I roto i te Mau Parau Apî
Ua Faatia o Elder Perry i te Tĭtĭ Matamua i Guam
Ua ratere atu o Elder L. Tom Perry no te Pŭpŭ no te Tino Ahuru Ma Piti Aposetolo i Guam i te ava‘e titema 2010 no te faati‘a i te Tĭtĭ no Barrigada Guam, te tĭtĭ matamua i roto i te fenua no Guam. Ua haere atoa o Elder Perry, o tei tavini na i roto i te nuu Ihitai no te Mau Hau Amui no Marite i roto taua pae fenua ra i te Tama‘i II o te ao nei, e mata‘ita‘i i te fare manaha no te Tama‘i no Patifita e te motu tapiri ra o Saipan. E 1971 melo o te Ekalesia e ora ra i Guam. E tuhaa te fenua Guam no te Area no Asia Apatoerau o te Ekalesia.
Te Rapaau nei te mau Taote a te Ekalesia i te ma‘i Hi toto i Papûa Nouvelle Guinée
Ua tae atu te tahi mau taote a te Ekalesia, no Auteraria mai, no te rapaau i te feia i ma‘ihia i te ma‘i hi toto i roto i te hoê oire atea rii i te pae apatoerau tooa o te râ no Papûa Nouvelle Guinée i te pae hopea no te matahiti 2010.
Ua rapaau te mau taote e rave rahi hanere feia ma‘i, ma te faaora i te hoê taata e tau minuti noa e pohe atu ai a tae atu ai oia i te fare ma‘i, e vetahi tei ore i rapaauhia e 24 hora te maororaa.
Ua tae mai te mau taata na te fenua mai e na ni‘a i te vaa no te haere e farerei i te mau taote. Ua parau o David Williams no Brisbane e o Anthony Mahler no Cairns e, hoê noa mahana i te taeraa’tu i te oire no Sogere, ua rapaau raua hau atu i te 200 feia i roohia i te ma‘i hi toto. I roto i taua ohipa ra, ua parau te taote Mahler e, « Ua riro te reira ei iteraa rau hau atu i te faahiahia i roto i to’u oraraa », noa’tu te mau fifi e te rahiraa o te ohipa rohirohi.
Taa‘e atu i te tonoraa i te mau taote, ua horo‘a atoa te Ekalesia i te mau tauturu, oia ho‘i te tauturu i te pae no te raau e te tamaraa i te pape. Ua haapono atoa te Ekalesia i te mau maa e te pu‘a i te mau fenua ati no Port Moresby, e ua haponohia te mau puohu no te ora tino no te taata iho mai Port Moresby e Brisbane. Ua haere atu te hoê pea misionare faaipoipo aravihi no te tamaraa i te pape i Papûa Nouvelle Guinée no te tauturu i te arata‘iraa i te mau tautooraa no te faaoraraa.
Te mau DVD no te Faaite i te Tumu Parau a te Feia Apî no 2011
I te ava‘e tenuare ra, ua haamata te Ekalesia i te opere i te DVD No te Puai o te Feia Apî no 2011, Te Ti‘aturi nei Matou, i roto i te mau tiahapa o te Ekalesia i te ao atoa nei, no te paturu i te tumu parau a te Feia Api no 2011.
Ua î te DVD e rave rahi mau faaararaa ei tautururaa i te feia apî ia faariro i te tumu parau, Te Mau Hiro‘a Faaroo 1:13, ei pû no to ratou oraraa. E itehia i reira te peresideni Thomas S. Monson, te mau peresideni rahi no te Feia Apî Tamaroa e Tamahine, te pehe, te mau iteraa papû o te feia apî, e hau atu.
Te rahiraa o te parau e mau iteraa papû ïa no te feia apî e te mau iteraa rau no te faaitoitoraa.
E nehenehe e faaohipa i te pehe, te mau parau poro‘i, e te mau iteraa papû no te haamaitai atu â i te mau piha a te feia apî, te mau apooraa, e te mau faaoaoaraa i roto i te matahiti.
E roaa te mau materia atoa i ni‘a i te itenati no te haruharu mai i ni‘a i te youth.lds.org.
Ua iriti-atoa-hia te DVD na roto i te mau reo i muri nei : Tinito, peretane, farani, heremani, italia, tapone, korea, potutara, rusia, e paniola.