Ko e Meʻafoaki ʻo e Poto ʻi he Laukongá mo e Tohí
Naʻe saiʻia ʻaupito homa foha lahi tahá he kinitakātení pea hangehangē pē naʻe lelei ʻene akó. Ka ʻi heʻene ʻi he kalasi tahá, naʻe mahino ʻaupito e ʻikai ke ne laukongá. Naʻá ne lava pē ʻo lau ha ngaahi foʻi lea ka naʻe faingataʻa ʻaupito ʻene kamata akoako laukongá. Ne ʻosi atu ha ngaahi māhina mo e ʻikai ha fuʻu fakalakalaka e laukonga homa fohá. Naʻe fakautuutu ai pē ʻeku hohaʻa mo hoku husepānití.
ʻI he ʻaho ʻe taha ne u manatuʻi ha meʻa naʻe akoʻi ʻe heʻeku palesiteni fakamisioná he ngaahi taʻu kimuʻa atú. Naʻe uiuiʻi au ke u ngāue fakafaifekau ʻi ha misiona naʻe lea muli. Naʻe tuʻunga kehekehe pē ʻa e faingataʻa hono ako ʻo e lea faka-Lūsiá ki he faifekau takitaha, pea naʻe faleʻi kimautolu ʻe heʻemau palesiteni fakamisioná ke mau lau e Tohi ʻa Molomona faka-Lūsiá ʻi he ʻaho kotoa pē. Naʻá he palōmesi mai ʻe tokoniʻi kimautolu ʻe he mālohi ʻo e Tohi ʻa Molomoná ke mau lava ʻo fetuʻutaki ʻi he lea faka-Lūsiá. Naʻá ne moʻoni pē. Naʻe ʻalu pē taimí mo e lelei ange ʻeku lea ʻaki mo mahino ʻa e leá kiate aú, pea naʻe tupulaki foki mo ʻeku fakamoʻoní.
ʻI he ʻosi ha ngaahi taʻu mei heʻeku ngāue fakafaifekaú, ne u fakakaukau ʻo pehē, “Kapau naʻe ʻaonga kiate au ʻi he lea faka-Lūsiá, ko e hā ka ʻikai ʻaonga ai ki hoku fohá ʻi he lea faka-Pilitāniá? Hili ʻeku fakamatalaʻi ki homa fohá ʻeku feinga ako lea faka-Lūsiá mo e faleʻi ʻa ʻeku palesiteni fakamisioná, ne ma fakatukupaaʻi ia mo hoku husepānití ke ne lau ʻa e Tohi ʻa Molomoná ʻiate ia pē ʻi he ʻaho kotoa pē. Naʻá ne fakamoleki ʻa e taimi ke fakaʻilongaʻi ai ʻa e foʻi lea ko e ʻOtuá mo e ʻEikí ʻi heʻene sio ki aí. Taimi siʻi pē naʻá ne hoko atu ki he Sīsuú. Hili iá naʻá ne fili ha ngaahi foʻi lea naʻá ne sio ai ʻo fehuʻi mai honau ʻuhingá. Naʻá ne fai fakamātoato ʻene laukonga fakaʻahó, pea ʻi he aʻu ki he fakaʻosinga ʻo e taʻú, kuo lelei ʻaupito e tuʻunga naʻe ʻi ai ʻene laukongá, ʻo mahulu ange ia he meʻa ne ma ʻamanaki atu ki aí.
ʻOku kalasi ono homa fohá he taimí ni. Ko e tokotaha laukonga lelei ʻaupito ia pea ʻokú ne tokoni ʻi hono akoʻi hono ngaahi tokoua mo e tuofāfine iiki angé, ʻo kau ki he meʻafoaki naʻá ne maʻu ʻi heʻene lau e Tohi ʻa Molomoná. Kuo fakatupulaki ʻe heʻema fānaú takitaha ha ngaahi poto faka-laukonga mālohi pea nau ʻulungāanga ʻaki hono lau e Tohi ʻa Molomoná. ʻOku kamata ʻeni ke nau ongoʻi ʻa e mālohi ʻo e laumālie ʻo e moʻoní ʻi he tupulaki ʻenau fakamoʻoní.