Nag-ampo alang sa Tubag
Usahay kamo mag-ampo alang sa panabang, apan ang mga tubag moabut lamang human ang inyong hugot nga pagtuo masulayan.
Usa niana ka adlaw samtang nagkuha sa pasulit sa math, ako wala makahinumdom kon unsaon sa pagsulbad sa usa sa mga problema. Ako nakaandam na alang niini nga pasulit, apan dili nako mahinumduman unsa ang akong girebyu sa balay. Hinoon, ako adunay hugot nga pagtuo nga ako makapangayo sa akong Amahan sa Langit og tabang.
Ako midesider nga akong dawaton ang unang pag-aghat nga akong gibati. Pagkahuman og ampo, akong nabati nga ako makasulbad sa problema sa piho nga paagi. Apan ako nagsugod sa pagduha-duha tungod kay kini daw kiwaw nga paagi sa pagsulbad sa problema. Mao nga akong gipadayon ug gibuhat kini sa akong kaugalingon kutob sa akong mahimo.
Sa diha nga ang tanang mga pasulit gipasa na, ang among magtutudlo mitan-aw sa pasulit uban kanamo. Akong namatikdan nga ang pagbati nga diha kanako human sa pag-ampo mosangput ngadto sa husto nga tubag, apan wala ako maminaw.
Wala madugay, atol sa katapusang eksamin, akong namatikdan sa makausa pa nga ako dili makasulbad sa usa sa mga problema, bisan tuod kon ako nagpraktis niini nga problema sa balay.
Gusto ko nga mangayo sa Langitnong Amahan og tabang, apan ako nahinumdom sa dihang walay tahud nakong gisalikway ang Iyang tabang. Karon akong gibati ang kaulaw sa paghangyo. Apan tungod kay wala ako makahunahuna og bisan unsang sulbad, bisan pa niana ako nag-ampo og panabang.
Sa makausa pa ako nagduhaduha sa diha nga ang pag-aghat miabut, gani ako labaw pa nga naglibog kay sa akong gibati sa miagi. Apan ako misaad sa Ginoo nga ako maminaw. Mao nga akong gipugngan ang mga pagduha-duha ug gihimo sa tukma ang unsay gisulti sa pag-aghat nga akong buhaton.
Human gikorihian ang mga pasulit, ang among magtutudlo mipahibalo sa among mga grado. Iya kining gihimo nga mahinamon pinaagi sa pagsugod sa labing ubos nga mga grado ug nagpaingon ngadto sa labing taas nga grado. Sa diha nga wala niya matawag ang akong ngalan diha sa mga 3s—usa ka gamay nga grado—ako nahimuot nga ako makaangkon og 2, ang labing maayong grado nga sukad akong nakuha sa math. Apan sa diha nga wala niya matawag ang akong ngalan diha sa mga 2s, lain na ang akong gibati. Sigurado ako nga dili ako makakuha og 1, mao nga nagsugod ako og kahadlok nga nakahimo ako og pinakagrabe sa tibuok klase.
Apan unya ang akong ngalan gitawag diha sa mga 1s. Ako nahimong emosyonal sa diha nga akong naamgohan ang kamot sa Ginoo kabahin niini ug ako nasayud sa Iyang gugma ug pailub kanako. Sa dihang ang pipila sa akong mga kauban sa klase miingon, “Nindot kaayo ang imong gihimo!” Ako igo lang nga milingo-lingo. Ako milampus lamang sa diha nga akong gisunod ang pag-aghat.
Paghulagway sa litrato pinaagi ni John Luke