E Filifili Mo I Tatou Lava: O Le Meaalofa ma Faamanuiaga o le Saolotoga
O le saolotoga e faaaogaina ma le amiotonu, e mafai ai e le malamalama ona suia le pogisa ma mafai ai ona tatou ola i le olioli ma le fiafia.
Ou te faafetai tele i le molimau a lo tatou perofeta o Peresitene Gordon B. Hinckley. E fai ma sui o le au paia atoa i le lalolagi, ou te faailoa atu le agaga faafetai ona sa ia filifili e mulimuli i le musumusuga a le Alii ma saunoa mai ia i tatou e faitau le Tusi a Mamona. Ua matuai faamanuiaina ai i tatou i lana fautuaga musuia.
O Tama Liae, o le perofeta muamua o loo tusia i le Tusi a Mamona, na filifili foi e mulimuli i le Alii. Na faatonuina o ia e “ave lona auaiga ma o ese i le vao.”1 E ui lava i tulaga faigata o femalagaaiga ma le muimui o ona atalii o Lamana ma Lemuelu, ae na taitaiina lava e Liae lona aiga i se nuu o le folafolaga. Ae sa le o se nofoaga o le filemu. A o faaaoga e Lamana ma Lemuelu o la’ua saolotoga e le usitaia ai le Alii, “[na] tigaina le loto o [Liae] i le faanoanoa [mo i laua].”2 A o le’i maliu o ia, na faapotopoto atu e Liae lana fanau ma faamanuia ia i latou, ma fautua atu ia i latou.3 I ona atalii fouvale sa ia uunaia ina ia salamo ma faamaoni: “Ina ala mai ia, ou atalii e… . Ina lulu ese ia filifili uamea ua noatia ai outou.”4 Ma sa ia aoao atu foi i lona atalii amiotonu o Iakopo se lesona mulimuli ma aupito taua.
Afai e mafai ona tatou tuua se lesona e aupito sili ona taua mo a tatou fanau ma fanau a fanau, o le a lena lesona? Mai mataupu faavae matagofie uma o le talalelei, na filifili Liae e aoao atu i lona atalii e uiga i le ata o le faaolataga—ma le meaalofa o le saolotoga.
Na ia aoao atu e faapea “ua lava le aoaoina o tagata, ua latou iloa ai le lelei ma le leaga.”5 O lenei aoaoga paia na amataina i le lagi. O iina, i se Fono Tele, o le a faaauau ai e lo tatou Tama Faalelagi le meaalofa o le filifiliga saoloto e faataitai ai i tatou i le olaga faaletino, “ia iloa ai pe [tatou] te faia mea uma e poloaiina ai i [tatou] e le Alii lo [tatou] Atua.”6
Ae na tetee Satani i le Atua ma Lana fuafuaga, ma faapea atu: “o le a ou togiolaina le fanauga uma a tagata, … o le mea lea, ia tuu mai ia te au lou mamalu.”7 “O le mea lea, ona o le fouvale o Satani ia te au, ma lona saili e faaumatia le saolotoga o le tagata, ua tuuina atu e A’u, le Alii le Atua, ia te ia, … o lea na ou faia ai ia tuli ese atu o ia i lalo.”8 “Ma, e toatele i latou na mulimuli atu ia te ia i lena lava aso.”9 Ioe, “le tasi vae tolu o au a le lagi”10 na faaaogaina lo latou saolotoga e teena ai le fuafuaga a le Atua.
