Atong mga Panimalay, Atong mga Pamilya
Sa Unsang Paagi Nato Nakat-unan ang Pagkamalipayon
Panahon sa ekonomikanhong reporma sa gobyerno [perestroika], ang kinabuhi hilabihan gayud kalisud, ug ang among pamilya hapit magkatibulaag. Dayon among nahimamat ang mga misyonaryo, ug sa hinay-hinay kami nagkahiusa.
Ako kanunay naghuhuna nga kami adunay usa ka lig-on nga pamilya. Ang among tulo ka anak nga mga lalaki ug duha ka mga babaye mga normal nga bata, ug kami adunay mga normal nga problema uban kanila. Usahay kon sila magpabadlong, ako masuko. Inigkahuman ako maghunahuna sa akong kaugalingon, “Nganong ako masuko man gyud kanila?”
Ako diay wala masayud nga ang perestroika—usa ka panahon sa politikal ug ekonomikanhong kausaban—nagsugod na sa Russia. Ako wala masayud nga ang mga pagkaon nangahurot diha sa mga estante sa tanang mga tindahan, nga sa pipila ka mga buwan ug pipila ka mga tuig, kami dili na makadawat sa among sweldo. Ang kinabuhi nahimong lisud kaayo. Kami adunay mga panlimbasug, ug ang akong bana ug ako hapit na magdibursyo. Miabut ang epidemya sa paggamit og druga, ug usa sa among anak nga lalaki nalakip niini. Mora og ang adlaw wala na mosanag sa among mga bintana. Ako wala na masayud kon kinsa ang akong ampoan, apan ako nagpadayon gihapon og pangayo og tabang sa Dios. Kami nanlimbasug uban sa among tibuok kusog, ug sa hinay-hinay nga paagi among gibuntog kining kalisud.
Sa ting-init niadtong 1998, ang mga misyonaryo nakakita kanamo. Ang among mga kinabuhi hingpit nga nausab samtang kami nagpadulong sa bag-o nga direksyon. Sulod sa lima ka tuig kami nakaadto sa templo ug nabugkos isip usa ka pamilya hangtud sa kahangturan.
Sa dihang ang among tunga-tunga nga anak nga lalaki mialagad og full-time nga misyon sa Czech Republic, siya misulat kanamo sa matag sulat, “Magpabilin nga lig-on ug magmatinud-anon. Kami ang pinakamalipayon nga pamilya.” Bisan ang akong mga higala mosulti kanako nga ako tingali ang pinakamalipayon nga babaye sa tibuok kalibutan nga nakabaton og daghang mga anak ug mga apo ug nasayud nga ako dili na gayud magmagul-anon.
Sa paglantaw sa nangagi, ako nakaamgo nga sama sa mga tawo nga nakadungog kang Haring Benjamin, ang among pamilya nakasinati og usa ka dako nga kausaban sa among mga kasingkasing, nahimo nga mga anak ni Kristo (tan-awa sa Mosiah 5:7). Kadto usa ka dako nga kausaban alang kanako. Sa wala pa mahimong usa ka Santos sa Ulahing mga Adlaw, sa dihang ako naghunahuna kabahin sa kamatayon, usa ka dili maagwanta nga kasubo ang gibati sa akong kasingkasing ug kalag. Nagkinahanglan kadto sa akong tanang kusog aron sa pagtangtang niadtong hunahuna diri kanako. Karon ako aduna nay kalinaw sa akong kalag.
Ako nakakat-on nga ang kalipay moabut sa nagkalain-lain nga matang. Kini mahimong makita diha sa labing itom nga mga panganod o kon ang kalibutan nagkauga tungod sa kainit. Kini usab anaa sa mainit nga sidlak sa adlaw taliwala sa nagbunok nga ulan. Kini mao ang unang berde nga dahon sa tingpamulak nga padulong mogawas gikan sa nasiak nga punoan sa usa ka kahoy nga poplar. Kini usa ka gamay nga puting bulak nga mituyhakaw sa iyang kaugalingon diha sa usa ka sanga sa usa ka mansanas. Kini anaa sa kangitngit sa kagabhion sa langit uban sa liboan ka naggilak nga mga bitoon. Kini anaa sa usa ka puno sa gugma nga pagtan-aw sa usa ka minahal. Kini makita sa kislap sa mga mata diha sa mga litrato sa pamilya.
Ang kalipay moabut usab ngari kanako kon ako mobuhat og usa ka maayo nga butang para sa uban. Kini mopainit sa akong kalag uban sa gamay nga siga kon ako mag-ampo ngadto sa atong Langitnong Amahan. Usahay, kon ako maghunahuna nga ako gusto pa og mas daghan nga butang, akong hinumduman nga ako kinahanglan nga makakat-on sa paghatag og bili kon unsa ang anaa kanako—ang Ginoo Mismo mihatag na sa tanan ngari kanako.
Sa wala: litrato sa maayong kabubut-on sa pamilya nga Shmakova; sa tuo: paghulagway sa litrato pinaagi ni Steve Bunderson