O Le Toasefululua
Ina ia avea le Ekalesia o Lana Ekalesia, e tatau lava ona i ai se Korama a le Toasefululua e umia ki.
I se taimi e le’i mamao ina ua mavae le tuumalo o Peresitene Gordon B. Hinckley, na faapotopoto faatasi ai alii e toa 14, o Aposetolo, o e ua uma ona faaee atu i o latou luga ia ki o le malo, i le afeafe aupitoaluga o le malumalu ina ia mafai ona toe faatulaga le Au Peresitene Sili a le Ekalesia. Sa le fesiligia lava le mea o le a fai, e leai se faatuai. Na matou iloa lava o le Aposetolo sinia o le Peresitene lea o le Ekalesia. Ma i lena fonotaga paia, na lagolagoina ai e le Korama a Aposetolo e Toasefululua ia le Susuga a Peresitene Thomas S. Monson o le Peresitene o le Ekalesia. Na ia tuuina mai ma faailoa mai ona fesoasoani. Sa faapea foi ona lagolagoina i laua, ona faauuina ai lea o i latou taitoatasi ma tuuina atu i ai le pule. Na faapitoa lava ona tuuina atu le pule ia Peresitene Monson e faaaoga ai ki uma o le pule o le perisitua. O lenei, e pei ona tuuina mai e tusitusiga paia, ua na o ia lava le tagata i luga o le fogaeleele ua i ai le aia tatau e faaaoga ai ia ki uma. Ae o loo umia [ki] e i matou uma i le avea ai o ni Aposetolo. E toatasi lava le tagata o i matou e valaauina ma faauuina, ma e avea o ia o le Peresitene O Le Ekalesia a Iesu Keriso o le Au Paia o Aso e Gata Ai. Ua uma ona lagolagoina o ia i tausaga e tele o se perofeta, tagatavaai, ma talifaaaliga.
O le valaauina o Peresitene Uchtdorf i le Au Peresitene Sili, ua tulai mai ai se avanoa i le Toasefululua, ma o ananafi na tatou lagolagoina ai se sui fou o le Korama a le Toasefululua, o Elder D. Todd Christofferson. Ua i ai faatasi nei o ia i lena usoga paia i lena lio paia, ma ua toe atoa ai nei le lio. O le valaauga o le avea ma se Aposetolo e toe foi lava i tua i le Alii o Iesu Keriso.
Sa tatou lagolagoina ai foi se vaega o le Au Fitugafulu. Ua latou nofoia nei o latou nofoaga. Ua tuuina mai e tusitusiga paia e faapea, o le tiute a le Korama a le Toasefululua le taitaia o mataupu uma o le Ekalesia, ma pe a latou manaomia le fesoasoani, e ao ona latou “valaauina le Au Fitugafulu … a e le o nisi.”1 Ma o lenei ua valu a tatou Korama a le Au Fitugafulu ua taape i le lalolagi atoa, e sili i le 300 Fitugafulu, o i latou uma o loo umia le pule tatau e fai ai soo se mea e talosagaina ai i latou e le Toasefululua e fai.
Na faatulagaina e le Alii lava Ia lenei mamanu faaletaitaiga:
“Ua maliu ae ai o ia i le mauga e tatalo, ua aoina lana tatalo i le Atua.
“Ua ao foi, ona valaau atu lea o ia i ona soo: ua filifilia e ia ni o latou e toasefulu ma le toalua, ua faaigoa foi i latou e ia o aposetolo.”2
Na faalogo Aneterea ia Ioane ona momo’e atu ai lea i lona uso o Simona ma fai atu, “Ua ma maua le Mesia… .
