Te tumu o te Sotaiete Tauturu

A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.

Faaroo • Utuafare • Tamahanahana

I te taime matamua a piihia’i to matou peresideniraa, ua horo‘ahia ia matou te tahi mau materia no ni‘a i te aamu no te Sotaiete Tauturu. Ua tai‘o matou i te reira na roto i te pure, ma te hinaaro i te ite i te tumu no te Sotaiete Tauturu e i te mea ta te Fatu e hinaaro ia matou ia rave. Ua haapii mai matou e te tumu no te Sotaiete Tauturu mai tei haamauhia e te Fatu o te faanahoraa ïa, te haapiiraa, e te faaururaa i Ta’na mau tamahine no te faaineine ia ratou no te mau haamaitairaa no te ora mure ore.

No te faatupu i teie tumu o te Sotaiete Tauturu, ua faaue te Fatu i te tuahine tata’itahi e te pŭpŭ taatoa ia:

Faarahi i te faaroo e te parau-ti‘a o te taata iho

Haapuai i te mau utuafare e te mau nohoraa.

A horo‘a i te tauturu na roto i te taviniraa i te Fatu e i Ta’na mau tamarii.

E nehenehe ta tatou e rave i teie ohipa na roto i te rave‘a a te Fatu ia imi ana‘e tatou, ia farii e ia rave ana‘e tatou mai te au i te heheuraa ta tatou iho e farii. Eita ta tatou e nehenehe e manuïa mai te mea aita e heheuraa i te taata tata’itahi. Mai te mea e faaroo tatou i te heheuraa, eita ïa tatou e ore e manuïa. Ua haapii mai te peropheta Nephi ia tatou e e faaite mai te Varua Maitai ia tatou « te mau mea atoa ta [tatou] e rave » (2 Nephi 32:5). E ti‘a ia tatou ia faati‘a ia tatou iho ia parahi mamu noa e ma te hau no te faaroo i te reo o te Varua.

E te mau Tuahine, e ohipa faufaa rahi ta tatou i te tautururaa i te patu i te basileia o te Atua e i te faaineineraa no te taeraa mai o te Fatu. Oia mau, eita te ohipa a te Fatu e nehenehe e rave faaotihia ma te tautururaa ore a Ta’na mau tamahine. No reira, te tia’i nei te Fatu e ia faarahi tatou i ta tatou ô. Te hinaaro nei Oia ia tatou ia faatupu i te tumu o te Sotaiete Tauturu.

Julie B. Beck, Peresideni rahi no te Sotaiete Tauturu

No roto mai i te mau papa‘iraa mo‘a

Deuteronomi 6:5–7 ; Luka 10:30–37 ; Iakobo 1:27 ; 2 Nephi 25:26 ; Mosia 3:12–13

No roto mai i To Tatou Aamu

I te hoê rururaa a te Sotaiete Tauturu i te 9 no Tiunu 1842, ua haapii te Peropheta Iosepha Semita i te mau tuahine e ta ratou sotaiete « e ere noa ïa no te tauturu i te feia vêvê, no te faaoraraa râ i te mau varua ».¹ Ua riro teie faahitiraa no te hoê tumu pae varua e te pae tino atoa ei taipe no te Sotaiete Tauturu i roto i te roaraa o to’na ra aamu. I te matahiti 1906 ua haapii te Peresideni Joseph F. Semita (1838-1918): « Aita te [Sotaiete Tauturu] e haapa‘o noa i te mau mea hinaarohia e te feia vêvê, te feia ma‘i e te feia tei roto i te fifi, te hoê ra tufaa no ta’na ohipa – e te tufaa rahi a‘e – o te haapa‘o-atoa-raa ïa i te oraraa varua e te faaoraraa o te mau metua vahine e te mau tamahine no Ziona; ia ara e ia ore te hoê e tau‘a-ore-hia, ia paruruhia râ te taatoaraa i te manuïaraa ore, te ati, te mau mana no te pouri e te mau ino e faaruru nei ia ratou i roto i te ao nei ».² I te matahiti 2001 ua haapapu faahou mai o Elder M. Russell Ballard no te Pŭpŭ no te Tino Ahuru ma Piti Aposetolo, « Te mau tuahine atoa i roto i teie Ekalesia tei rave i te mau fafauraa e te Fatu, e faaueraa hanahana ïa ta ratou no te tauturu i te faaora i te mau varua, no te arata’i i te mau vahine no te ao nei, no te haapuai i te mau utuafare no Ziona, e no te paturaa i te basileia o te Atua ».³

Faahoho‘araa na Christina Smith