Hiva mo Fananga
ʻI he taimi ne uiuiʻi ai au mo hoku uaifi ko Senitulaá ke ma ngāue ʻi he Misiona ʻAfilika Tongá, ne ma kamata fekumi ki ha faʻahinga ngāue tokoni fakakolo ke fai. Kuo laka hake he taʻu ʻe 20 ʻeku kau ki he Kuaea ʻa e Tāpanekalé, pea tokoni hoku uaifí ʻi he laipelí, ʻo ne fakahoko e taimi fanangá ʻi ha kiʻi ako lautohi siʻi. ʻI he fakakaukau ʻemau palesiteni fakamisioná ke kamata e ngāue fakafaifekaú ʻi ha kolo ofi mai pē, ne ma ʻiloʻi ko homa faingamālié ʻeni.
Naʻá ma ʻaʻahi ki he koló ʻo ʻiloʻi naʻe ʻikai ha laipeli ia he ngaahi ʻapiakó, ka ko ha kiʻi laipeli fakakolo pē ʻi he loto koló. Naʻe fakafeʻiloaki kimaua ʻe he ongo ʻeletaá ki he talēkita ʻo e laipelí. Naʻá ma fakamatala ki he fefiné ʻema fie fai ha taimi fananga fakauike maʻá e fānaú. Naʻá ne fehuʻia eni, ka ʻi he hili pē haʻane fakakaukau ki ai, naʻá ne loto ke talatala holo peá ma ʻahiʻahi fakahoko ia.
Naʻe ʻalu ange ha fānau ʻe toko nima ʻi he ʻuluaki ʻahó. Naʻe faifai pē pea kiʻi tokolahi ange. Hili ha ngaahi māhina mei ai naʻá ma kole tokoni ki ha finemui toki papi ului naʻe lelei ʻaupito ʻene lea faka-Pilitānia mo faka-Sulú. Ne fakaʻau pē ʻo tokolahi e kau omi ki he taimi fanangá, pea naʻe fiefia e talēkitá mo e ngaahi mātuʻá ʻi he meʻa naʻe hokó.
Naʻe manako e kakai Sulú he hivá, ko ia naʻa mau fakalahi atu ʻaki ki heʻemau taimi fanangá ha fanga kiʻi hiva mo e maau faingofua pē. ʻI he fakaʻosinga ʻo ʻema ngāue fakafaifekaú, kuo lele ʻemau taimi hiva mo e fananga tuʻo tolu ʻi he uike ke lava ʻo kau atu ki ai ʻa e fānau ʻe toko 100 tupu naʻe ʻalu angé. Ko ha tāpuaki ia ʻema mamata ki he fānau ʻi ha ngaahi fonua kehe ʻoku nau kamata hiva ʻaki ʻetau ngaahi hivá mo lau mai ʻetau fanga kiʻi māú ka ma fanongo.
Ne maʻu mo ha tāpuaki kehe ʻi heʻema ngāue ʻi he feituʻu ko ʻení. ʻI he tupu tokolahi e kāingalotu ʻo e Siasí ʻi he koló peá ma fie maʻu ha feituʻu ke kamata fakahoko ai ʻemau ngaahi fakatahaʻanga ʻo e Sāpaté, naʻe talamai ʻe he talēkita ʻo e laipelí ʻe lava ke ma ngāue ʻaki taʻetotongi ʻa e laipelí.
ʻOkú ma fakamālō ʻi he tokoniʻi kimaua ʻe he ʻEikí ke maʻu ha founga ke fakaʻaongaʻi ai homa ngaahi talēnití, tokoni ki he koló, pea tokoni ʻi hono fakaava ʻo ha ʻēlia ʻo e misioná.