O oe ma au na i ai faatasi ma i latou o e na faaaogaina lo tatou saolotoga e talia ai le fuafuaga a lo tatou Tama Faalelagi e o mai i le lalolagi, ina ia maua se ola faaletino, ina ia alualu ai i luma. “Sa tatou alalaga i le olioli … i le mauaina o le avanoa e o mai ai i le lalolagi e maua ni tino [aua na tatou iloaina] ina ia avea i tatou, e ala i le faamaoni, faapei o lo tatou tama, o le Atua.”11
O lenei ua tatou i ai iinei i le lalolagi, lea e anoano ai avanoa e faaaoga ai lo tatou saolotoga; aua o iinei “e i ai le faafeagai o mea uma.”12 O lenei faafeagai e alagatatau mo le faamoemoega o o tatou olaga. E pei ona faamatala mai e Liae, “Ua ao lava ina ia faataunuuina ana mataupu faavavau i le iuga o tagata, … na foai mai ai e le Alii le Atua le faitalia i le tagata. O le mea lea, e le mafai ai ona filifili le tagata sei iloga ua faaosoina o ia e le tasi po o le isi.”13
O Atamu ma Eva o le fanau muamua lea a le Atua na oo i nei faaosoosoga. I le sailia o le faanoanoa o tagata uma, na faaosoosoina ai e Satani, “o le tama o pepelo uma,”14 ia Atamu ma Eva. Talu ai na la filifili e aai i le “fua o le laau ua faasaina, ua tuli ese ai i la’ua ai le faatoaga o Etena, ia galulue i le eleele.”15 Talu ai ona o lena filifiliga, “ua fanafanau i la’ua; … o le aiga lava o le lalolagi uma,”16 ma o lenei tulaga faaletino “ua avea ma ola faataitai”17 mo i la’ua ma a la’ua fanau. Aua “faauta, ua faia mea uma i le poto o Le ua silafia mea uma,” na ta’u atu ai e Liae ia Iakopo. “Na pau Atamu ina ia i ai tagata; ua ola tagata ina ia latou maua le olioli.”18
O nisi taimi e galo ai ia i tatou e finagalo lo tatou Tama Faalelagi ina ia tatou tofu maua uma lenei olioli. E na o le gauai atu i faaosoosoga ma le agasala tatou te le maua ai lena olioli. Ma o le gauai atu o le mea tonu lena e manao Satani ia tatou faia.
Na i ai se taimi na ou maua ai se avanoa ma te o faatasi ai ma Peresitene Spencer W. Kimball i se atunuu mamao lava. Na ma maua se maimoaga taamilo i nofoaga eseese i le eria, na aofia ai le ana e i ai tuugamau—o fanua maliu o tagata o e na faasalaina e tagata ua lofituina i le faaKerisiano. A o ma o a’ea’e atu i luga o na faasitepu vaiti, pogisa o lena nofoaga, na aoaoina au e Peresitene Kimball i se lesona e le mafaagaloina. Na ia tosoina le faatautau o lo’u peleue ma faapea mai, “Ou te popole lava i taimi uma i mea e faia e le tiapolo e faaaoga ai le suafa o lo tatou Faaola.” Ona ia faapea mai lea, “Robert, e le mafai ona maua e le tiapolo le fiafia vagana ua e agasala ma ou agasala.”
A o ou mafaufau i lenei manatu ma suesue i tusitusiga paia, na amata ona ou malamalama i le uiga o le saunoaga a Peresitene Kimball. Na ou manatuaina le fetalaiga a le Alii ia i latou uma o e nonofo i le lalolagi, o loo tusia i le Tusi a Mamona: “Oi talofa, talofa, talofa i lenei nuu; oi talofa i tagata uma o i le lalolagi uma, sei iloga latou te salamo; aua ua ataata le tiapolo, ma ua olioli ana agelu ona o le fasi o atalii ma afafine lalelei o lou nuu.”19 O a tatou agasala e ataata ai le tiapolo; o o tatou faanoanoaga e maua ai e ia le olioli taufaasese.
E ui lava ina ataata le tiapolo, ae e tapulaa lava lona mana. Atonu e manatua e nisi se faaupuga ua leva: “O le tiapolo na ou faia ai.” O le asō, ou te fia ta’u atu ai, i ni upu moni a’ia’i e faapea, e le mafai e le tiapolo ona faamalosi i tatou e fai se mea. E taoto o ia i o tatou faitotoa, e pei ona fai mai ai tusitusiga paia, ma e mulimuli mai o ia ia i tatou i aso taitasi.20 Soo se taimi lava tatou te o atu ai i fafo, soo se filifiliga tatou te faia, tatou te filifili pe agai atu i lana itu, po o le itu foi o lo tatou Faaola. Ae e tatau lava ona aluese le tiapolo pe a tatou fai atu i ai e aluese. E le mafai ona ia faamalosia i tatou sei iloga tatou te faatagaina ai o ia, ma ua ia iloaina lena mea! Na pau le taimi e mafai ona ia faatosinaina ai o tatou mafaufau ma tino—o o tatou lava agaga—pe a tatou faatagaina o ia. I se isi faaupuga, e le manaomia ona tatou gauai atu i ana faatosinaga!
