Ngaahi Fakakaukau Maʻá e Efiafi Fakafāmili ʻi ʻApí

ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pe ʻi ʻapi foki. Te ke lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.

“Ko e hā e ʻUhinga ʻo e Fakaleleí Kiate Koé?” p. 14: Fakaafeʻi e kau mēmipa ʻo e fāmilí ke nau fakamatala ki he meʻa kotoa pē ʻoku nau ʻilo kau kia Nīfai. ʻEke ange pe ʻoku nau pehē ko e hā hono ʻuhinga naʻá ne fiefia aí neongo e ngaahi ʻahiʻahi faingataʻa naʻá ne fetaulaki mo iá (vakai, 2 Nīfai 5:27). Fakamatalaʻi fakanounou ʻa e konga ko e “Fiefia ʻi he Fakaleleí.” Aleaʻi e founga naʻe fakaleleiʻi ʻaki ʻe Nīfai ʻene ngaahi palopalemá pea ʻe lava fēfē ke fakaʻaongaʻi ʻe homou fāmilí ʻene foungá? Fakaʻosi ʻaki hano lau e ongo palakalafi fakamuimuitaha ʻo e fakamatalá.

“Akó mo e Kāingalotu ʻi he Ngaahi ʻAho Kimui Ní,” p. 26: Lau ʻa e fakamatalá kimuʻa pea fili ʻa e ngaahi palakalafi ko ia ʻe ʻuhingamālie taha ki homou fāmilí. Kole ki he kau mēmipa ʻo e fāmilí ke lau e ngaahi palakalafi kuo filifilí pea aleaʻi e meʻa kuo nau laú. Fakaʻosi ʻaki hano lau e ongo palakalafi fakamuimuitaha ʻo e fakamatalá.

“Ko e Ngaahi Palōmesi ʻa ha Palōfita,” p. K6: Hili hono lau e fakamatalá, tuku ke huke faʻiteliha pē ʻe he fāmilí ʻenau ngaahi folofolá pea feinga ke lau ha veesi lolotonga ko iá ʻoku fulihi keheʻi e tohi folofolá. Aleaʻi e founga ʻe lava ke tāpuakiʻi ai e mēmipa takitaha ʻo e fāmilí ʻi hono lau maʻu pē ʻo e folofolá. Toe lau e palōmesi ʻa Palesiteni ʻĒsela Tafu Penisoní (vakai ki he kamataʻanga ʻo e fakamatalá), pea fokotuʻu ha taumuʻa ke kei hokohoko atu ai pē hoʻomou lau fakataha e folofolá.

“Fiefia ke Ako,” p. K12: Fakaafeʻi e fānaú ke nau taufetongi ʻi hono fakatātaaʻi fakalongolongo ha faʻahinga ngāue maʻuʻanga moʻui, pea tuku ke mateʻi mai ia ʻe he toengá. Aleaʻi e meʻa ʻe fie maʻu ke ako ʻe he kau mēmipa ʻo e fāmilí kae lava ke nau fai ʻa e ngāue ko iá. Lau e talanoá. Talamai e ngaahi meʻa naʻe fie maʻu ke ʻilo ʻe Lāsolo kimuʻa pea toki lava ke ako ʻo kau ki he fanga tainasoá. Fakaʻosi ʻaki hano lau ʻo e Tokāteline mo e Ngaahi Fuakava 88:118.