Atiina Ae o se Fale e Fefaasoaai ai le Talalelei
O le faatuina o se fale e fefaasoaai ai le talalelei o le auala sili lea ona faigofie ma lelei e mafai ona tatou faasoa atu ai le talalelei.
O’u uso e ma tuafafine pele, e le’i leva tele atu ni vaiaso sa suia uma ai o’u tulivae e ala i se taotoga. Afai la ou te fai atu ou te matuai faafetai ona ua mafai ona ou tulai atu i o outou luma i lenei aso, e le o se faamatalaga tuulafoai. I le gasologa o lea taimi na toe saili malosi ai na toe faamanatu mai ai ia te au le faamanuiaina tele o i tatou i le iloaina lea o le Togiola a le Alii o Iesu Keriso. Ua lofituina lava au pe a ou mafaufau atu i Ona tiga ma puapuaga na Ia oo i ai i Ketesemane ma luga o le satauro mo i tatou. O le auala na Ia onosaia ai, ou te le malamalama i ai. Ae ou te faafetai ia te Ia, ma e ou te alofa ia te Ia e sili atu nai lo upu e mafai ona faamatalaina ai.
Ou te faafetai foi ia Peresitene Hinckley ona o le avanoa sa ma faatasi atu ai i le nofoaga na soifua ai le Perofeta o Iosefa. Ona o Iosefa, ua anoanoa’i ai mea ua tuuina mai ia i tatou. Ana le seanoa le Toefuataiga semanu tatou te le iloa le natura moni o le Atua, lo tatou Tama Faalelagi, po o lo tatou lava natura paia, o ni Ana fanau. Semanu tatou te le malamalama i le natura e faavavau o lo tatou i ai po o le iloa lea e mafai ona faavavau le aiga.
Semanu tatou te le malamalama o loo faaauau pea ona fetalai mai le Atua i Ana perofeta i o tatou aso, na amataina i le Uluai Faaaliga ofoofogia lea na faaali atu ai le Tama ma le Alo i le Perofeta o Iosefa Samita. Semanu tatou te le maua le faamafanafanaga mautinoa faapea o loo taitaia i tatou i aso nei e se perofeta, o Peresitene Gordon B. Hinckley.
Ana leai le Toefuataiga semanu tatou te talitonu lava o le afioga atoa a le Atua o loo maua i le Tusi Paia. E pei lava o le taua ma le matagofie o lena tusitusiga paia, na semanu tatou te le iloa o le Tusi a Mamona ma isi tusitusiga paia o aso e gata ai ia o loo aoaoina ai upumoni faavavau e fesoasoani ia tatou latalata atu ai i lo tatou Tama Faalelagi ma le Faaola.
Ana leai le Toefuataiga semanu tatou te le maua faamanuiaga o sauniga o le perisitua lea e aoga i le olaga nei ma le faavavau. Semanu tatou te le iloa tuutuuga o le salamo pe malamalama foi i le moni o le toetu. Semanu tatou te le maua le mafutaga faifaipea ma le Agaga Paia.
A oo ina tatou malamalama moni lava o le talalelei a Iesu Keriso o se faamanuiaga sili lea i o tatou olaga, a oo ina tatou taliaina ma talisapaia nei upumoni faavavau ma faatagaina ina ia goto ifo i o tatou loto ma agaga, ona tatou iloaina lea o se “suiga tele” i o tatou loto (tagai Alema 5:14). E faatumulia i tatou i le alofa ma le loto faafetai. E pei ona tusia e le perofeta o Alema, tatou te lagona le “fia pepese i le pese o le alofa faaola” (Alema 5:26) ia i latou uma o e o le a faalogo i ai.
“E! ana o a’u o se agelu,” na fai mai ai Alema, “ma ua mafai ona maua le manao o lo’u loto, ina ia ou alu atu ma tautala atu ma le pu a le Atua, ma le leo e luluina ai le laueleele, ma tala’i atu le salamo i nuu uma!
“Ioe, po ua ou tala’i atu i tagata uma … le ala o le togiola, ina ia latou salamo ma o mai i lo latou Atua, ina ia le toe ai se faanoanoa i luga o le fogaeleele uma” (Alema 29:1–2).
E tatau foi ona faapea ia i tatou, o’u uso e ma tuafafine. O lo tatou alofa mo le Alii ma lo tatou talisapaiaina o le Toefuataiga o le talalelei o le uunaiga atoa lava lea tatou te moomia e faasoa atu ai le mea ua aumaia ai ia i tatou le olioli ma le fiafia tele. O le mea masani sili lea i le lalolagi tatou te faia, ae peitai e toatele i tatou o loo mumusu e faasoa atu a tatou molimau i isi.