Ua tuuina mai ia i tatou le saolotoga, ua tuuina mai ia i tatou faamanuiaga o le perisitua, ma ua tuuina mai ia i tatou le Malamalama o Keriso ma le Agaga Paia ona o se mafuaaga. O lena mafuaaga o lo tatou tuputupu ae lea ma le fiafia i lenei olaga ma le ola e faavavau i le lalolagi a sau. Ou te fesili atu i le aso, pe ua tatou mauaina ea le Agaga? Pe o tatou mulimuli i ai i le ala sa’o ma le vaapiapi lea e tau atu i le Atua? Pe o tatou pipii ea i le ai uamea? Pe o tatou o atu ea i se isi itu? Ou te molimau atu o le auala e filifili ai o tatou lagona, ma mafaufau, ma faatino ai i aso uma lava, o le auala lea tatou te o’o ai i luga o le ala, ma tumau ai, seia oo ina tatou oo atu i lo tatou taunuuga e faavavau.
Ia, e leai se tasi o i tatou e i ai i taimi uma i le ala vaapiapi. Tatou te sese uma lava. O le pogai lena na aoao ai e Liae ia Iakopo—ma i tatou, o le na malamalama i le matafaioi a le Faaola i le faasa’osa’oina ma le toe mauaina mai o lo tatou saolotoga. “E afio mai foi le Mesia i le atoatoa o aso ina ia togiola e ia le fanauga a tagata ai le pau. Ina ua togiolaina i latou ai le pau, ua saoloto ai i latou e faavavau, o loo iloa le lelei ai le leaga; e filifili mo i latou lava, a e le galueaiina.”21 “O le ki lena—“o le filifili mo i latou lava ae le tau galueaiina.”
I nei aso e gata ai, e pei foi o aso anamua, e tatau ona tatou aloese mai faatosinaga a le tiapolo, e ala i lo tatou filifili e aloese mai le tiapolo. O le a musuia i tatou e le Agaga Paia. Na ta’u atu ia Iosefa ina ia sola ese mai le toalua o Potifara. Na usitaia e Aperaamo le poloaiga ina ia sola ese mai le nuu o Uro. Na faatonuina Liae ina ia sosola ese mai Ierusalema a o le’i faatafunaina. Ma ina ia puipuia le soifua o le Faaola, na uunaia ai Maria ma Iosefa ina ia sosola atu i Aikupito.
O musumusuga ia e oo mai ia i tatou ina ia tatou sosola ese mai le tiapolo, e iloa ai le silafia lelei e lo tatou Tama Faalelagi o o tatou malosiaga ma vaivaiga patino, ma Lona silafiaina o tulaga [tatou] te le mailoaina o o tatou olaga. A oo mai nei uunaiga, o le a tatou le tutu faafuase’i ai, aua o le Agaga o le Atua e le fetalai mai i le leo o le faititili. O le siufofoga o le a filemu e pei o se musumusu, e oo mai o se mafaufauga i o tatou mafaufau po o se lagona i o tatou loto. E ala i le usitaia o ana uunaiga malu, o le a faapea ona puipuia ai i tatou mai taunuuga faataumaoi o le agasala.
