Tufuga Aao o le Filemu o le Alii
O i tatou o e ua tauaveina i o tatou luga le suafa o Keriso, pe ua tatou see atu ea ma le le iloa i mamanu o le pepelo, tautala i upu mataga, ma upu taufaifai faatiga?
E i ai sa’u uo, o se tasi o sui o talanoaga faavaega faaupufai, e vaaia i vaiaso taitasi i luga o le televise a le atunuu. I le faamalamalamaina o lana matafaioi, sa ia faapea mai ai, “E uunaia i matou ina ia tautala muamua ae mafaufau mulimuli!” E foliga mai ua tatou ola i se vaitaimi ua toatele tagata o loo tautatala e aunoa ma le mafaufau [ia latou faamatalaga], e uunaia ai ni aafiaga faalelagona nai lo ni tali magafagafa. E tusa pe o se faapotopotoga faalemalo pe faalevaifafo foi, i sootaga patino po o faiga faaupufai, i le fale pe o faatasiga faalauaitele, ua sili atu le leoleoa ma le faatauanau o leo nai lo se isi lava taimi, ma ua foliga mai o le tuuina atu ma le mauaina mai o faamatalaga le mafaufau, o se mea na filifilia nai lo le le’i mafaufauina.
Na lapatai mai le Alii i le amataga ma le talafaasolopito atoa, o le a faaosofia e Satani ia loto o tagata i le ita.1 I le Tusi a Mamona, na faatulaga ai e Lamana se mamanu o le matuai muimui ina ia faaoso ai le ita, e uunaia ai le mateletele, ma faaosoina ai le fasioti tagata.2 E tele ina tatou maua i totonu o le Tusi a Mamona ni tagata taufaasese ma amioleaga e faaosoina le ita ma faatupu vevesi. O le vaitaimi o le Taitai au o Moronae, na musuia ai e le tagata liliuese o Amalekia [ma] “faalototele sa Lamana ina ia tau ma le nuu o Sa Nifae.”3 O Amulona ma faitaulaga amioleaga a Noa; o Neoa; Korioa; ma Sorama le tagata liliuese (e toatele pea le lisi o tagata le faamaoni i le Tusi a Mamona) o tagata tetee ia o e na musuia le le faatuatuaina, faaosoina fefinauaiga, ma atili faatupuina le feitagai.
I se fetalaiga ia Enoka, na ta’u atu ai e le Alii, o le taimi o Lona soifua mai ma le taimi a o lumanai Lona Afio Mai Faalua, o le a avea ma “aso o le amioleaga ma le taui ma sui.”4 Ma ua fetalai mai le Alii, o aso e gata ai, o le a liligi ifo ai le ita e le faafefiloia i le lalolagi atoa.5 O le ita e uiga lua, o le ita amiotonu o le Atua, ma tulaga faaletagata o le malosi o le tuinanau ma le tele [o le ita] po o le ita leaga. O le ita muamua e afua ona o popolega a se Tama alofa, o lana fanau e tele taimi ua “aunoa i latou ma le alofa, ma ua latou inoino i o latou lava toto,”6 ae o le ita lona lua ua tula’i mai ona o se nuu “ua aunoa i latou ma le le gaoia ma le alofa, … ua malolosi i latou i lo latou mimilo.”7 Ou te mata’u ona ua aafia le lalolagi i nei ita e lua, ma ou te manatu o le ita faalelagi ua sili atu ona uunaia e i latou o e o loo faaosoina ia loto o tagata i le amioleaga, pepelo, ma le ita faamoemoeina.
O mea muamua lava e aveesea mai ia i tatou ona o le ita o tagata, o le upumoni ma le malamalama. Na lapatai mai Iakopo, afai tatou te “faataalise ona faalogologo, ia faagesegese ona tautala atu, ia faagesegese ona ita: Aua e le tupu le amiotonu mai le Atua i le ita o tagata.”8 E pei ona iloa e Enoka, o le nofoalii o le Atua, e na o le filemu, amiotonu, ma le upumoni.9 E tusa pe o i latou o ni uo sese po o ni faiaoga amioletonu, tagata tusi ata pe faafiafia, tagata faasalalau po o tusi tala i nusipepa i le lotoifale, o e saili le pule po o oa, ia faaeteete ia i latou o e faaosoina i tatou i lena ita lea e ufitia ai foliga agamalu ma lagona alofa.
Na valaaulia e Alema i le vai o Mamona i latou o e o le a ulu atu i se feagaiga faapaaga ma le Atua, ina ia tutu o ni molimau o le Atua, ma ia fesui i a outou avega.10 I le avea ai ma nisi ua ulu moni atu i se feagaiga paia, e tatau ona tatou tumau faamaoni i le ala, le upumoni, ma le ola, o Iesu Keriso lea.