“… Ua ia aumaia foi o ia ia Iesu. Ua silasila atu Iesu ia te ia, ona fetalai atu lea, O Simona oe, le atalii o Iona: o le a igoa oe ia Kefa, o lona uiga, O se maa.”3
O Simona ma lona uso o Aneterea na lafo a laua upega i le sami; o Iakopo ma Ioane o atalii o Sepetaio na fonofono ia masaesae o la latou upega; o Filipo ma Patolomaio; o Mataio, o se telona po o se ao lafoga; o Toma; o Iakopo le atalii o Alefaio; o Simona le Kanana; o Iuta le uso o Iakopo; ma Iuta le Sekara—o i latou ia na aofia i le Korama a le Toasefululua.4
Na fetalai atu o Ia ia i latou uma, “Ina mulimuli mai ia ia te au.”5
Na fetalai atu o Ia ia Peteru, “Ou te avatu foi ia te oe ki o le malo o le lagi: o se mea foi e te fusifusia i le lalolagi, e fusifusia foi lea i le lagi: o se mea foi e te tala i le lalolagi e tatalaina foi lea i le lagi.”6
Ma na Ia fetalai atu i le Toasefululua, “O lē talitonu mai ia te au, e faia lava e ia o galuega ou te faia; e fai foi e ia mea e sili i ia mea; aua ou te alu i lo’u Tama.”7
Na Ia tuuina atu i Ana Aposetolo “le mana ma le pule i temoni uma, ma ia faamalolo i ma’i. Ua aauina atu i latou e ia e talai i le malo o le Atua, e faamalolo foi i e mamai … i mea uma.”8
Ma ua Ia fetalai mai, “[O le] Toasefulu ma le Toalua lea o loo taofia ki e tatalaina ai le pule o lo’u malo i tulimanu e fa o le lalolagi, a e mulimuli ane latou te auina atu la’u upu i tagata uma.”9
Na fesili atu Iesu i se tasi taimi i Ona soo, “Pe se a le upu a tagata ia te au le Atalii o le tagata, po o ai? …
“Ona tali mai ai lea o Simona Peteru, ua faapea mai, O oe o le Keriso, o le Alo o le Atua soifua.”10
Ina ua aoao atu Iesu i totonu o sunako, na fai mai le toatele o le au soo, “O le upu faigata lena; o ai ea se na te mafaia ona faalogologo i ai? …
“Talu ai ua o ese isi o ona soo e toatele i tua, a e lei toe feoai i latou ma ia.
“Ona faapea atu lea o Iesu i le toasefulu ma le toalua, Pe tou te fia o ese foi?
“… Ona tali atu lea o Simona Peteru ia te ia, Le Alii e, a matou o ea ia te ai? O ia te oe upu o le ola e faavavau.”11
Ina ua mavae le Faasatauroga, na manatua e le au Aposetolo na fetalai atu o Ia e ao ona latou nonofo pea i Ierusalema.12 Ona oo mai lea o le aso o le Penetekoso, o le mea maoae na tupu ina ua latou maua le Agaga Paia.13 Sa latou maua “le upu o le valoaga e sili lona mausali” 14 ma “na talatalaina mai ina ua osofia mai e le Agaga Paia.”15 Ma na faapea loa ona faaatoatoaina ai i latou.
E itiiti lava se mea ua tatou iloa e uiga ia latou malaga, ma e itiiti foi ni nofoaga ma ni auala na maliliu ai se vaega toaitiiti o i latou. O Iakopo na fasiotia i Ierusalema e Herota. O Peteru ma Paulo na maliliu i Roma. Fai mai le talitonuga e faapea o Filipo na malaga i Sasae. E tele atu nisi mea tatou te le o iloa e ese mai i nei mea.
Na latou taapeape; na latou aoao atu, ma molimau atu, ma faatuina le Ekalesia. Ma na maliliu i latou mo o latou talitonuga, ma ina ua maliliu i latou, o lea na oo mai ai seneturi pogisa o le liliuese.
O le mea aupito sili ona taua na leiloa i le Liliuese o le pule na umia e le Toasefululua—o ki o le perisitua. Ina ia avea le Ekalesia o Lana Ekalesia, e tatau lava ona i ai se Korama a le Toasefululua e umia ki ma faaee atu ia [ki] i luga o isi.
Na oo mai le taimi, na oo mai ai le Uluai Faaaliga ma le toefuataiga o le Perisitua Mekisateko e ala mai ia Peteru, Iakopo, ma Ioane.16
Na ta’u atu mulimuli ane i le Au Peresitene Sili ma le Korama a le Toasefululua e faapea:
“Aua e moni ou te fai atu ia te outou, o ki o lenei augatupulaga, ua outou maua, ua tuufaasolo mai i tamā, a e mulimuli lava, ona auina ifo mai le lagi ia te outou.
