Pag-usab sa Kalibutan Usa ka Mahiyason nga Babaye sa Matag Higayon
Niadtong Abril 2008, ang bag-ong natawag nga kinatibuk-ang kapangulohan sa Young Women—sila si Elaine S. Dalton, Mary N. Cook, ug Ann M. Dibb—mibarug sa ibabaw sa Ensign Peak diha sa amihanang daplin sa Siyudad sa Salt Lake ug midungaw sa walog.
Gikan sa ilang nahimutangan ang hulagway ni anghel Moroni migilak diha sa Templo sa Salt Lake, ug sila nasayud dayon kon unsay anaa sa hunahuna sa Ginoo alang sa batan-ong mga babaye sa Simbahan.
Ang tulo ka mga babaye miisa og usa ka sungkod diin mikayab ang usa ka bulawan nga kupo sa taga-Peru––ilang bandera ug bandila ngadto sa mga nasud, usa ka tawag alang sa pagbalik ngadto sa hiyas.
“Dili kita makahisgut niining bag-ong bili sa hiyas nga dili mosulti sa katarungan kay ang bili niini mao ang templo,” miingon si Sister Dalton. “Ug ang templo mao ang rason sa tanang mga butang nga atong gihimo sa Young Women, tungod kay kini makatabang niining batan-ong mga babaye sa pagduol ngadto ni Kristo.”
Ang hiyas opisyal nga gidugang sa Young Women nga mga mithi niadtong Nobyembre 2008. Giklaro kini diha sa libro sa Personal nga Kauswagan isip “usa ka sundanan sa hunahuna ug pamatasan nga gipasikad sa taas nga mga sumbanan sa moralidad. Kini naglangkob sa kaputli ug kadalisay” (Personal nga Kauswagan sa Young Women [booklet, 2009], 70).
Kini nga mithi lahi kay ang tanan niining mga kasinatian ug ang mithianon nga proyekto gikinahanglan, kay sa ubang mga mithi nagtugot sa batan-ong mga babaye nga mopili gikan sa pipila ka mga kapilian. Dugang pa, sa unang higayon, ang mga inahan gidapit sa pagkompleto sa programa sa Personal nga Kauswagan uban sa ilang anak nga mga babaye ug makadawat sa ilang kaugalingon nga mga medalyon.
Sa miaging tuig, ang batan-ong mga babaye ug ang uban sa tibuok kalibutan malukupon nga mitubag sa panawagan sa pagbalik ngadto sa hiyas, napuno gayud ang opisina sa Young Women og mga sulat ug mga litrato gikan niadtong kinsa mitubag sa tawag. Daghan ang mikat-kat sa mga bukid ug mipakayab sa ilang kaugalingong mga bandila.
Usa ka grupo sa batan-ong mga babaye sa Hannibal, Missouri, USA, nagtinguha nga makahimo og panaad sa pagkamahiyason gikan sa usa ka taas nga lugar ug kay wala makakita og bukid sa duol, mikat-kat sa usa ka 36 ka andanas nga sementong tore, mipakayab sa ilang bandila, ug mipasalig sa pagpuyo og mahiyason nga kinabuhi.
Sa Mexico, ang ngalan sa Young Womanhood Recognition gihubad ngadto sa “Ang Ganti sa Batan-ong Babaye nga Hiyas.” Ang batan-ong mga babaye sa Mexico naghinam-hinam kabahin sa pagdugang sa hiyas isip usa ka mithi, miingon si Sister Dalton—kini usa ka mithi diin pamilyar na silang daan.
“Ang panawagan sa hiyas gidawat uban sa malukupon nga pagdayeg, gikan sa matag aspeto, sulod ug gawas sa Simbahan,” miingon si Sister Cook. “Ang mga lider ganahan niini; ang mga lider sa priesthood mihatag niini og gibug-aton; mga inahan ug apohan nga mga babaye mapasalamaton kaayo niini.”
Ang proyekto alang sa bili sa hiyas mao ang pagsunod sa pahimangno sa Manluluwas sa pagkat-on Kaniya (tan-awa sa D&P 19:23) pinaagi sa pagbasa sa tibuok nga Basahon ni Mormon ug sa makanunayong pagrekord sa mga hunahuna diha sa journal.