O i tatou o e ua tauaveina i o tatou luga le suafa o Keriso, pe ua tatou see atu ea ma le le iloa i mamanu o le pepelo, tautala i upu mataga, ma upu taufaifai faatiga? Pe ua avea ia feeseeseaiga patino, po o vaega faaupufai, po o pisinisi pe faalelotu i le ta’u amioleagaina o i latou e ese o latou manatu? Pe tatou te faaaluina se taimi ia malamalama ai i tulaga eseese o isi ma saili ni tulaga e laugatasia ai, pe afai e mafai?
Ou te manatua, a o o’u a’oga e sailia se tikeri faaopoopo sa ou tusia ai se iloiloga o se tagata atamai taua i upufai. Sa manino lava lo’u le lagolagoina o ia. Na fai mai lo’u polofesa, e lelei la’u pepa, ae le’i atoatoa le lelei. Fai mai o ia, ao le’i amataina au faitioga, o le mea muamua lava, e ao ona e fofola mai se mafuaaga malosi mo le tulaga o loo e tetee ai, se mafuaaga e mafai ona taliaina e le tagata atamai lava ia. Sa ou toe tusia la’u pepa. Na i ai lava o ma eseesega taua ma le tagata atamai, ae ua sili atu lo’u malamalama e uiga ia te ia, ma na ou iloaina malosiaga ma mea lelei, faapea foi tapulaa, o lona talitonuga. Sa faapea ona ou aoaoina se lesona na ou faaaogaina i vaega uma o lo’u olaga.
Sa faapea atu ia Taitai au Andrew Jackson, a o ia savalia le laina o ana fitafita i le Taua a New Orleans, “Alii, tuutuu teisi i lalo a outou fana!” Ou te manatu, o le toatele o i tatou e ao ona tuutuu teisi i lalo a tatou “fana.” I se isi itu, e ao ona tatou siitia le tulaga o talanoaga patino ma faalauaitele. E tatau ona tatou aloese mai le ulagia o tulaga o isi, [e ao ona tatou aloese mai le] faia o ni “faatagata vaomago,” e pei ona ta’ua ai i nisi taimi, ma le faia o tuuaiga sese e uiga i o latou faamoemoega ma uiga. E pei ona aoao mai le Alii, e ao ona tatou lagolagoina ia alii ma tamaitai faamaoni, atamamai, ma lelei i soo se mea lava latou te i ai, ma ia iloa o loo i ai i “ituaiga lotu, vaega, ma ekalesia uma” i latou o e o loo “taofia mai le upumoni [o le talalelei] ona latou te le iloa le mea e maua i ai.”11 Pe o le a tatou natiaina ea lena malamalama ona ua tatou ulu atu i le aganuu o le pepelo, o le taufaifai, o le tuuina atu ma le saili masei?
O nisi taimi e matuai faigofie ai ona pau atu i le agaga o le taufaifai ma le faa’amu’amu a o feagai ma i latou e ese o latou manatu. Tatou te faatamaia [lagona mautinoa] pe ta’ufaatauvaaina ina ia aumaia isi po o o latou manatu i le le fiafia. O le auupega sili lena a i latou o e na tumu ai le fale tele ma le vateatea lea na vaaia e Tama Liae i lana miti.12 Sa lapatai mai Iuta, le uso o Keriso, e faapea “E i ai i ona aso e gata ai o tagata tauemu, o e savavali e tusa ma o latou lava tuinanau ma le faalemata’u. O tagata lava ia ua latou vavae ese, ua amio faaletino, ua le i ai le Agaga.”13
E tutusa lava le taufaifai ma le agaga o le faatauemu. O tagata faatauemu e masani ona vaavaai laumata ma sailiili masei. Latou te faaalia atoatoa pe faaaliali foi le leai o se talitonu i le faamaoni ma le amiotonu. Na saunoa Isaia e uiga ia i latou o e “na mataala e fai mea leaga” ma “faasalaina le tagata i lana upu, ma latou taumailei i le ua fai finauga i le faitotoa, ma faaliliueseina fua lava le ua amiotonu.”14 E faatatau i lenei mea, na apoapoai mai le Alii i aso e gata ai ina ia “tuu le faipona o le tasi i le tasi” a o le “mea sili, ia faaofuina [tatou] i le noataga o le alofa, e pei o le ofu talaloa, o le noataga lea o le atoatoa ona lelei ma le filemu.”15
