O Le Meaalofa o le Saolotoga e Filifili Ai
Afai tatou te usitai i poloaiga a lo tatou Tama Faalelagi, ona faateleina lea o lo tatou faatuatua, tatou te tuputupu a’e i le poto ma le malosi faaleagaga, ma faigofie atili ai mo i tatou ona faia filifiliga sao.
I se taimi ua tuanai atu, a o ou alu i la’u taavale, sa ou tu ina ua mumu mai le moli. O se taavale sa i o’u luma, na gauai atu i ai la’u vaai. Sa faapipii ai se pepa e i ai se faaupuga faapea, “Ou te faia le mea ou te manao ai.”
Sa ou mafaufau pe aisea ua filifili ai se tagata e tuu se faaupuga faapena i lana taavale. O le a le savali sa manao o ia e auina atu? Atonu, sa manao le avetaavale o lea taavale e faalauiloa atu i tagata lautele, ua ia mauaina le saolotoga atoatoa e ala i le faia o mea e manao o ia e fai. A o ou mafaufau i ai, sa ou iloaina ai o le a matua fenumiai lava lo tatou lalolagi pe a na ona faia e tagata uma o mea e manao le tagata lava ia e fai.
Ua manino mai o loo i ai sina fenumiai i o tatou tagata e uiga i lenei mataupu. I faasalalauga, o faasilasilaga, o faafiafiaga ma isi mea, tatou te vaaia ai le manatu ua taatele e faapea, afai e mafai e se tasi ona faia le mea e manao i ai, e olioli o ia i le saolotoga ma o le a fiafia. O loo ta’u mai ai, na pau lava le tulaga e manaomia o a tatou faaiuga o le mea tatou te fiafia i ai, o mea e malie, po o mea foi e fetaui ma o tatou manaoga taitoatasi.
Ua tuuina mai e lo tatou Tama Faalelagi se konasepi [concept] e sili atu. O Lana fuafuaga sili lea o le fiafia lea tatou te maua ai le saolotoga ma le fiafia moni. Ua tatou faitau i le Tusi a Mamona:
“E afio mai foi le Mesia i le atoatoa o aso ina ia togiola e ia le fanauga a tagata ai le pau. Ina ua togiolaina i latou ai le pau, ua saoloto ai i latou e faavavau, o loo iloa le lelei ai le leaga, e filifili mo i latou lava, a e le galueaiina, sei iloga o le faasalaina i le tulafono i le aso tele ma le gataaga, e tusa ma poloaiga ua aumaia e le Atua.
“O lea ua saoloto ai tagata i la le tino, ma ua foaiina mai ia te i latou mea uma e tatau i tagata. Ua saoloto foi i latou e filifili le saolotoga ma le ola faavavau talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo, aua na te saili ina ia malaia tagata uma e pei o ia lava.”1
Ina ua tatou o mai i lenei lalolagi, sa tatou aumaia ma i tatou mai lo tatou aiga faalelalgi lenei meaalofa mai le Atua ma le faamanuiaga mai le Atua, lea ua tatou faaigoaina o lo tatou saolotoga. Ua tatou maua ai le aia tatau ma le mana e faia ai faaiuga e filifili ai. O le saolotoga o se tulafono faavavau. Sa aoao mai Peresitene Polika Iaga ina ua saunoa e uiga i lo tatou saolotoga: “O se poloaiga lenei sa i ai lava talu mai le vavau, ma o le a i ai pea lava e oo atu i le faavavau. E tatau i tagata atamamai uma ona i ai le mana e filifili ai.”2
I lea lava mataupu sa saunoa ai Peresitene Uilifoti Uitilafi e faapea: “O lenei saolotoga e fai ai filifiliga sa tumau pea ona avea ma tofi o le tagata i lalo o le pulega ma le malo o le Atua. Na ia umia lea aia tatau i le lagi o lagi a o lei faia le lalolagi, ma na faatumauina ma puipuia e le Alii mai soo se fouvalega a Lusifelo ma i latou na aufaatasi ma ia… . Ona o lenei la saolotoga e filifili ai, ua avea ai oe ma a’u ma tagata sili ona faatuatuaina i tagata uma, faamoemoeina mo le galuega o loo tatou faia, o olaga tatou te ola ai, [ma] mea tatou te faia.”3
Ina ua aoaoina e le Alii ia Aperaamo e uiga i le natura faavavau o agaga, ma lona filifilia a o lei fanau mai o ia, sa Ia faamalamalama atu ia Aperaamo se tasi o faamoemoega taua o le o mai i lenei lalolagi, i le faapea atu, “Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”4
O lea, o lo tatou saolotoga e avea ai lo tatou olaga i lenei lalolagi, o se vaitaimi e tofotofo ai. Pe a na le ia te i tatou lenei meaalofa matagofie o le saolotoga e filifili ai, semanu e le mafai ona tatou faaali atu i lo tatou Tama i le Lagi pe tatou te faia mea uma ua Ia poloaiina ai i tatou.
