Giunsa Nako sa Pagkasayud
Kana nga Basahon Nakapakuryuso Kanako
Akong gitutokan ang Basahon ni Mormon ug gipamalandong ang mensahe nga gitudlo sa mga misyonaryo.
Usa ka adlaw ang akong mga higala ug ako nagkapundok aron magsaulog. Sa balay sa akong higala, kami nag-istoryahanay, nag-inom, ug nanigarilyo. Apan usa sa akong mga higala, si Patrick, wala moapil. Ako nakaamgo dayon nga si Patrick wala gayud mosulay sa bisan unsang butang nga among gisulayan, akong nahinumduman nga siya usa ka Mormon.
Samtang nagkagabii na, ang matag usa nag-iyahay og panglakaw gawas ni Patrick ug kanako. Kami misakay sa usa ka jeep. Sa gihapon natingala kon nganong si Patrick wala moapil, mibalik ang akong panumduman sa usa ka adlaw upat ka tuig na ang milabay, sa dihang 16 anyos pa kami. Akong nahinumduman nga naglakaw kami sa karsada duol sa among eskwelahan sa dihang siya akong gisultihan nga gusto ko nga mahimong usa ka pari sa umaabut.
“Sa among simbahan ikaw mahimo nang usa ka pari,” mitubag si Patrick. “Ikaw gikinahanglan lamang nga maordinahan. Dayon kon ikaw mag 19 na, ikaw makasangyaw sa ebanghelyo isip usa ka misyonaryo.”
“Kataw-anan kana,” ako miingon, naghunahuna nga wala siyay dakong kahibalo sa ebanghelyo. “Unsaon sa usa ka 19 anyos sa pagsangyaw ngadto sa katawhan? Ang mga pari nagkinahanglan og daghang panahon sa pagtuon aron sila makasangyaw.”
Si Patrick miinsister nga ang 19 anyos sa iyang simbahan makasangyaw. Siya misulti kanako nga ang iyang simbahan aduna pay laing libro sa kasulatan, ug iya akong gihatagan og usa ka kopya. Kini akong gibasa-basa diha sa balay, ug akong gibati ang usa ka misteryusong butang niana nga libro. Apan ako sa tinuod wala magtagad kabahin niini, ako lamang kining gisulod sa kahon, diin didto ra kini sulod sa upat ka tuig.
Karon, samtang kami nagsakay sa usa ka jeep human sa party, akong gipangutana si Patrick kon asa siya paingon. “Makigtagbo ako sa pipila ka mga higala. Sila mga elder—mga misyonaryo.” Akong nahinumduman nga nakakita kanila sa kasilinganan. Akong gihangyo si Patrick kon makadala ba siya kanako ngadto sa mga elder aron makapangutana ako nila og pipila ka mga pangutana kabahin sa ilang simbahan.
Among gikatagbo ang mga misyonaryo sa tindahan duol sa ilang subdivision, ug mihimamat sila kanamo pinaagi sa paglamano. Hilabihan kini ka pormal. Apan human sila mopaila-ila sa ilang mga kaugalingon kanako, akong namatikdan nga sila daw sama ra sa bisan kinsa nga laing mga tawo. Sila gusto nga mobalik aron aron sa pagtubag sa akong mga pangutana.
“OK, kuhaon lang nako ang inyong numero aron kon makalugar na ko, mo-text ko ninyo,” ako mitubag. Ako sa pagkatinuod wala magplano nga mo-text kanila.
Sa pag-abut nako sa balay, akong gikuha ang libro nga gihatag ni Patrick kanako upat ka tuig na ang milabay—usa ka butang kabahin niini ang nakapakuryuso kanako. Pagkasunod buntag akong gi-text ang mga misyonaryo aron motudlo kanako. Ilang gisugdan sa Pagpahiuli sa ebanghelyo. Ingon og lahi lahi kini kaayo, ug akong gisultihan ang akong kaugalingon, “Ngano man nga ang mga tawo gusto nga mopahiuli sa mga butang nga sila nasayud nga ang mas karaang mga henerasyon lahi kay sa atong henerasyon karon?”
Human sa duha ka mga panaghisgutan ako midesider nga dili na gayud mopadayon niini. Sa dihang gipangutana kon ngano, ako mitubag, “ako dili na gayud interesado.” Paglabay sa usa ka semana. Ako naglingkod nga nagtutok sa Basahon ni Mormon, namalandong sa mensahe nga gitudlo kanako. Ako misugod sa pagbasa sa unsay gisulti sa mga misyonaryo kanako sa 3 Nephi 11. Akong nabasa nga si Jesus miadto sa laing nasud aron sa pagpakita nga Siya mao ang Manluluwas ug Mesiyas. Sa 3 Nephi 15, Akong nahinumduman ang usa ka hut-ong sa pulong nga akong nabasa kaniadto sa Biblia, sa Juan 10:16. Kini usa ka butang nga wala pa gani gitudlo sa mga misyonaryo kanako.
Mga luha nangatagak sa akong nawong, ug akong namatngonan ang akong kaugalingon nga naghilak sa akong lawak. Akong naamguhan ang gugma ni Jesukristo kanato. Siya nahigugma kanato sa hilabihan nga Iyang gihatag ang Iyang kaugalingong kinabuhi aron sa pagluwas kanato gikan sa atong mga sala. Ako wala magduhaduha sa pag-ampo, naghangyo aron masayud kon ang Basahon ni Mormon nga akong gigunitan tinuod ba. Nag-ampo sulod sa akong lawak, nag-inusara, sa kalit akong gibati nga adunay usa ka tawo nga naminaw kanako.
Ang akong kasingkasing nalukmay tungod sa mga pagtuo nga akong nadawat. Mitindog ako ug miingon, “Kini mao ang tinuod nga Simbahan. Ako nasayud nga kini mao ang Simbahan nga gipahiuli ni Jesukristo.”
Sa adlaw sa wala pa ang akong bunyag, akong gibalik-balik ang proseso sa pag-ampo. Sa gihapon ang akong nadungog ug gibati mituhop sa akong kasingkasing, ug ako nasayud nga ang Espiritu Santo mipadayag kanako sa kamatuoran. Ako nasayud sa kamatuoran nga si Jesus mao ang Kristo. Akong gibati sa akong kasingkasing ug hunahuna nga ako nagtinguha nga mabunyagan, nagtuo nga pinaagi sa Pag-ula ni Jesukristo ako malimpyohan.
Si Jesukristo miula alang sa atong mga sala, ug kini mao gayud ang hinungdan nga ako nakabig. Ako nasayud nga Siya lamang ang adunay gahum ug awtoridad sa pagtukod og balik sa Iyang Simbahan sa atong dispensasyon. Karon isip usa ka misyonaryo nga nagserbisyo sa Philippines Cagayan de Oro Mission, ako naghimo sa akong pinakamaayo aron pagtabang sa katawhan nga mobati sa dakong kalipay nga akong naangkon karon.
Mga paghulagway pinaagi ni Paul Mann
Nakigtagbo kami sa mga misyonaryo, ug sila gusto nga mobalik aron pagtubag sa akong mga pangutana.