Usa ka e-mail para sa kapangulohan sa Young Women gikan sa usa ka sister sa England mabasa: “Makapasubo gyud, nga kita mangayo og pasaylo. Dili kita makahimo sa pagkompleto niini sa ingon kadali sama sa atong gidahum. Ang rason mao nga ang akong anak nga babaye ug ako nagtuon sa Basahon ni Mormon sa paagi nga wala namo mabuhat kaniadto. Usa kini ka maanindot nga kasinatian, pahimudsan namo kining higayuna.”
Ang Basahon ni Mormon nagtudlo kabahin sa mga katilingban nga miuswag ug malipayon sa dihang sila mga mahiyason ug putli apan kana napukan sa dihang dili na sila mahiyason, miingon si Sister Dibb.
Ang mga lalaki ug mga babaye pareho nga madasigon kabahin sa bag-ong mithi, ang kapangulohan sa Young Women miingon, naghisgut sa mga ehemplo sa tibuok pundok sa batan-ong mga lalaki ug sa mga singles ward nga nagkahiusang nagtrabaho kabahin sa mithi.
Si Sister Dibb mipasabut og maayo nga ang mga lalaki ug mga babaye kinahanglan gayud nga mopukos sa hiyas aron makaangkon sa mahinungdanon kaayo nga mga panalangin. “Ang mga lalaki walay gahum o kalig-on sa paggamit sa priesthood nga ilang nadawat kon sila walay moral nga kaputli,” siya miingon. “Ug ang mga babaye makadawat niana nga gahum ug kalig-on sa pagtuman sa ilang balaanong mga calling isip mga asawa, mga inahan, ug isip mga babaye kon sila mosunod sa hiyas.”
Si Sister Dalton miingon nga siya nagtuo nga ang bili sa hiyas gitagana alang niining panahona, usa ka panahon diin ang kalibutan nagbuhat sa tanang butang gawas lamang sa pagpasiugda sa hiyas.
“Makapaikag kini kanato nga niining kalibutan daghan kaayong batan-ong mga babaye nga nakalimot sa ilang kaugalingon isip anak nga mga babaye sa Dios,” miingon si Sister Cook. “Kami nagpahinumdom lamang kanila niana, ug usab sa kamatuoran nga kon kamo masayop, kamo makahinulsol.”
Ang pasalig sa pagpabilin nga mahiyason ug putli posible tungod sa makahimo ug makatubos nga gahum sa Pag-ula sa Manluluwas, miingon si Sister Dibb. Ang ikaupat nga mithianong kasinatian nagpokus sa paghinulsol.
Sa miaging tuig, daghang mga babaye—tigulang ug batan-on—mipahayag og tinguha sa pagbalik ngadto sa pagkamahiyason nga mga babaye. “[Ang pagdugang sa hiyas] nagmugna og kadasig sa mga babaye kinsa nakahimo og sayop nga mga pagpili. Daghan ang miingon, ‘Ako mahimo na usab nga mahiyason nga babaye. … Posible kini alang kanako,’” miingon si Sister Cook.
Daghan niadtong kinsa nagtinguha nga mahiyason pag-usab naghunahuna kon asa sila magsugod. Ang kapangulohan sa Young Women nakigbahin kanila niini nga pormula: Pag-ampo sa gabii ug buntag. Pagbasa sa Basahon ni Mormon lima ka minuto o labaw pa matag adlaw. Ug pahiyum.
“Kon ang tanang mga babaye sa Simbahan ug sa kalibutan mobuhat niini, hunahunaa kon unsa ang kalibutan mahisama sulod sa lima ka tuig,” miingon si Sister Dalton. “Kami tinuod gayud nga nagtuo nga ang mahiyasong batan-on nga mga babaye nga gigiyahan sa Espiritu makapausab sa kalibutan.”
Ang batan-ong mga babaye ug ang ilang mga lider sa Stake sa Santo Domingo Dominican Republic Independencia mikat-kat sa Cambita Garabito, usa ka bukid didto sa Dominican Republic, diin ilang giisa ang ilang kaugalingong bandila sa hiyas niadtong Agosto 2009.
Litrato sa maayong kabubut-on ni Iván Heredia