehe ia outou ia hi‘o na ni‘a’tu i te mau paruparu e te mau feââraa e ia ite e o vai mau râ outou : e mau tamaroa e e mau tamahine hanahana na te Atua Mana Hope ».
Peresideni Dieter F. Uchtdorf, Tauturu Piti i roto i te Peresideniraa Matamua, « Te Anapanaparaa i roto i te Pape » (Pureraa Pae Auahi na te Feia Apî Paari no te Faanahoraa Haapiiraa a te Ekalesia, 1 no Novema, 2009); e vai nei i te CESfiresides.lds.org.
Hoho‘a no roto mai i te Ua Ti‘a faahou Oia, na Del Parson