ʻOku Hehema Pē ho Kaungāmeʻá Ke Tatau Mo Koe
ʻE lava ke tākiekina kitautolu ʻe hotau kaungāmeʻá. Ka ko e taimi ʻoku tau moʻui ʻaki ai e ongoongoleleí, ʻe lava foki ke tau tākiekina kinautolu.
Ne u fakaʻofoʻofaʻia maʻu pē he ngaahi liliu ʻoku fakahoko ʻe hoku tokouá ʻi he moʻui ʻa ha niʻihi ʻo hono kaungāakó. ʻOku fakafou ʻi heʻenau kaungāmeʻa mo iá ʻa ʻenau hoko ko ha kakai ʻoku toe lelei angé. Naʻe fakafou ʻi heʻene tā sīpingá ʻa ʻeku ʻiloʻi ko e kupuʻi lea ko ia ʻoku pehē “Tokanga ko hai ʻokú ke fili ko ho kaungāmeʻá, he te ke meimei hoko pē ʻo tatau mo kinautolu.” ʻe lava pē ke toe ʻuhinga he taimi ʻe niʻihi ke “Tokanga ko hai ʻokú ke fili ko ho kaungāmeʻá, he te nau meimei hoko pē ʻo tatau mo koe.”
Ne u maʻu ha kaungāmeʻa tatau pē ʻi he taimi kotoa ne u ako aí. Ka ʻi he taʻu ʻe taha, naʻe kamata ako ai homau ʻapiakó ha tamasiʻi ako foʻou pea naʻe ʻikai ke tatau ia mo au, he naʻá ne manakoa ʻaupito. Ka ne u kei hoko pē ko hano kaumeʻa. ʻI he ngaahi māhina ne hoko atu aí, ne ma toe vāofi ange ai ʻo ma hoko ko ha ongo kaungāmeʻa mamae.
Ne u anga ʻaki foki ʻa e ʻalu ki he seminelí he hili pē ʻa e akó. Naʻá ne fehuʻi mai he ʻaho ʻe taha pe ʻoku ou ʻalu ki fē he ʻaho kotoa pē. Ne u pehē ke u fakamatalaʻi ange kiate ia ʻa e Siasí ka ʻi he fōtunga hono fofongá, ne u ʻiloʻi ai ʻoku ʻikai ko e founga lelei taha ʻeni ke talanoa ai kiate iá. Ko ia naʻe ngata ai pē ʻeku talanoa loto vēkeveke angé.
Hili ha ngaahi māhina siʻi mei ai, naʻe omi e ongo ʻeletaá ki homau ʻapí ʻi he taimi tatau pē naʻe ō ange ai haku kaungāmeʻa ke fai ʻemau ngāue fakaako mei ʻapí. Naʻe kau ai hoku kaungāmeʻá, ko ia ne u kole ai ki he ongo faifekaú ke na kiʻi talatalanoa ʻo fekauʻaki mo e Siasí. Naʻá ne tokanga ki heʻena fakamatalá. Naʻá ne fakatokangaʻi ʻoku kehe ha ngaahi meʻa ʻoku ou fai heʻeku moʻuí, mei he meʻa ko ia naʻá ne fai mo hono kaungāmeʻa kehé, pea naʻá ne fie ʻilo ki hono ʻuhingá. Naʻe kamata ke ne ʻalu ki he lotú, Mutualé mo e seminelí pea naʻá ne vakai ai ʻoku tatau pē mo au ʻa hoku ngaahi kaungāmeʻa Siasí kotoa ʻo mau maʻu ʻa e ngaahi tefitoʻi moʻoni tatau pē. Ko ia naʻá ne fili leva ke ne papitaiso.
ʻI hono papitaisó, naʻe kole ange ai ʻe he pīsopé ke ne fai ʻene fakamoʻoní. Naʻá ne tuʻu hake ʻo pehē ange: “ ʻOku ou ʻi heni he ʻaho ní koeʻuhí ko haku kaungāmeʻa pea mo e founga naʻá ne kehe ai mei he toenga ʻo e kakaí. ʻOku ou fakatauange ʻe mamata atu e kakaí ki he ngaahi liliu kotoa pē ʻoku hoko ʻiate kimoutolú foki.”
ʻOku ou fakatauange pē te tau feinga kotoa pē ke tau fakakaungāmeʻa ki he niʻihi kehé, ʻo tatau ai pē pe te nau saʻiʻia ʻiate kitautolu pe ʻikai. He ʻikai ke tau teitei ʻilo pe ko hai ʻe hoko ʻo meimei tatau mo kitautolu, ko ha mēmipa ʻo e Siasi moʻoni ʻo e ʻEikí.
Tā fakatātaaʻi ʻe John Zamudio