Aita vau i anaanatae i te Ekalesia
Tanintoa Sexton, te mau taa motu no Marshall
Aita vau i hinaaro ia faaroo i te hoê parau no te Ekalesia a ani ai ta’u vahine faaipoipo e nehenehe anei i te mau misionare ia haapii i ta maua mau tamaroa. Aita râ vau i parau aita no te mea e melo a‘e na oia no te Ekalesia.
I te haamataraa te mau misionare e haere mai i to matou fare e piti taime i te hebedoma, ua haere atu ïa vau i te fare o to’u hoa i piha‘iho noa. E melo puai to’u hoa no te tahi ekalesia keresetiano ê atu. I te mau taime atoa ua haere au ia’na ra, ua hinaaro oia i te paraparau no ni‘a i te Bibilia. Ua parau vau ia’na e aita vau i anaanatae i taua mau mea ra e aita vau i hinaaro i te haapii no ni‘a i te faaroo. Ua tamau noa râ oia i te tamata i te marô ia’u e i te pae hopea ua parau vau ê. No reira ua haapii au no te hoê taime roa no ni‘a i te Bibilia e to’u hoa a haapii noa’i te mau misionare i ta’u mau tamaroa.
I te hoê mahana ua tae i te hora e haere mai ai te mau misionare i to matou fare. Aita râ vau i haere ê atu, ua faaoti au e faaea noa i roto i te tahi atu piha. A haamata ai te mau misionare i te haapii i ta’u mau tamaroa, ua ite a‘e na vau e ua hinaaro vau i te faaroo atu â. Ua tapiri atu vau i te opani no te faaroo maitai atu. Te haapii ra raua i ta’u mau tamaroa no ni‘a i te mau aposetolo e te mau peropheta.
Ua ite a‘e na vau i muri iho e ua hinaaro vau i te haapii atu â. Ua paraparau vau i te mau misionare e ua faaoti a‘e na vau i te farii i te mau haapiiraa i piha‘iho ia raua – o vau ana‘e ra. Tei reira noa ta’u vahine faaipoipo, aita râ e taata ê atu tei ite i te reira.
No reira, ia haere ana‘e mai te mau misionare e haapii i ta’u mau tamaroa e piti taime i te hebedoma, e haere ïa vau i te fare o to’u nei hoa. E i muri iho, i te tahi mahana ê atu, e haapii ïa raua ia’u nei.
I te hoê mahana a parau ai to’u hoa i te tahi parau ino no ni‘a i te Ekalesia, ua paruru vau i te Ekalesia. Mai te mau taata e rave rahi i te mau Taa Motu no Marshall, aita to’na ite i rahi no ni‘a i te Ekalesia e ua hape to ratou ite no ni‘a i te tahi mau mea ta te Feia Mo‘a i te mau Mahana Hopea e ti‘aturi nei. I to’na parauraa i te tahi atu â mau mea ino, ua paruru faahou vau i te Ekalesia.
Ua na reira noa e hitu ava‘e te maoro. E i te hoê mahana ua ite au e ua haapapû te Varua Maitai ia’u e, e parau mau te mau mea atoa ta te mau misionare i haapii mai ia’u. Ua ite au e ua ti‘a ia’u ia bapetizohia, noa’tu e mea iti to’u iteraa no ni‘a i te evanelia.
I muri a‘e i to’u bapetizoraa i te matahiti 2007, ua oaoa roa vau. Ua haamata matou i te haaputu i te moni no te haere i te Hiero i Hawaii, i reira ta’u vahine faaipoipo, ta maua na tamarii e toru, e o vau nei i taatihia’i i te ava‘e titema 2008.
Ua riro to’u riroraa ei melo no te Ekalesia ei haamaitairaa rahi roa i ni‘a i to’u nei oraraa. Ua faaoti au i te faaru‘e i te piti o ta’u ohipa faare‘are‘araa i roto i te hoê fare tamaaraa no te mea e ho‘i maoro mai au i te fare e e î roa to’u mau ahu hiero i te auauahi avaava. Noa’tu ua ere matou i taua moni taaê ra, ua haapa‘o râ te Fatu ia matou.
Ua ite au e e parau mau te Ekalesia e e peropheta o Iosepha Semita na te Atua no te Varua ta’u i ite e te mau haamaitairaa ta’u i farii.