Usa ka Pagbisita sa Temple Square

Ang Templo sa Salt Lake

Ni Jan Pinborough

Mga Magasin sa Simbahan

Uban kanamo niining tuiga aron sa pagtan-aw sa importante nga mga dapit sa Temple Square.

Usa kadto ka mabugnaw kaayo nga adlaw sa Enero. Ang mga tore sa Templo sa Salt Lake natabunan sa bag-ong snow. Apan si Kate labaw pa ka mahinamon kay sa katugnaw. Siya mibiyahe ngadto sa Temple Square gikan sa iyang panimalay sa Logan, Utah, alang sa pagsuroy-suroy sa mga nataran sa Templo sa Salt Lake.

Kini usa ka sagrado nga dapit, uban sa daghang madanihon nga mga butang nga matan-aw ug makat-unan.

Ang bulawan nga anghel Moroni nagbarug sa ibabaw sa pinakataas nga tore. Sa ilawom, gikulit sa bantilis nga bato, mao ang mga pulong “Kabalaan sa Ginoo.”

Ang bantilis nga batong mga bongbong sa templo gisilsil nga may porma sa adlaw, sa bulan, sa yuta, sa mga panganod, ug mga bitoon.

Ang Big Dipper gikulit aron kini mopunting sa tinuod nga North Star.

Unsa ka dugay gitukod sa mga pioneer ang templo? Si Kate nakakaplag sa tubag diha sa brass nga mga siradora sa dakong kahoy nga pultahan sa templo.

Pipila sa mga bongbong sa templo mga unom ka pye (2 ka metros) ang gibag-on!

Nangandam sa Pagsulod

Si Kate miingon, “Ang templo usa ka ka espesyal kaayo nga dapit. Ako dili na makahulat nga modako aron makasulod.” Hapit na siya mag-12, mao nga siya dili na maghulat og dugay aron mohimo og mga bunyag alang sa mga patay. Si Kate nasayud nga importante ang pagpangandam alang nianang adlawa pinaagi sa pagtahud sa iyang lawas ug sa pagpabilin sa iyang mga hunahuna ug lawas nga limpyo.

Ila-ilaha si Kate

• Siya anaa sa grade six.

• Siya ganahan nga magdrowing, motukar sa piano, mokanta, mobalintong, ug magdula og soccer.

• Siya gusto nga mahimong inahan, usa ka pharmacist, ug usa ka tigbantay sa zoo.

• Siya adunay pagpamatuod nga si Presidente Thomas S. Monson usa ka propeta sa Dios ug ang mga pamilya magkauban sa kahangturan.

Giunsa Nila sa Pagtukod Niini?

Upat ka adlaw human miabut sa Walog sa Salt Lake, si Presidente Brigham Young (1801–77) milakaw sa luna diin ang templo nagbarug karon. Iyang gidugkal ang iyang sungkod diha sa yuta ug miingon, “Dinhi nato tukuron ang templo sa atong Dios.”

Mga tigtabas og bato mitabas og dagkong mga bloke sa bantilis nga bato gikan sa bukid. Mga baka mihakot niini 25 ka milyas (40 km) ngadto sa Temple Square. Gatusan ka mga trabahante, lakip na ang mga tin-edyer, mitabang sa pagtukod sa templo. Ang mga bata nangita og kwarta aron idonar sa trabaho, ug usahay magdula sila og tago-tago diha sa dagkong mga bloke sa bantilis nga bato!

Mikabat kini og 40 ka tuig sa paghuman sa templo. Sa diha nga si Presidente Wilford Woodruff (1807–98) mipahinungod sa templo niadtong 1893, mga 15,000 ka mga bata ang miadto sa mga sesyon sa pagpahinungod.

Online nga Video

Adtoa sa www.friend.lds.org aron sa pagtan-aw og video kabahin sa unsay bation nga mosulod sa templo aron magpabunyag alang sa mga patay.

Mga litrato pinaagi ni Craig Dimond, gawas kon gipahibalo; sa pikas pahina: mga paghulagway pinaagi ni Dilleen Marsh; litrato sa bunyaganan sa Templo sa Salt Lake ni Welden C. Andersen; sa tunga: litrato sa templo ni Greg Frei; wala: litrato sa pagtukod sa templo sa maayong kabubut-on sa Church History Library; litrato sa mga himan pinaagi ni Lana Leishman