Siona i le Totonugalemu o Papelonia
Tatou te le tau faataitaia ia tulaga, o tu ma aga a Papelonia. E mafai ona tatou fausia Siona i le totonugalemu o Papelonia.
O le taumafanafana talu ai, na ma maua ai ma lo’u toalua se avanoa e malaga atu ai i San Diego, Kalefonia, ma o iina na ma matamata ai i le tala a Shakespeare o le Macbeth i le Faletifaga o le Old Globe. E lua faaaliga na ma matamata ai, ona o lo ma afafine o Carolyn o se tasi o faataulaitu e toatolu o le tala. Ioe, sa ma fiafia lava i le vaaia o ia i le tala ma sa sili foi ona ma fiafia i le taimi na ia ta’ua ai na faamatalaga lauiloa: “A mainiini o’u lima matua, / E i ai se mea leaga o le a tupu mai” (act 4, scene 1, lines 40–41).
Ina ua ou faalogo i lena tala, na ou mafaufau faapea, o le a aoga tele le i ai o se masini e vave lapata’ia ai, e ta’u maia ia i tatou le oo mai o le tiapolo, ina ia mafai ona tatou saunia i ai. O loo agai mai le tiapolo ia i tatou, e tusa lava pe i ai pe leai foi sa tatou masini e vave lapatai mai ai.
Sa i ai se isi taimi, na ma tietie ai ma lo’u toalua e taamilo atu i se isi itu o le atunuu i se tasi po, ma na ma latalata atu i se taulaga tele lava. A o ma a’ea’e atu ma vaaia ai le susulu o moli i le tafailagi, na ou euina lo’u toalua e ala i luga ma sa ou faapea atu, “Vaai i le nuu o Papelonia!”
E moni, e leai se aai faapitoa i aso nei e faatusa i ai Papelonia. O Papelonia na i ai i le taimi o Isaraelu anamua, o se aai na avea ma tuinanau o le tino, amioleaga ma piopio. O le fale autu na i ai i le aai o se malumalu e tapuai ai i se atua ese, lea e masani ona tatou ta’ua o Pele po o Paala.
Ae ui i lea, o lena tuinanau o le tino, piopio ma le amioleaga, ma le ifo i atua ese, o le a vaaia i le tele o aai, tetele ma laiti, ua salalau i le lalolagi atoa. E pei ona fetalai mai le Alii: “Latou te le saili i le Alii ia faatuina lana amiotonu, a ua taitoatasi le tagata ma savali i lona lava ala, ma e tusa ma le faatusa o lona lava atua, o lona faatusa lea e i foliga o le lalolagi” (MFF 1:16).
Ua toatele naua tagata o le lalolagi ua foliga ia Papelonia o anamua, e ala i lo latou savavali i o latou lava ala, ma le mulimuli atu i se atua “o lona faatusa ua pei lava o le lalolagi.”
O se tasi o luitau sili o le a tatou feagai o le mafai lea ona tatou ola ai i lena lalolagi, ae i se isi itu, ia le avea ma ni e o le lalolagi. E tatau ona tatou fausia Siona i le totonugalemu o Papelonia.
“Siona i le totonugalemu o Papelonia.” O le fuaitau susulu ma malamalama, e pei o se malamalama e susulu i le totonugalemu o le pogisa faaleagaga. O se manatu e tatau ona tuu i o tatou loto, a o tatou vaaia le faateleina o le salalau atu o Papelonia. Tatou te vaaia Papelonia i o tatou taulaga; tatou te vaaia Papelonia i o tatou alalafaga; tatou te vaaia Papelonia i soo se nofoaga.
Ma faatasi ai ma le tuputupu ae o Papelonia, e tatau ai ona tatou fausia Siona i lona totonugalemu. E le tatau ona tatou faatagaina i tatou lava ina ia lofituina i aafiaga leaga o loo siomia i tatou. E seasea ona tatou iloa le tele o le faatosinaina o i tatou e le lalolagi o siomia ai i tatou, i mea o tatou nonofo ai, ma pe o anafea foi.
