Komentaryo

Usa ka Milagro sa Among Pamilya

Ang artikulo ni Elder Joseph B. Wirthlin, “Bisan Unsa ang Mahitabo, ug Dawata Kini,” sa Nobyembre 2008 nga Liahona (p. 26), mihatag og espirituhanon nga tabang sa among anak nga babaye, kinsa bag-ohay pa lamang nga nakasinati og malisud nga pagsulay. Atol sa iyang pagsabak, ang mga doktor mihatag kaniya og makapaluya nga paghiling—ang among apo mahimong dili mabuhi.

Matag adlaw nga pag-ampo sa pamilya ug sa personal inubanan niana nga artikulo mihatag kanamo og paglaum, ug usa ka milagro nahitabo sa among pamilya: ang apong lalaki natawo. Siya kinahanglan nga mahibilin sa ospital og pipila ka mga adlaw, apan paglabay sa usa ka bulan ang mga doktor wala na mokumpirma sa miaging paghiling.

Kami nasayud nga ang atong Langitnong Amahan buhi ingon man usab ang atong Manluluwas ug Manunubos, nga si Jesukristo. Ang Pagkabanhaw ug kinabuhing dayon uban sa Langitnong Amahan mao ang kamatuoran.

Gennadji ug Tatjana Mitchenko, Russia

Dili sa Dominggo

Usa ka adlaw ako nakadaug og tiket alang sa dula sa soccer nga maatol og Dominggo. Akong gitawag ang akong asawa ug nangutana niya kon mouban ba siya nako sa dula. Imbis nga motubag, siya miingon, “Inig pauli nimo, basaha ang Liahona.”

Sa akong pag-abut sa balay akong gibasa ang kabahin sa usa ka batan-ong babaye gikan sa Brazil kinsa wala motan-aw sa World Cup sa France tungod kay Dominggo kini (tan-awa sa Suzana Alves de Melo, “Wala Ka Apil sa World Cup,” Liahona, Hunyo 2007, 37). Akong gibati nga ingon og ang Langitnong Amahan nagsulti kanako, “Ako nasayud nga ganahan ka og soccer, apan ang Dominggo akong adlaw. Ayaw pag-adto.” Busa ako wala moadto sa dula. Sukad niadto ako mipadayon sa pagbasa sa mga pulong sa atong propeta. Kini nga magasin mao ang kompas sa atong mga kinabuhi. Kini makapalig-on kanato niining malisud nga kalibutan.

Anderson Carpejane, Brazil

Walay Butang nga Ikahadlok

Maghilak ako sa matag isyu sa Liahona sulod sa miaging walo ka tuig.

Akong nasayran nga, sama kanako, adunay laing mga tawo nga nag-antus. Apan tungod sa atong mga pagpamatuod, nga adunay lawom nga espirituhanong pagkagamot, walay butang nga dili nato mabuntog.

Kini nga magasin nagsilbing usa ka espesyal nga giya sa akong kinabuhi, ug nasayud ako kon nganong nagdala kini sa ngalan nga Liahona.

Edwin Urrutia, Illinois, USA