Pagpangandam alang sa Priesthood
Ang onse anyos nga si Hansen Prabhudas sa Bangalore Second Branch, Bangalore India District, naghinam-hinam. Human sa pagsimba ang mas magulang nga batang mga lalaki sa branch motudlo kaniya kon unsaon sa pag-andam, pagpanalangin, ug pagpaambit sa sakrament.
Una, ang batang mga lalaki kinsa mga teacher diha sa Priesthood mipakita kang Hansen kon unsaon nila sa pag-andam sa mga tray sa pan ug mopuno sa mga cup og tubig.
Sunod, ang mga priest mobasa sa mga pag-ampo sa sakrament ug mopasabut kon unsaon nila sa pagpilo ang hapin sa lamesa.
Sa katapusan, ang mga deacon mipakita kon asa sila magbarug, kon unsaon nila sa pagpaambit sa sakrament ngadto sa kongregasyon, ug unsaon nila sa pagtabang sa matag usa nga magbaton og balaan nga pagtahud.
“Ang Aaronic Priesthood importante,” miingon si Hansen. “Adunay daghang kinahanglan nga akong buhaton aron mangandam sa pagdawat niini.”
Gawas sa pagkat-on kabahin sa sakrament, si Hansen nagbasa sa mga kasulatan ug naninguha sa paghupot sa mga sugo ug mosunod sa iyang mga ginikanan. Nagkat-on usab siya kabahin sa Simbahan diha sa Primary ug naghimo og maayong ehemplo alang sa iyang siyam ka tuig nga igsoong lalaki, si Gideon.
Mga Panalangin sa Priesthood
Si Hansen nagkat-on og daghan mahitungod sa priesthood gikan sa iyang amahan, kinsa naghupot sa Melchizedek Priesthood ug nagserbisyo sa kapangulohan sa elders quorum. “Si Papa ang mibunyag nako ug, wala madugay, ni Gideon,” miingon si Hansen. “Kon si Mama masakit, siya motabang sa paghatag kaniya og mga panalangin sa priesthood aron siya maayo.”
Pagpagaan sa Palas-anon
Ang iyang amahan motabang usab sa inahan ni Hansen sa pagpangumpra ug pagluto. “Iyang buhaton ang tanan kutob sa iyang mahimo sa pagtabang kanamo,” miingon si Hansen. Ug ang iyang mga ginikanan nagtabang sa daghang mga tawo, ilabina sa Simbahan.
Ang inahan ni Hansen kanunay nga busy sa iyang calling isip presidente sa Primary sa branch. Si Hansen motabang sa iyang buluhaton pinaagi sa pagpalit og mga utanon o sa paghugas sa mga plato.
“Akong gihigugma ang akong mga ginikanan,” miingon si Hansen. “Kami mag-family home evening matag semana, magbasa kami sa mga kasulatan isip pamilya, ug kami naghimog pamilya nga pag-ampo.”
Usa ka Tibuok Kinabuhi nga Serbisyo
Kon nag-edad ka og 11, adunay daghan kaayong andamon. “Ako kinahanglan gayud nga makat-on sa pagpaminaw og maayo sa Espiritu Santo,” miingon si Hansen. “Siya mogiya kanako samtang ako magtuon sa ebanghelyo diha sa akong korum sa priesthood, sa Young Men, dayon sa seminary. Kanang tanan nga mga butang makatabang kanako nga makapangandam nga mahimong full-time nga misyonaryo. Ug kinahanglan gayud nga ako makat-on sa pagtabang sa kabus ug makahatag og mas maayong serbisyo,” miingon si Hansen. “Ako kinahanglan gayud nga mangandam alang sa tibuok kinabuhi nga serbisyo, tungod kay ang priesthood nagpasabut nga ang pagserbisyo sa uban sa paagi nga buhaton gayud ni Jesukristo kon ania pa Siya.”
Ang paborito ni Hansen nga istorya sa kasulatan mao ang kabahin ni Noe. “Ako ganahan kon nganong ang mga mananap sa pagsunod kaniya sa dihang oras na sa pagsulod sa arka.” Siya nasayud nga si Noe kinahanglang motrabaho og maayo aron mangandam sa umaabut, sama nga si Hansen adunay daghan nga buluhaton aron pag-andam alang sa priesthood.
Ang mga Kalingawan ni Hansen
Mga dula: Ang paborito nga dula ni Hansen mao ang badminton, apan siya usab malingaw sa cricket, soccer, o lumba sa dagan uban sa iyang igsoong lalaki ug ilang mga higala kinsa nagpuyo sa tabok karsada. “Bisan kamo magdula man og badminton, cricket, o soccer, importante nga kamo magdula isip usa ka grupo,” miingon si Hansen. “Sama kini sa priesthood, tungod kay diha sa korum sa priesthood kamo kinahanglan usab nga magtrabaho isip usa ka grupo.”
Pagbuhi og isda: Si Hansen nagpaitlog og mga isda nga [guppies] sa sudlanan sa tubig sa ulan nga balde nga iyang gihipos luyo sa ilang gipuy-an. Dayon iya kining balhinon sa gamay nga aquarium. “Ganahan ko sa daghang maanindot nga mga kolor ug sa unsa nga paagi ang isda magdula sa usag usa,” miingon siya.
Pagkanta: ang “Ang Gugma Gipamulong Dinhi” (Songbook sa Mga Bata, 102–03) mao ang paborito ni Hansen nga kanta sa Primary. Siya ug si Gideon ganahan kaayo nga manganta og mga awit mahitungod ni Jesus, ilabina sa mga himno. “Ang mga himno nakatabang kanamo nga magpabilin ang gugma sa among pamilya,” miingon si Hansen.
Asa man sa Kalibutan Ang Bangalore, India?
Sa India
Bangalore
Mga litrato pinaagi ni Richard M. Romney; mapa pinaagi sa Mountain High Maps, © 1993, Digital Wisdom, Inc.
Si Hansen nagkat-on mahitungod sa pagpakita og maayo nga ehemplo sa nagkalainlaing mga kahimtang: sa mga naghupot sa Aaronic Priesthood sa iyang branch, atol sa family home evening, pagdula og football, ug sa pag-andam og pagkaon kauban sa iyang manghud nga igsoong lalaki, si Gideon.