Ae afai tatou te le amanaiaina na musumusuga, o le a aluese le malamalama o le Agaga. O le a faatapulaaina foi pe aveesea lo tatou saolotoga, ma o le a tatou le maua le toa ma le gafatia e galue ai. O le a tatou “savavali i le pouliuli [faaleagaga] i le aoauli.”22 Ma o le a matuai faigofie ona fesēta’i i auala e le masani ai ma sē ai! O le a vave foi ona saisaitia i tatou i filifili o le agasala lea na fai atu ai Liae i ona atalii fouvale.23 Mo se faataitaiga, afai tatou te faia filifiliga tatou e oo atu ai i le loloto o le nofo aitalafu, o le a aveesea lo tatou saolotoga e faafetauia o tatou manaoga ma mea e moomia, pe o le faaputuputu foi mo aso leaga e oo mai. Afai tatou te filifili e soli le tulafono, atonu e faafalepuipuiina i tatou lea e matuai faatapulaaina ai lo tatou saolotoga, lea e le mafai ai ona tatou filifili mea tatou te o i ai, o ai e vaai, po o a mea e fai. E tali faapena uma lava le falepuipui o agaga. O lea la, ina ia faatumauina lo tatou saolotoga, e ao ona tatou savavali i aso uma i le malamalama o lo tatou Alii ma le Faaola, ma mulimuli i ala o le usiusitai. Na o le pau lea o le ala e tau atu i lo tatou Tama o i le Lagi.
Afai, ua see lo tatou vae mai le ala, e ala i a tatou filifiliga le tonu, e ao ona tatou manatua le saolotoga na tuuina mai ia i tatou—o le saolotoga e mafai ona tatou filifili ai e toe faaaogaina. Ou te talanoa faapitoa atu ia i latou o e ua lofituina i le pogisa mafiafia o ma’i faatamaia. Afai ua e pau atu i amioga o ma’i faatamaia faatafunaiga, atonu e te lagonaina ua e i ai i se lua pogisa faaleagaga. E pei ona i ai ia lua pogisa moni, atonu e foliga mai e le mafai e se malamalama ona susulu atu i le mea o loo e i ai. E faapefea la ona e sola ese mai? Ou te molimau atu, na o le pau le auala, e ala lea i le saolotoga na e faaaogaina ma le faamaoni i lou olaga i le muai olaga, o le saolotoga lea e le mafai ona aveeseina e le tiapolo e aunoa ma lou gauai atu ia te ia.
E faapefea ona e toe maua mai lena saolotoga? E faapefea ona e toe amata faaaogaina i le ala sao? E te filifili e galue i le faatuatua ma le usiusitai. Sei ou fautuaina atu ni filifiliga faigofie e mafai ona e amata faataunuuina i le taimi nei—i le aso lava lenei.
Filifili e talia—talia moni—o oe o se atalii/afafine o le Atua, ma e alofa o Ia ia te oe, ma e ia te Ia le mana e fesoasoani ai ia te oe.
Filifili e tuu mea uma—mea uma lava—i luga o le fatafaitaulaga i Ona luma. O le talitonu o oe o Lona atalii, ia filifili nei o lou ola e a Ia lea, ma o le a e faaaogaina lou saolotoga e fai ai Lona finagalo. E mafai ona e faia lenei mea i ni taimi se tele o lou olaga; ae ia aua, aua lava nei e fiu.
Filifili e tuu oe i se tulaga e maua ai ni aafiaga ma le Agaga o le Atua—e ala i le tatalo, i le suesueina o tusitusiga paia, i sauniga lotu, ma fegalegaleaiga atoatoa ma lelei faatasi ma isi. A e lagonaina uunaiga a le Agaga, ua amata ona faamamaina ma faamalosia oe. E susulu atu le malamalama, ma o le mea e susulu atu i ai lena malamalama, e le mafai ona tumau ai le pogisa o le tiapolo.
Filifili e usitai ma tausia au feagaiga, e amata atu i au feagaiga o le papatisoga. Ia faafou nei feagaiga i vaiaso taitasi e ala i le ’ai ma inu ma le agavaa i le faamanatuga.
Filifili e saunia ina ia ulu atu ma le agavaa i le malumalu, osia ma faafouina feagaiga paia, ma ia maua uma sauniga faaola ma faamanuiaga o le talalelei.
Ma le mea mulimuli, ma e aupito taua lava, filifili e talitonu i le Togiola a Iesu Keriso. Ia talia le faamagaloga a le Faaola, ona e faamagaloina lea o oe lava. Ona o Lana taulaga mo oe, o loo ia te Ia le mana e “le toe manatua ai [au agasala].”24 E ao foi ona e faia faapena.