I le lalolagi atoa o loo tali atu ai a tatou faifeautalai i lenei molimau faatupu olioli i le faasoaina atu o le talalelei. O le toatele o i latou o loo ulufale atu i le MTC ma a latou kopi o le taiala a faifeautalai, Talai La’u Talalelei ua maea lelei ona makaina. Ou te fiafia e lipoti atu faapea, o le faaaogaina o le Talai La’u Talalelei, ua faateleina ai lo latou mafai ona aoao atu i a latou lava upu e ala i le mana o le Agaga ma ua mafai ai ona fetuunai a latou lesona i manaoga o i latou o e latou te aoaoina. O se taunuuga, ua tele ai so latou aafiaga i olaga o le toatele.
Ae o le mea moni lava ia, o le mea o loo latou moomia i le taimi nei o ni tagata se toatele e aoaoina. Mai aafiaga na oo i ai o loo faaalia ai o tulaga sili e aoao atu ai e faatupuina lea pe a auai o tatou tagata lotu i le faagasologa o le sailiga ma le aoaoina. E le o se mea fou lenei—sa outou faalogo i ai muamua. O nisi o outou atonu o loo lagona le ta’usalaina ona e le o tele se fesoasoaniga tou te tuuina atu i faifeautalai.
O le aso ou te valaaulia ai outou ina ia toamalie ma tuuese o outou popolega ae ia taulai atu i lou alofa mo le Alii, o lau molimau i Lona moni e faavavau, ma lou faafetai mo mea uma na Ia faia mo oe. Afai ua uunaia moni lava oe e le alofa, molimau, ma le faafetai, o le a e faia lava e oe mea uma e te mafaia e lagolago ai i le Alii ina ia “faataunuu le faaofuina i le tino ola pea ma le ola faavavau” (Mose 1:39) o fanau a lo tatou Tama. O le mea moni lava, e le mafai ona taofia oe mai le faia.
Na faaali mai e le Faaola lava Ia ia i tatou le ala ina ua Ia valaaulia Ona soo ina ia “o mai ia ina matamata … i le mea na Ia mau ai ma (latou) nonofo ai ma Ia i lena ituaso” (Ioane 1:39). Aisea tou te manatu ai na Ia faia ai lena mea? E le o faamatala maia e faamaumauga faatusipaia Lana mafuaaga, ae ua ou mautinoa e le o faasino i se tulaga sologa lelei ma le faigofie. E pei ona masani ai, sa Ia aoao atu. O le a foi se isi auala sili atu e aoao ai Ona soo, nai lo le valaaulia o i latou e talanoa ma Ia ina ia mafai ai ona latou vaai ma iloatino Lana savali ofoofogia.
E faapea foi, e mafai ona avea o tatou fale ma ni fale e fefaasoaai ai le talalelei pe afai e o atu tagata tatou te iloa ma alolofa i ai i o tatou fale ma iloatino ai le talalelei e le gata i upu a o mea e fai. E mafai ona tatou faasoa atu le talalelei e aunoa ma le faia o ni lesona aloaia. E mafai ona avea o tatou aiga ma a tatou lesona, ma o le agaga e mapuna a’e mai o tatou fale e mafai ona avea lena ma a tatou savali.
O le i ai o se fale e fefaasoaai ai le talalelei o le a le gata e avea o se faamanuiaga mo i latou e o atu i o tatou fale, ae mo i latou foi o e nonofo ai i totonu. O le ola ai i se fale e fefaasoaai ai le talalelei o le a faamalolosia ai a tatou molimau ma o le a faaalualuina ai i luma lo tatou malamalama i le talalelei. O loo aoao mai le Mataupu Faavae ma Feagaiga e faapea e mafai ona faamagaloina a tatou agasala pe a tatou fesoasoani i se tasi ia salamo (tagai MFF 62:3). Tatou te maua le olioli i le fesoasoani atu i isi ina ia o mai ia Keriso ma lagonaina le mana togiola o Lona alofa (tagai MFF 18:14–16). Ua faamanuiaina o tatou aiga a o faateleina ia molimau ma le faatuatua o matua ma le fanau.
I totonu o fale e fefaasoaai ai le talalelei tatou te tatalo ai mo le taitaiga mo i tatou lava, ma e tatou te tatalo mo le soifua manuia faaletino ma le faaleagaga o isi. Tatou te tatalo mo tagata o loo aoaoina e faifeautalai, mo a tatou uo, ma mo i latou e le auai i lo tatou faatuatuaga. I fale e fefaasoaai ai le talalelei i le taimi o Alema e “potopoto soo faatasi [tagata] i le anapogi ma le tatalo faatauanau ia faaolaina agaga o e ua le iloa le Atua” (Alema 6:6).
