Ngaahi Talanoa mo e Fakamoʻoni ʻi he Nofo kemí
“Ko ia, fakahā ʻa e ngaahi meʻa kuó mo fanongo ki aí, mo tui moʻoni ki ai, pea ʻiloʻi ʻoku moʻoni” (T&F 80:4).
Tā e fafangú! Ko e fafangu fakaʻosi ia ʻo e ʻaho ako he efiafi Falaité. Ne u fakavave atu mei hoku tesí ki he matapaá. Ne fakaafeʻi au ʻe hoku kaungāmeʻa ko Kení fakataha mo ha ongo tamaiki tangata kehe ke mau kemi ʻi honau veʻe falé he pō ko iá. Ne u nofo ʻamanaki atu ki he meʻá ni ʻi ha uike ʻe ua.
ʻI heʻeku aʻu atu mei he akó, ne u tānaki hoku mohenga takaí (sleeping bag), pilo, kasa, ngaahi tohi talanoa fakatātā (comic books) pea mo ha kato ne faʻo ai ha fanga kiʻi meʻakai ifo. ʻI heʻeku aʻu atu ki he ʻapi ʻo Kení, ko e kamata fokotuʻu ia ʻe Keni mo ʻene tamaí ʻa e tēnití. Ne mau taufetongi hono tuki e ngaahi ʻakau fakamaʻu ʻo e tēnití ki he kelekelé.
Ne tunu leva ʻe he tamai ʻa Kení ha ngaahi hamipeeka, pea mau langatoi ʻi he ʻulu ʻakaú. ʻI he tō pē ʻa e laʻaá, ne mau fakamoʻui ʻemau maama kasá pea mau ʻalu atu ko e fekumi ki ha ngaahi meʻa pē.
Hili ha taimi mei ai, ne ui kimautolu ʻe he faʻē ʻa Kení ke mau foki mei he vaotā, ʻo ne talamai kuo taimi ke mau mālōlō ā he pō ko iá. Naʻa mau lele ki he loto tēnití, fofola homau mohengá pea feinga ke mau fiemālie. Ne ʻikai fuoloa kuo mau fevahevaheʻaki ʻemau fanga kiʻi meʻakaí pea fakafanongo ki he niʻihi ʻo e ngaahi talanoa fakaofo ʻo e ngaahi meʻa ne hoko kia Kení. Ne ʻai maʻu pē ʻe Keni ke mau hoko ko e kau helo ʻi heʻene talanoá. Ne mau lava maʻu pē ke puna pea naʻa mau fakahaofi maʻu pē kakai ʻo e ʻaho ko iá.
ʻI he fakaʻau ke fuoloa e poʻulí, kuo mau helaʻia kotoa pea kamata ke mau tule mohe. Ne u fanongo ki he tangi ʻa e heʻé he poʻulí, mo e lele hake ʻa e lēlué. Ne kamata ke u fakakaukau ki he ngaahi talanoa ʻa Kení. Ne u ʻiloʻi neongo ne lahi e ngaahi talanoa lelei ne fai mai ʻe Kení, ka naʻe ʻi ai ha talanoa mahuʻinga ne ʻikai ke ne ʻiloʻi. Ko e talanoa moʻoni ʻo Siosefa Sāmitá mo hono toe Fakafoki mai ʻo e ongoongoleleí. Ko e lahi ko ia ʻeku fakakaukau ki aí, ko e lahi ange ia ʻeku ʻiloʻi ʻoku totonu ke u vahevahe ʻa e talanoa makehé ni mo hoku kaungāmeʻá.
“ ʻE Keni, ʻokú ke kei ʻā?”
“ ʻIo. Ko e hā e meʻa ʻoku hokó?”
Ne kamata ke vave e tā hoku mafú peá u ongoʻi taʻefiemālie ka naʻá ku kei talanoa atu pē.
“Ko ʻeku kiʻi fie ʻilo pē. ʻOkú ke tui ki he ʻOtuá?”
Naʻá ne pehē mai, “ʻIo, tui moʻoni ki ai.”
“ ʻOkú ke tui ki he kau palōfita ʻi he Tohi Tapú?”
Ne tangutu hake ʻa Keni ʻi hono mohengá ʻo pehē mai, “ ʻIo.”
“Fēfē kapau te u talaatu ʻoku ʻi ai haʻatau palōfita moʻui ʻi māmani he ʻahó ni ʻo hangē pē ko ia ʻi he Tohi Tapú?”
“Ko e hā hoʻo ʻuhingá—ko ha palōfita hangē ko Mōsesé?”
“ ʻIo, ko ʻeku ʻuhingá ia.”
Naʻá ne pehē mai, “Kaekehe ko ha meʻa foʻou ia. Fakamatala angé ʻo kau ki aí.”
Ne kamata ke mole atu ʻeku ongoʻi taʻepaú ʻo fetongi ʻaki ia ha loto vēkeveke. Naʻá ku fakamatala ange kia Keni fekauʻaki mo e Palōfita ko Siosefa Sāmitá mo e founga hono toe fakafoki mai ʻo e ongoongoleleí ki he māmaní. Naʻá ku fakamatala ange fekauʻaki mo e palōfita moʻuí mo e kau ʻaposetolo ʻi māmani he ʻaho ní.
ʻI he ʻosi ʻeku fakamatalá, ne u ʻeke ange kia Keni pe ko e hā haʻane fakakaukau ki ai.
Naʻá ne fakalongolongo ʻi ha kiʻi taimi siʻi. “ ʻOku ou pehē ko ha talanoa fakaofo ia pea ʻoku fie maʻu ke u fakakaukau ki ai. ʻOkú ke tui moʻoni ki ai?”
“ ʻIo,ʻoku ou tui moʻoni ki ai.” Ne u ongoʻi māfana ʻi hoku lotó, pea naʻá ku ʻilo ne u lea ʻaki e meʻa ne fie maʻu ʻe he Tamai Hēvaní ke u lea ʻakí. Ne u lotu fakalongolongo pē ʻe fekumi ʻa Keni ʻiate ia pē ke ne ʻiloʻi ʻoku moʻoni e meʻa ne u lea ʻakí.
Ne u toki ʻilo ki mui ne lotu ʻa Keni ke maʻu ʻene talí. Naʻá ne vahevahe ʻa e meʻa naʻá ne ʻiló mo ʻene ongo mātuʻá. Ne vave ʻa e ʻako ʻe he fāmili ʻo Kení ʻa e ongoongoleleí pea nau faʻa fakataha mo e kau faifekaú. Ne ʻikai fuoloa kuo papitaiso kotoa e fāmili ʻo Kení pea hilifakinima kinautolu ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Neongo kuo ʻosi ha ngaahi taʻu lahi mei ai, ʻoku ou kei kaungāmeʻa lelei pē mo Keni. Naʻá ma fakatou ngāue fakafaifekau peá ma ako fakataha ʻi he ʻUnivēsiti Pilikihami ʻIongí. ʻOku ou fiefia naʻá ku tuku ha taimi ke vahevahe ʻa e ongoongoleleí mo hoku kaungāmeʻá.
Tā Fakatātā ʻa Richard Hull