“… Faauta i le taua o lo outou valaaulia. Ia faamama o outou loto ma o outou ofu, ina nei faamasinoina outou i le toto o lenei tupulaga.”17
Na fou lava le Ekalesia toefuataiina a Iesu Keriso o le Au Paia o Aso e Gata Ai i le taimi na faatulagaina ai le Au Peresitene Sili, sosoo ai ma le Korama a Aposetolo e Toasefululua, lea na aofia ai ni tamalii masani, ma na sosoo ai ma Korama a le Au Fitugafulu. O le averesi o le matutua o lena uluai Korama a le Toasefululua o le 28 [tausaga].
Na i ai lava se laina e le’i motusia o le pule. O ki o le perisitua na tuuina atu i le au Aposetolo, sa umia lava i taimi uma e sui o le Au Peresitene Sili ma le Korama a le Toasefululua.
O ananafi na avea ai le susuga ia Elder D. Todd Christofferson ma Aposetolo lona 96 e auauna atu i le Toasefululua i lenei tisipenisione. O le a faauuina o ia o se Aposetolo ma tuuina i ai ki uma o le perisitua na faaeeina i luga o isi perofeta, tagatavaai ma talifaaaliga e toa 14—o ni Aposetolo a le Alii o Iesu Keriso.
O le 1976, sa faia ai e konafesi aoao faale-eria i Copenhagen, Tenimaka. Ina ua mae’a le sauniga mulimuli, na naunau Peresitene Spencer W. Kimball e asiasi atu i le Falesa o Vor Frue o loo i ai faatagata o Keriso ma le Au Aposetolo e Toasefululua na vaneina e Thorvaldsen. Sa asiasi atu i ai o ia iina i ni tausaga na muamua atu ma sa manao o ia matou te o i ai iina, ina ia matou vaai uma i ai.
I le pito i luma o le falesa, i tua mai o le fata faitaulaga, o loo tu ai se faatagata masani o Keriso ma Ona aao o loo faataliaga mai e pei o loo faaloloa i luma, o aao o loo vaaia ai tulaga fao, ma na matuai iloa lelei atu lava le manua o loo i Lona itu. I autafa o ona itu taitasi o loo tutu ai faatagata o Aposetolo, o Peteru i le pito i luma i le itu taumatau ma isi Aposetolo i le faasologa sa’o.
O le toatele o la matou vaega sa latalata i le pito i tua o le falesa faatasi ma le teufale. Sa matou tutu i le pito i luma ma Peresitene Kimball faatasi ai ma Elder Rex D. Pinegar ma Johan Helge Benthin, o le peresitene o le siteki a Copenhagen i luma o le faatagata o Peteru.
I le lima o Peteru, na i ai se seti o ni ki mamafa na vaneina i le mapu. Na tusi atu le lima o Peresitene Kimball i na ki ma faamatala mai lo latou faauigaga. Ma, i se gaoioiga o le a le mafai ona ou faagaloina, na liliu atu o ia i a Peresitene Benthin ma faatasi ai ma se malosi e le masani ona ou vaaia, na tusi atu lona lima ia te ia ma saunoa atu, “Ou te manao e te tauina atu i tagata uma i Tenimaka, o loo ou umia ia ki! O loo tatou umia ia ki moni, ma tatou te faaaogaina i aso uma.”
O le a le galo lava ia te au lena tautinoga, lena molimau mai le perofeta. O le aafiaga sa matuai mamana faaleagaga; o le lagona sa faaletino i lona aafiaga.
Na matou savavali atu i le pito i tua o le falesa na faapea ona i ai uma le matou vaega. Na tusi e Peresitene Kimball lona lima i faatagata ma fai atu i le teufale agalelei, “O Aposetolo nei ua maliliu.” Sa tusi mai lona lima ia te au, ma fai atu, “Ua i ai iinei ia Aposetolo soifua. O Elder Packer o se Aposetolo. O Elder Thomas S. Monson ma Elder L. Tom Perry o ni Aposetolo, ma o a’u o se Aposetolo. O i matou o Aposetolo soifua.