O le faatuina o se fale e fefaasoaai ai le talalelei o le auala sili lea ona faigofie ma lelei e mafai ona tatou faasoa atu ai le talalelei. Ma e tatou te le o talanoa na o fale masani lea e i ai aiga e na o matua e toalua o loo nonofo ai ma le la fanau. E mafai e tamaiti aooga i le kolisi ona faatupuina se fale e fefaasoaai ai le talalelei pe a latou teuteuina ia puipui o o latou potu i ata e atagia atu ai faamoemoega faaleagaga nai lo mea o le lalolagi. E faataitai atu e ulugalii matutua ma tagata lotu nofotoatasi se fale e fefaasoaai ai le talalelei pe a latou faafeiloai atu i ni tuaoi fou ma valaaulia i latou e auai atu i le Lotu ma feiloai ma i latou i o latou fale.
O se fale e fefaasoaai ai le talalelei o se fale lea e fiafia tamaiti o le vaiaai e taaalo ai, fai ma mea masani le valaaulia o i latou ma o latou aiga ina ia auai atu i le lotu, o se afiafi faaleaiga, po o nisi gaoioiga. O talavou e asiasi atu i se fale e fefaasoaai ai le talalelei e lagonaina le toamalie e fesili atu ai ni fesili po o le auai faatasi ma le aiga i le tatalo.
O fale e fefaasoaai ai le talalelei o ni fale masani. E le faapea o le a mama lava i taimi uma pe amio solia atoatoa tamaiti. Ae o se nofoaga e manino lava le fealofani o tagata o le aiga, ma e lagona ai e i latou e asiasi atu i ai le Agaga o le Alii.
A o tatou talanoa e uiga i fale e fefaasoaai ai le talalelei, atonu o le a fesoasoani tele foi le iloaina lea o nisi mea e le avea ai se fale ma se fale e fefaasoaai ai le talalelei.
O se fale e fefaasoaai ai le talalelei e le o se polokalama. O se gasologa masani o le olaga. O le faatupuina o se fale e fefaasoaai ai le talalelei o lona uiga o le valaaulia o a tatou uo ma tuaoi i gaoioiga faifai pea a le aiga ma le Ekalesia. A o tatou valaaulia a tatou uo e auai ma i tatou i nei gaoioiga, o le a latou lagonaina ai foi le Agaga.
O le atiina ae o se fale e fefaasoaai ai le talalelei e le faapea o le a tatou tuuina atu se taimi tele e feiloai ma faamasani ai i ni uo o e faasoa atu i ai le talalelei. O nei uo e o mai lava i latou i o tatou olaga, ma afai tatou te faailoa atu lo tatou auai i le Ekalesia mai lava i le amataga, e mafai ona faigofie ona tatou aumaia talanoaga o le talalelei i ni fegalegaleaiga ae itiiti se tau le malamalama e i ai. O uo ma e masani o le a taliaina o se vaega lenei o oe, ma o le a tuusaoloto i latou e tuu atu ni fesili.
O se fale e fefaasoaai ai le talalelei, e le fuaina i le auai po o le le auai o tagata i le Ekalesia o se taunuuga o la tatou fesootaiga ma i latou. O lo tatou avanoa ma le tiutetauave o le tausia, fefaasoaai, ia molimau atu ma valaaulia, ona faataga lea o tagata e filifili mo i latou lava. E faamanuiaina i tatou pe a tatou valaaulia i latou ina ia mafaufau i le Toefuataiga, e tusa po o le a le tulaga e tulai mai. Ae o le mea sili, ua tatou maua se fegalegaleaiga tauia ma se tasi mai se isi faatuatuaga, ma e mafai ona tatou faaauau pea ona ’ae’ae i la latou faauooga.
I se fale e fefaasoaai ai le talalelei tatou te le tatalo ai mo na o le soifua maloloina, saogalemu, ma le manuia o o tatou faifeautalai i le lalolagi atoa. Tatou te tatalo foi mo o tatou lava aafiaga faafaifeautalai ma avanoa ma ia saunia e galulue e tusa ai ma na uunaiga pe a oo mai ia i tatou. Ma ou te folafola atu ia te outou, o le a latou oo mai lava.
Ua silia ma le 20 tausaga talu ai, sa ou fautua atu ai faapea o le ki i le faamanuiaina o le galuega talai ma tagata o le au paia, o le faatinoina lea o le faatuatua. O le tasi auala e faaali atu ai lou faatuatua i le Alii ma Ana folafolaga o le faatulagaina lea ma le agaga tatalo o se aso e sauniuni ai se tasi e feiloai ma faifeautalai. Na ou mauaina le tele o tusi mai tagata lotu o e na faatinoina lo latou faatuatua i lenei auala faigofie. E ui lava e lei i ai se tasi i mafaufau o aiga o e e mafai ona latou faasoa atu i ai le talalelei, ae sa latou faatuina lava se aso, tatalo, ona talanoa atu lea i ni tagata se toatele. O le Alii o le Leoleo Mamoe Lelei ma Na te silafia Ana mamoe o e ua saunia e faalogo i Lona siufofoga. O le a Ia taitaiina i tatou a o tatou sailia Lana fesoasoani paia i le faasoaina atu o Lana talalelei.
