Usa ka Family Home Evening Nga Molungtad

Sergio Trejo Reyes, Jalisco, Mexico

Usa niana ka family home evening pipila ka tuig na ang milabay gisugdan uban sa among pagpanganta, “Ang adlaw nagpakita, ang kalibutan nagmata” (“The Day Dawn is Breaking,” Mga himno, nu. 52). Sa dihang among gipangutana ang matag usa sa lima namo ka mga anak sa pagsugyot og kalihokan nga among buhaton niadtong semanaha, ang lima ka tuig nga si Fernando misulti sa yanong paagi, “Ako gusto nga makakita kon unsa ang mahitabo kon duol na ang kaadlawon ug ang katawhan mamangon.” Kami naningkamot sa pagpasabut ngadto kaniya sa tanang butang nga mahitabo: sa unsang paagi mosidlak ang adlaw, ang huyop sa hangin sa sayong kabuntagon, ug ang yamog nagsilaw sa kinaiyahang talan-awon sa yuta. Apan dili siya motuo niini gawas kon iyang makita. “Gusto nakong makita kini,” siya misulti pag-usab.

Mao nga pagka-Huwebes sa alas 4:00 sayo sa buntag, kami nangmata, misakay sa among sakyanan, ug miadto og usa ka dapit diin may klaro nga talan-awon sa silangang langit. Ang pagsidlak sa adlaw nianang adlawa mora og naggikan sa langit mismo. Ang mga lingin nga yellow og kolor nahimong usa ka naggilak-gilak nga pink og kolor samtang ang talagsaon nga porma sa adlaw migawas. Kadto gayud mahimayaon.

Traynta ka tuig ang milabay, ang batang anak nga lalaki ni Fernando nga si Fernandito mibisita kanamo. “Kahibalo ka, Lola?” siya miingon. “Si Papa midala kanamo aron makalantaw sa pagsidlak sa adlaw.”