“Na e faitau e uiga i le Au Fitugafulu i totonu o le Feagaiga Tuai, ae ua i ai iinei ni Fitugafulu soifua se toalua, o Elder Rex D. Pinegar ma Elder Robert D. Hales.”
O le teufale, o lē na oo lava i lena taimi e le’i faaalia ni ona lagona, na faafuasei ona maligi ona loimata.
Na ou lagona, na ou maua se aafiaga faapitoa o lo’u olaga atoa.
“Matou te talitonu i le faatulagaga sa i ai le Ekalesia Anamua, e i ai aposetolo, perofeta, epikopo, aoao, peteriaka, ma isi tofiga faapena.”18
Pe a faauuina le au Fitugafulu, e ui lava e le faauuina i latou o ni Aposetolo pe latou te umia foi ia ki, ae ua i ai ia i latou le pule, ma o le Toasefululua “e valaauina le Au Fitugafulu, a e le o nisi pe a tatau ia i latou se fesoasoani, e faataunuuina valaaulia mo le talaiga, ma le taitaiga o le talalelei.”19
O le taimi nei, o loo i ai Fitugafulu e 308 i korama e 8. O loo fai i latou ma sui o atunuu e 44 ma e 30 gagana latou te saunoa ai.
Tatou te le faalogo o faaaoga ia ki o le perisitua i isi lotu Kerisiano. E foliga mai e ese lava le faamatalaina o i tatou e nisi fai mai e le [o i tatou] o ni Kerisiano, ae ua na o i tatou lava o loo i ai le pule ma le faatulagaga na Ia faavaeina.
O le Toasefululua o loo i ai nei, o ni tagata masani lava. E pei i latou o le Toasefululua na i ai muamua, e le tulaga ese taitoatasi, ae a tuufaatasi o le Toasefululua o se vaega ua i ai se mana tele.
E matou te o mai i ni galuega eseese. O matou o saienitisi, loia, faiaoga.
O le susuga a Elder Nelson o se fomai paionia tipitipi o le fatu. Sa ia faatinoina le faitau afe o taotoga. Na saunoa mai o ia ia te au, na ia tuuina atu i gasegase ma’i fatu uma se faamautinoaga i lana galuega o le a tata pea o latou fatu seia iu o latou soifua.
O nisi o lenei Korama o tamalii sa galulue i le militeli—o se seila, marini, pailate.
Na latou umia tulaga tofi eseese i le Ekalesia: faiaoga o aiga, faiaoga, faifeautalai, peresitene o korama, epikopo, peresitene o siteki, peresitene o misiona, ae aupito i taua lava, o ni tane ma ni tamā.
O i latou uma o tagata aooga ma faiaoga o le talalelei a Iesu Keriso. O le mea e soofaatasi ai i matou o lo matou alolofa lea i le Faaola ma fanau a Lona Tama ma la matou molimau e faapea, o loo tu o Ia o le ao o le Ekalesia.
E toetoe lava o le Toasefululua uma e o mai mai ni amataga faatauvaa, e pei lava ona sa i ai ao i ai o Ia iinei. Ua fusimauina faatasi le Toasefululua o loo soifua i le galuega o le talalelei a Iesu Keriso. Ina ua oo mai le valaaulia, na lafoai e le tagata lana upega e pei ona ta’ua, o se faatusa i ai, ma mulimuli atu i le Alii.
E manatuaina lava Peresitene Kimball i lana saunoaga, “E pei lava lo’u olaga o o’u seevae—ia uma lava le aoga i le galuega.”20 O lena saunoaga ua faatatau lava i sui uma o le Toasefululua. E uma foi o matou aoga i le galuega a le Alii ma matou te faia ma le loto i ai. E le o se olaga faigofie mo i matou po o o matou aiga.
E le mafai e upu ona faamatalaina le sao, auaunaga, ma osigataulaga o loo tuuina mai e faletua o taitai perisitua i le lalolagi atoa.
I se taimi ua mavae, na faia ai ni taotoga e sili ona tiga o lo’u toalua faapea ma Sister Ballard. Ua tau fai manuia uma i laua; e leai se isi na faaseā. O le latalata na oo i ai lo’u toalua e faaseā o le, “E le malie lenei mea!”