A e toe i ai loa i luga o le ala, ma ua e toe “saoloto e filifili,” ia filifili e teena lagona o le matamuli mai agasala ua uma ona e salamoina, ia musu e toe faalotovaivaia i agasala ua tuanai, ma ia olioli i le faamoemoe mo le lumanai. Ia manatua, o Satani e manao ina ia tatou “malaia e pei o ia lava.”25 Ia malosi atu lou naunautai nai lo ia. Ia e fiafia ma ia talitonu i lou olaga ma avanoa ma faamanuiaga o loo faatalitali mai mo oe iinei ma le faavavau.
Ma le vaega mulimuli, ia manatua o lo tatou saolotoga e le mo na o i tatou. E i ai sa tatou matafaioi e faaaoga e fai ma sui mo isi—e siitia ma faamalolosia isi i o latou tofotofoga ma faigata. O nisi o o tatou uso ma tuafafine ua le mafai ona faaaogaina lo latou saolotoga e ala i filifiliga amioletonu. O lo tatou le tuuina atu o i tatou lava i faaosoosoga, e mafai ma e tatau ai ona tatou valaaulia isi ia maua le malamalama o le talalelei a Iesu Keriso. O le faauo atu ma le alofa, e mafai ai ona tatou taitaiina i latou i le ala o le usiusitai ma uunaia i latou e faaaoga o latou saolotoga e toe faia ai filifiliga sao.
E pei ona molimau atu Tama Liae i lona aiga e uiga i faamanuiaga o le saolotoga, ou te fia molimau atu foi ia te outou, o’u uso ma tuafafine pele i le lalolagi atoa ma lo’u aiga. O le saolotoga na tuuina mai i le Fono i le Lagi ina ua tatou filifili e mulimuli i le fuafuaga a lo tatou Tama Faalelagi ma o mai i le olaga nei mo lenei taimi faataitai. O le saolotoga e mafai ai ona tofotofo ma suesueina i tatou, e iloa ai pe o le a tatou tumau seia oo i le iuga pe leai, ma toe foi atu ma le mamalu i lo tatou Tama Faalelagi. O le saolotoga o le punavai o suiga lea e taitaiina atu ai i tatou e faailoa atu o tatou faanaunauga faaleagaga loloto e ala i le faaalia o uiga faaKeriso. O le saolotoga ua mafai ai ona tatou faia filifiliga faamaoni ma usiusitai e faamalosia ai i tatou, ina ia mafai ona tatou siitia ma faamalosia isi. O le saolotoga e faaaogaina ma le amiotonu, e mafai ai e le malamalama ona suia le pogisa ma mafai ai ona tatou ola i le olioli ma le fiafia i le taimi nei, vaai atu ma le faatuatua i le lumanai, e oo atu lava i le faavavau, ae le o le tumau i mea ua tuanai. O lo tatou faaaogaina o le saolotoga e iloa ai pe o ai i tatou ma le ituaiga o tagata o le a avea ai i tatou.
Ia i latou uma o e mananao e olioli i le faamanuiaga faalelagi o le saolotoga, ou te molimau atu o le saolotoga e mafai ona faamalosia e ala i lo tatou faatuatua ma le usiusitai. O le saolotoga e taitai atu ai i tatou e fai [se mea]: e saili ina ia mafai ona tatou maua, e ole atu ina ia mafai ona tatou maua le taitaiga mai le Agaga, e tuitui atu i lena faitotoa lea e oo atu ai i le malamalama faaleagaga ma le faaolaina i le iuga. Ou te molimau faapitoa atu o lo tatou Faaola o Iesu Keriso, o le punavai o lena malamalama, o le Malamalama ma le Ola o le Lalolagi. A o tatou faaaogaina lo tatou saolotoga e mulimuli atu ia te Ia, o le a faapea ona susulu ma susulu tele atu Lona malamalama, seia oo i lena aso atoatoa26 lea e taliaina ai i tatou i le afioaga o lo tatou Tama i le Lagi i le faavavau atoa. Tau ina ia tatou faaaogaina lo tatou saolotoga e oo atu i lena iuga paia ma le mamalu, ou te tatalo atu ai i le suafa o Iesu Keriso, amene.