I vaitaimi o Isaraelu anamua, o le nuu o le Alii na pei o se laueleele mo le Atua moni e toatasi, na siomia e le sami o le ifo i tupua. O galu o lena sami na le malolo le fafati i luga o matafaga o Isaraelu. E ui lava i le poloaiga ina ia aua nei faia ni tupua ua ta e ifo atu i ai, ae na foliga mai sa le mafai lava e Isaraelu ona taofia ia lava, ona o faatosinaga o tu ma aga a nuu ma taimi na i ai. Na faia pea lava pea—e ui ina faasaina e le Alii, e ui i mea na ta’u atu e perofeta ma ositaulaga—e Isaraelu le saili atu i atua ese, e ifo i ai.
Na mafai faapefea ona galo ia Isaraelu le Alii o le na aumaia i latou mai Aikupito? Sa le aunoa ona uunaia i latou e mea na lauiloa i le siosiomaga na latou nonofo ai.
Oka se mea ina a pepelo ma taufaasese o aganuu a lenei lalolagi tatou te lotolotoi ai. Ua lofia ai lo tatou siosiomaga, ma ua tatou manatu ua tatou tonu ma sa’o, ae o le tele o taimi, ua tatou aafia i uiga o tu ma aga masani, lea e ta’ua e tagata Siamani o le zeitgeist, po o tu ma aga o o tatou nofoaga ma taimi.
Talu ai ona sa ma maua ma lo’u toalua se avanoa e nonofo ai i ni atunuu eseese se 10, na ma vaaia ai aafiaga o uiga faaalia i tu ma aga i amioga [a tagata]. O tu ma aga e taliaina lelei i se isi aganuu, e vaaia le le taliaina i se isi atunuu; o gagana e faaaloalo i nisi o nofoaga e vaaia le inosia i nisi atunuu. O tagata i atunuu uma lava e fegasoloai i totonu o se pa puipui o le faamalieina o le tagata lava ia i le faaseseina o ia lava, ma ua talitonu atoatoa faapea o le tulaga lava ua latou vaai ma talitonu ai i mea, o le ala tonu foi lena.
O la tatou aganuu e taumafai e filifili po o a meaai tatou te fiafia i ai, auala e fai ai o tatou lavalava, po o a mea e maua ai se amio faaaloalo, o a taaloga e tatau ona tatou tulitulimata’i, po o le a le ituaiga musika e tatau ona tatou fiafia i ai, o le taua o aoaoga, ma o tatou lagona e uiga i le faamaoni. E ta’a’ina ai foi alii pe taua gaoioiga faafiafia po o le ekalesia, e ta’a’ina ai foi tamaitai e uiga i mea e ao ona faamuamua po o le galuega po o le tausiga o fanau, ma e i ai se aafiaga malosi i le ala tatou te talanoaina ai le mana o le foafoaga ma mataupu o le ola mama. O le tele o taimi, e pei ai i tatou o ni papeti e nonoa i se manoa, ona ua filifili e a tatou aganuu lea mea e “manaia.”
Ioe, o loo i ai se zeitgeist lea e tatau ona tatou gauai atu i ai, ma o lena mea o tu ma aga masani a le Alii, o le aganuu a le nuu o le Atua. E pei ona ta’ua e Peteru, “A o outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai; ina ia outou ta’uta’u atu ona lelei na ia valaau ia te outou nai le pouliuli e oo i lona lava malamalama e matua ofo ai” (1 Peteru 2:9).
O tu ma aga a i latou o e tausi i poloaiga a le Alii, ma savavali i Ona ala ma “ola i upu uma e oo atu mai le fofoga o le Atua” (MFF 84:44). Afai e avea ai i tatou ma ni tagata tulaga ese, ia fai ai faapena.