“O le tiute foi o le Toasefulu ma le Toalua”—i lalo o le taitaiga a le Au Peresitene Sili—“o le faauuina ma faatulaga tonu o isi taitai uma o le ekalesia, e tusa ma le faaaliga.”21
Ua i ai nei ia i tatou auala e mafai ona tatou aoao atu ai ma molimau atu ai i taitai ma tagata o le ekalesia i le lalolagi atoa e ala i masini faaeletonika. Ae peitai, ina ia mafai ona faaee atu ki o le pule i lena laina e le motusia i luga o taitai perisitua, “e ala i le faaee atu o lima,”22 po o fea lava o latou i ai i le lalolagi, e tatau lava ona i ai se tasi o i matou iina i taimi uma.
Ua fetalai mai le Alii, “O lenei foi, ou te fai atu ia te oe, ai se e te auina atu i lo’u igoa, i le filifiliga a ou uso, le Toasefulu ma le Toalua, ua tauleleia ma tofia tatau e oe, o le a i ai le mana e tatala ai le faitotoa o lo’u malo i soo se atunuu tou te aauina atu i ai latou.”23
Ua faamatalaina i tusitusiga paia le Toasefululua o “fautua femalagaa’i.”24
Ua le ese mai a’u mai le Usoga o le Toasefululua ma le Au Fitugafulu ma le Au Epikopo na faapea ona matou galulue faatasi mo nei tausaga e 47 pe afai ou te faapea atu, ua faaalia i faamaumauga ua silia i le faa-75 ona ou oo i Mekisiko ma Amerika Tutotonu ma Amerika i Saute, ua silia i le faa-50 i Europa, faa-25 i Kanata, faa-10 i atumotu o le Pasefika, faa-10 i Asia, faa-4 i Aferika; ae faalua i Saina; i Isaraelu, Saudi Arabia, Bahrain, o le Ripapelika Tominika, Initia, Pakisitana, Aikupito, Initonesia, ma le anoano o isi atunuu o le kelope. O isi ua sili atu nai lo lea ia atunuu ua faimalaga i ai.
E ui ina umia e le Au Aposetolo ia ki uma o le perisitua, ae ua tutusa lava taitai ma tagata o le ekalesia, e mafai ona latou maua ia faaaliga patino. E moni, e tatau ona latou sailia e ala i le tatalo ma galulue i ai e ala i le faatuatua.
“Aua ua … maua e i tatou uma ona o ia o le taitaiga i le Tama, e le Agaga e toatasi.
“O lenei, e le toe tagata ese outou po o e ua aumau, a ua nuu faatasi ma le au paia, o le aiga foi o le Atua;
“O loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.”25
Ia atonu e manatu ifo Elder Christofferson e pei foi ona ou faia, aisea ua faauuina ai se tagata e pei o a’u i le galuega paia faaaposetolo.
E tele tulaga o le agavaa ou te lei mauaina. E matuai tele sa’u taumafaiga e auauna atu ou te lei mauaina. Ae na o le pau lava le mea e tasi, e tasi lava le agavaa e mafai ona faamatalaina ai. E pei lava o Peteru ma isi ua faauuina talu mai lena taimi, ua ia te au foi lena molimau.
Ua ou iloa o le Atua o lo tatou Tama. Sa Ia faailoa mai Lona Alo o Iesu Keriso, ia Iosefa Samita. Ou te tautino atu ia te outou e faapea, ua ou iloa o Iesu o le Keriso. Ua ou iloa o loo soifua o Ia. Na soifua mai o Ia i le vaeluaga o taimi. Sa Ia aoao atu Lana talalelei ma na faamasinoina [o Ia]. Sa puapuagatia ma sa faasatauroina ma toetu mai i le aso tolu. O Ia foi, e pei o Lona Tama, o loo i ai se tino o aano ma ivi. Na Ia faia Lana Togiola. O au ou te molimau ia te Ia. O au o se molimau ia te Ia. Ou te molimau atu ai i le suafa o Iesu Keriso, amene.