Na saunoa mai Peresitene Siaosi Alapati Samita, “E leai se mea i le lalolagi e sili atu ona leaga pe matautia i le aiga o tagata soifua nai lo le ita, faailoga lanu, masalosalo, ma uiga faaalia o nisi tagata i o latou uso a tagata o le agaleaga.”16 I tulaga faaupufai, sa ia lapatai mai ai, “Soo se taimi lava e faaosofia ai oe e ou tulaga faaupufai ina ia e tautala ma le le alofa i ou uso, ia e silafia le mea lenei, ua e i ai i eleele matautia.”17 Sa ia fautua mai e uiga i le misiona maoae o le malo o aso e gata ai e faapea: “E le o se ekalesia faatautee o loo tatou auai. O se ekalesia lenei e tuuina atu le filemu i le lalolagi. E le o so tatou tiute le o atu i le lalolagi ma sailiili masei i isi, pe faitioina foi tagata ona o lo latou le malamalama. Ae o so tatou faamanuiaga, i le agalelei ma le alofa, lo tatou o atu i tagata ma faasoa atu ia i latou le upumoni ua faaalia mai e le Alii i nei aso e gata ai.”18
O i tatou o ni tagata ua faatulagaina e le Alii mo se misiona faapitoa. E pei ona ia fetalai atu ia Enoka i aso anamua, o aso o loo tatou ola ai o se aso pogisa, ae o le a avea foi o se taimi o le a auina mai le lagi le amiotonu, ma o le a auina atu le upumoni mai le lalolagi, e toe tuuina tasi atu, le molimau ia Keriso ma Lana misiona faaola. E faapei o se lolo, o lena savali o le a lofia ai le lalolagi, ma o le a faapotopotoina ai tagata filifilia a le Alii mai itu e fa o le lalolagi.19 Pe o fea lava i le lalolagi tatou te nonofo ai, ua uma ona aoaoina i tatou o ni tagata e avea ma tufuga aao o le filemu o le Alii. I upu a Peteru, ua uma ona faatauina i tatou e le Atua e fai ma Ana [tufuga aao], e folafola atu Lona manumalo “na ia valaau ia te outou nai le pouliuli e oo i lona lava malamalama e matua ofo ai: O e na le fai ma nuu anamua, a o ona po nei ua fai ai ma nuu o le Atua.”20 E le tatau ona tatou faatagaina i tatou lava ia taumaileia i se lalolagi ua pei e tuuina atu ma taliaina osofaiga. Ae, e pei ona faaalia e le Alii ia Paulo ma Mamona, e le tatau ona tatou losilosi pe faafefeteina i le faamaualuga. Tatou te le faaitaitagofie pe sailia ni a tatou lava mea. Tatou te le fiafia i le amioleaga, ae fiafia i le faamaoni. E moni o le alofa mama lenei o Keriso tatou te faatinoina.21
I se lalolagi ua faatumulia i le ita, ua fautua mai ai le perofeta o o tatou aso, o Peresitene Gordon B. Hinckley: “O lenei, e matua tele naua mea e mafai ona tatou faia i nei taimi matautia. E mafai ona faaalia o tatou manatu e uiga i itu eseese o le tulaga e pei ona tatou vaai i ai, ae ia aua lava nei o tatou faia ni upu pe auai foi i le faatinoga o galuega faatiapolo e faatatau i o tatou uso ma tuafafine i atunuu eseese i le tasi itu po o le isi. E le avea eseesega faaupufai e ta’uamiotonuina ai le inoino. Ou te faamoemoe ia maua e le nuu o le Atua le filemu i lenei taimi o faigata, tusa lava po o ai malo ma pati eseese e tatau ona latou faamaoni i ai.”22
I le avea ai ma molimau moni o Keriso i aso e gata ai, ia aua nei o tatou pauu atu i le pogisa ina ne’i o tatou “faasegosego,” e pei o upu a Peteru, ae ia tatou faamaoni i le molimau ia Keriso ma Lana talalelei toefuataiina, i manatu, i upu, ma galuega.23 O loo soifua le Atua. O Iesu Keriso o le ala, le upumoni, ma le ola. O Iosefa Samita, o le perofeta maoae o le Toefuataiga, o le tufuga aao ua tauala mai ai lo tatou faatulagaina o se nuu, o loo taitaiina foi i aso nei e se perofeta a le Atua, o Peresitene Gordon B. Hinckley. Tau ina ia faafouina i aso uma i o tatou loto le alofa mama o Keriso ma tatou faatoilaloina faatasi ai ma lo tatou Matai le pogisa o le lalolagi.
I le suafa o Iesu Keriso, amene.