O lo’u aofia ai i le fausiaina o le malumalu o Manhattan, na ou maua ai le avanoa ou te i ai i totonu o le malumalu i le tele o taimi a o lei faapaiaina. E manaia le nofonofo ai i totonu o le potu selesitila, ma i ai iina i le filemu atoatoa, e aunoa ma se pao e tasi e lagona atu mai auala pisi o Niu Ioka. E faapefea ona matuai filemu ma faaaloalo ia totonu o lena malumalu, ae ua na o ni iata le mamao mai le vevesi ma le pisi o le taulaga tele?
O le tali na i ai i le mamanuina o le malumalu. Na fausia le malumalu i totonu o puipui o se fale na i ai lava, ma o puipui pito i totonu o le malumalu na sosoo atu i puipui pito i fafo i ni nai sooga laiti. O le auala lena na faatapulaa ai e le malumalu (Siona) ia aafiaga o Papelonia, po o le lalolagi i fafo.
Atonu o loo i ai se lesona iina mo i tatou. E mafai ona tatou fausia se Siona moni ia i tatou lava, e ala i le faatapulaaina o le mamao e mafai ai e Papelonia ona faatosina i o tatou olaga.
Ina ua sau Nepukanesa pe a ma le 600 [T.L.M.] tausaga a o lumanai Keriso, mai Papelonia ma faatoilalo Iuta, na ia ave faatagataotauaina tagata o le Alii. Na filifili e Nepukanesa ia nisi o alii talavou mo se a’oga ma se aoaoga faapitoa.
O i latou e aofia ai ma Tanielu, Hanania, Mesaelu ma Asaria. O i latou ia o le a sili ona manaomia mai tagata talavou uma na aumaia i Papelonia. Na faatonuina i latou e le auauna a le tupu e tatau ona aai i meaai ma inu i uaina a le tupu.
Ia tatou malamalama lelei i le faigata na i ai nei alii talavou e toafa. Na ave faatagataotaua i latou e se pule na faatoilaloina [lo latou malo], ma na i ai i le aiga o le tupu o le na umia le pule ia i latou, o le ola po o le oti. Ae peitai na mumusu Tanielu ma ona uso e fai le mea na latou talitonu e sese, e ui ina talitonu le aganuu faaPapelonia e sa’o. Ma ona o lena faamaoni ma le lototele, na faamanuiaina ai i latou e le Alii ma “foai ia te i latou le faautauta ma le atamai i tusi uma lava atoa ma le poto” (Tanielu 1:17).
O le taitai seseina e a tatou aganuu, e masani ai ona faigata ona tatou iloa lo tatou ifo i tupua, a o tosoina o tatou manoa e na mea lauiloa o le lalolagi faaPapelonia. E moni ai, e pei ona ta’ua e le tusi solo o Wordsworth: “Ua tatou pupu i mea o le lalolagi” (“The World Is Too Much with Us; Late and Soon,” i le The Complete Poetical Works of William Wordsworth [1924], 353).
I lana tusi muamua, na tusi ai e Ioane:
“Ua ou tusi atu ia te outou … aua o malolosi outou, o loo tumau foi ia te outou le afioga a le Atua, ua outou manumalo foi i loo leaga.
“Aua tou te mananao i le lalolagi, po o mea o i ai i le lalolagi” (1 Ioane 2:14–15).
Tatou te le tau faataitaia ia tulaga, o tu ma aga a Papelonia. E mafai ona tatou fausia Siona i le totonugalemu o Papelonia. E mafai ona fai a tatou lava tulaga mo musika, ma tusi faitau, ma siva, ma tifaga, ma gagana. E mafai ona fai a tatou lava tulaga mo lavalava ma amioga, mo le ava ma le faaaloalo. E mafai ona tatou ola e tusa ai ma tulafono a le Alii. E mafai ona tatou faatapulaaina le tele o le Papelonia tatou te faatagaina i totonu o o tatou aiga e ala i auala o faasalalauga.
E mafai ona tatou ola e pei o se nuu o Siona, pe a tatou mananao i ai. Mata o le a faigata? O lea lava, aua o le a le mapu le fafati mai o galu a Papelonia i o tatou laufanua. Mata o le a manaomia ai le lototoa? O lea lava.