Ina ia tatou faaaogaina lo tatou saolotoga, e tatau ona i ai so tatou malamalama i le lelei ma le leaga, e tatau ona i ai lo tatou saolotoga e faia ai filifiliga, ma a uma ona faaaoga lo tatou saolotoga, ua tatau ona i ai ni taunuuga e mulimuli mai ia tatou filifiliga.
Ua ou aoaoina, afai tatou te usitai i poloaiga a lo tatou Tama Faalelagi, ona faateleina lea o lo tatou faatuatua, tatou te tuputupu a’e i le poto ma le malosi faaleagaga, ma faigofie atili ai mo i tatou ona faia filifiliga sao.
O lo tatou faataitaiga sili, o le Alii o Iesu Keriso, ua ia faatuina le faataitaiga atoatoa mo i tatou uma i le auala e faaaoga ai lo tatou saolotoga. I lena Fono i le Lagi, ina ua tuuina mai ia i tatou le fuafuaga a lo tatou Tama—o le a tatou maua le avanoa tatou te o mai ai i lenei lalolagi ma maua ai se tino—sa fetalai atu le Atalii Pele, o Lē Pele ma Lē na Filifilia e le Tama talu mai le amataga, i Lona Tama: “Lou Tama e, ia faia lou finagalo, ma ia ia te oe pea le mamalu e faavavau.”5
E faapena foi, e tatau ona tatou faia a tatou filifiliga e faaaoga ai le mamanu lava lena e tasi: Nai lo le fai atu, “Ou te faia le mea ou te manao ai,” e tatau ona faapea la tatou anavatau “Ou te faia le mea ua finagalo le Tama ou te faia.”
Afai tatou te faia lenei mea, e mafai ona tatou mautinoa o le a i ai i o tatou luga faamanuiaga a le Alii. Atonu e tatau ona tatou faia nisi o nei filifiliga i le taimi e le faigofie ai mo i tatou. Peitai, ua ou aoaoina, e ui lava e i ai nisi taimi e le faigofie ai mo la tatou faatulagaga, ae afai tatou te faia le filifiliga tonu, o le a tausia lava i tatou e le Alii i Lana lava ala, lea tatou te le i iloa i lena taimi.
Ina ua matou siitia i le 1989 mai le Misiona a Siamani Hamburg, i Siamani Sasae, e pulefaamalumalu ai i le misiona i Dresden, sa lei faigofie mo lo matou aiga. Sa faatoa masani la ma fanau i la latou aoga fou i Hamburg, a o lea foi o le a tau faamasani i le faiga o aoga a le malo i Siamani Sasae. Sa le mafai ona matou o ma le isi toatasi o le fanau, ona sa manaomia le uma o lana aoga i Sisifo. Peitai, sa matou aoaoina mai lenei aafiaga, o le mea sa foliga faigata mo i matou i le amataga, sa iu ina liua o se faamanuiaga sili mo i matou uma. E i ai lava le ala a le Alii lava Ia e taulimaina ai o tatou luitau.
O’u uso e ma tuafafine pele e, ou te matua faafetai lava mo lenei meaalofa matagofie o le saolotoga, lea sa tuuina mai e lo tatou Tama i le Lagi ia i tatou. Ou te faafetai ina ua ou iloa o i tatou o Ana fanau. Ua ou iloa mai o’u aafiaga e tele, e alofa o Ia ia te i tatou ma Na te amanaiaina i tatou. Ou te iloa o Iesu o le Keriso, o le Alo o le Atua, o lo tatou Faaola ma le Togiola. Ou te iloa o le Perofeta o Iosefa Samita, na vaai i le Tama ma le Alo ma o ia o le perofeta o le Toefuataiga. Ou te iloa o Peresitene Gordon B. Hinckley o le perofeta a le Atua i onaponei.
Ou te molimau atu ai i nei mea i le suafa o Iesu Keriso, amene.