Na fesiligia se tuafafine i Farani po o le a le mea lilo na faamanuiaina ai o ia. Sa fai mai o ia, “Na ona ou faasoa atu lava o lo’u olioli. Sa ou taulimaina ia tagata uma e pei lava ua uma ona avea i latou ma se tagata o le Ekalesia. Afai ou te tu i autafa o se tasi i se laina ma faia se talanoaga, ou te faasoaina atu i ai le tele o lo’u fiafia i a’u sauniga faale Ekalesia i le Aso Sa. Ina ua fesiligia e ana uo faigaluega, ‘O le a lau mea e fai i le faaiuga o lenei vaiaso?’ Ou te le oso lava mai le po o le Aso Toonai i le taeao o le Aso Gafua. Ou te faasoa atu ia i latou faapea sa ou alu i le lotu, o mea na talanoaina ai, ma o’u aafiaga faatasi ma le Au Paia. Ou te talanoa i le auala ou te ola ai, mafaufauga ma lagona.”
I se fale e fefaasoaai ai i le talalelei, o a tatou taumafaiga faafaifeautalai a le tagata lava ia o se autu lea o fonotaga ma talanoaga faaleaiga. Na fono faatasi se tasi aiga faamaoni i le moomia e tagata taitoatasi o le aiga ona avea ma se faataitaiga. Mulimuli ane, o le faiaoga a le atalii i le aoga maualuga, e le o se tagata o le Ekalesia, sa ia auina atu se foai i le Ekalesia. Aisea? Aua sa faagaeetiaina o ia e lenei alii talavou i lona lototele e tautala atu ma ta’u atu i ana uo ina ia faamama a latou gagana. E faitau afe aafiaga e mafai ona tatou faasoaina atu lea na mafua ai ona auai tagata i le Ekalesia ona o le agaga ma uiga na latou matauina i olaga o tagata lotu o e na o mai mai ni fale e fefaasoaai ai le talalelei.
E mafai e tusitusiga a le Ekalesia po o DVD ona faailoa atu ni uo fou i le Ekalesia. O valaaulia ina ia faalogo i se tagata o le aiga o lauga i le sauniga faamanatuga po o le auai i le sauniga o le papatisoga o se tagata o le aiga po o le faia o se matamataga i le falelotu ua talisapaia foi e i latou e le auai i le Ekalesia. Mai faailoilo uma ua ia i tatou, e leai se mea e sili atu ona lelei e mafai e soo se tasi o i tatou ona fai nai lo le valaaulia o a tatou uo ina ia “o mai ma vaai” e ala i le auai faatasi ma i tatou i le sauniga faamanatuga. E toatele naua e le o iloa e taliaina i latou, tatou te tapuai faatasi.
E moni lava, e lagolagoina e i tatou uma lava o tatou taitai faaleuarota ma lagolago atu i le faia o se fuafuaga lelei faaleuarota mo le misiona. Po o le a lava lou valaauga o le Ekalesia o i ai, tatou te fesoasoani atu i taitai o le perisitua ma ausilali e lagolago atu i faifeautalai, faafeiloai ma faaaofia tagata asiasi, ma faaaumea tagata fou. E mafai ona e talosaga atu i faifeautalai e faailoa atu a latou fuafuaga mo aso taitasi ina ia mafai ona e iloa ai le mea sili e mafai ona e fesoasoani atu ai ina ia ausia a latou sini. A tatou galulue faatasi, o le a faapea ona tafe atu ai le agaga o aiga e fefaasoaai ai le talalelei i o tatou falesa, o potu o vasega, ma fale faafiafia.
E tuuina atu la’u molimau afai o le a tatou faia nisi o nei mea faigofie, o le a taitaiina i tatou e le Alii e sailia le fiasefulu o afe o fanau a le Tama Faalelagi o e ua saunia ina ia aoaoina i le talalelei. O lo tatou alolofa mo le Alii, o lo tatou talisapaia mo Lana taulaga togiola, ma Lana misiona ina ia tatou o mai uma ia te Ia e tatau ona tuuina atu ai se uunaiga tatou te moomia ina ia faamanuiaina ai i le faasoaina atu o le talalelei.
Ia faamanuia outou e le Alii, o’u uso e ma tuafafine, i le faatuatua sili atu ma le faalagolago ia te Ia a o outou aapa atu nei loa e faailoa atu le toefuataiga o le talalelei a Iesu Keriso i tagata o le lalolagi, ou te tatalo ai ma le lotomaulalo i le suafa o Iesu Keriso, amene.