E masani ona tatou fiafia i tala o le lototoa, o i latou o e na fetaiai ma faigata taufaamatau ma faapea ona manumalo ai. O le lototoa o le autu ma le faavae o isi o tatou uiga uma; o le leai o se lototoa e tuuitiitia ai isi uiga uma o loo ia i tatou. Afai tatou te mananao ia i ai Siona i le totonugalemu o Papelonia, o le a tatou manaomia le lototoa.
Pe na e mafaufau ea pe a oo mai le tofotofoga, o le a e faia se gaoioiga o le lototoa? Ou te iloa na ou faia a’o ou laitiiti. Na ou mafaufau ua aafia se tagata i se tulaga faigata, ma, i se tulaga e lamatia ai lo’u lava ola, na ou laveaiina ai o ia. Po o se feupuaiga matautia ma se fili taufaamatau, na ou maua le lototoa e faatoilaloina ai. O o tatou mafaufauga faatalavou na!
Ua toeitiiti atoa le 70 o tausaga o le ola ua aoaoina ai a’u faapea, o na avanoa e avea ai ma toa, e itiiti lava ma e seasea foi ona tupu, pe afai e i ai.
Ae o avanoa e tu atu ai mo le mea sa’o—a o laiti ia uunaiga, ma pe a uunaia foi i tatou e a tatou uo ina ia gauai atu i le ifo i tupua o o tatou taimi—o na mea e faalausosoo ona oo mai. E leai se pue ata e i ai iina e pueina le avea ma toa, e leai se tusitala na te faasalalauina i le itulau pito i luma o se nusipepa. Ae e na o le manatunatu filemu o o tatou mafaufau, o le a tatou iloa ai, na tatou fetaiai ma le tofotofoina o le lototoa: O Siona po o Papelonia?
Ia aua lava nei sese ai: o le tele lava o Papelonia, po o Papelonia uma foi, e leaga. Ma o le a le mainiini o tatou lima matua e lapata’ia i tatou. Ae o le a sau lea galu ma lea galu, ma fafati mai i o tatou matafaga. Mata o Siona lea, po o Papelonia?
Afai o Papelonia o le nuu o le lalolagi, o Siona o le nuu o le Atua. Na fetalai mai le Alii e uiga ia Siona: “E le mafai foi ona atiina ae Siona, vagana e fai ai mataupu faavae o le tulafono a le malo selesitila” (MFF 105:5) ma, “O Siona lenei—o e loto mama” (MFF 97:21).
Po o fea lava tatou te i ai, po o fea foi le nuu tatou te nonofo ai, e mafai ona tatou fausia la tatou lava Siona e ala i mataupu faavae o le malo selesitila, ma taumafai pea ina ia avea ma e loto mama. O Siona o le matagofie, ma e umiaina e le Alii i Ona lava aao. E mafai ona avea o tatou aiga ma nofoaga o le sulufaiga ma se puipuiga, e pei foi ona i ai Siona.
E le tatau ona avea i tatou o ni papeti i lima o tu ma aga o atunuu ma taimi. E mafai ona tatou lototetele ma e mafai ona [tatou] savavali i ala o le Alii, ma mulimuli i Ona tulaga aao. Ma a tatou faia lea mea, o le a ta’ua i tatou o Siona, ma o le a avea i tatou ma nuu o le Alii.
Ou te tatalo ina ia faamalolosia i tatou e tetee atu ai i nofoaga o Papelonia, ma e mafai ona tatou fausia Siona i totonu o o tatou aiga ma nuu —ioe, ina ia i ai “Siona i le totonugalemu o Papelonia.”
Tatou te sailia Siona aua o le afioaga lea o lo tatou Alii o Iesu Keriso, lo tatou Faaola ma le Togiola. I Siona ma e mai foi i Siona, o le a susulu atu ai lona malamalama, ma o le a taitai o Ia e faavavau. Ou te molimau atu o loo soifua o Ia ma e alofa ia i tatou, ma o le a [Ia] puipuia i tatou.
I le suafa o Iesu Keriso, amene.