Ia Tuputupu A’e i La Le Atua
O le auauna faamaoni atu i isi, e oo lava i tulaga faigata, o loo manaomia mai ia i latou o loo naunau moni lava “e tuputupu a’e i la le Atua.”
I ni nai masina talu ai, sa matou tietie atu ai i se taavale ma ni uso totoa, matutua faamisiona. Sa naunau i la’ua e sue le fale o se tagata o le uarota, i le totonugalemu o se aai tuloto i sasae o le Iunaite Setete. A o ou nofo i tua ma le atuatuvale, e le aunoa ona ’e’ē mai le faasinoala o le taavale, “E sese , e sese!” E aunoa ma se fefe o le faifeautalai sa faitauina le faafanua. Sa na o le faasino mai o lea auala ma lea auala i le lavelave o magaala o le taulaga seia i’u lava ina matou maua le fale o le tamaitai sa la folafola atu i ai e aoao ina ia iloa faitau ma tusitusi.
O a la’ua taga ma uiga faaalia, sa i ai i nei uso ofoofogia se mea e sili atu i le na o se taunuuga o o la’ua soifua faaletino. Sa la faatinoina le tulaga o le matua faaleagaga moni.
Sa faaigoa e Helamana, le perofeta maoae o le Tusi a Mamona, ona atalii ia Nifae ma Liae, o igoa o la tuaa ma “sa amata ona tuputupu i la’ua i la le Atua.”1 Pe laiti pe matutua, e tatau ia i tatou uma ona faia le mea e tasi.
O le manatu ina ia tuputupu a’e i la le Atua, o se manatu malosi tele. E le pei o le gasologa o le tuputupu a’e i la le tino, tatou te le tagata matutua lava faaleagaga sei vagana ua tatou filifili, e pei ona faaupuina e le Aposetolo o Paulo, ua “tiai mea a tamaiti.”2
O le tatalo i aso taitasi ma le suesue i tusitusiga paia, o le tausi i poloaiga ma feagaiga sa osia i le papatisoga ma totonu o le malumalu, o vaega taua na o le tuputupu a’e i la le Atua. Tatou te aoao e savavali i Ona ala, pe a tatou faia mea tatou te latalata atili ai i le Tama Faalelagi, ma pe a tatou aoao a tatou fanau ma isi ina ia faia le mea lava lea e tasi. Tatou te “tiai mea a tamaiti” pe a tatou filifili e avea e faapei o Keriso, ma auauna atu i isi e faapei ona finagalo ai o Ia tatou te faia.
Ina ua faatulagaina le Ekalesia i lenei tisipenisione, sa faamalamalama mai e le Alii o i latou “o le a talia i le Ekalesia i le papatisoga”, i se isi vaega, o le a latou “mananao e tauave i o latou luga le suafa o Iesu Keriso, ma se naunauta’i e auauna atu ia te ia e oo i le iuga… .”3 O lona uiga o le “tutumau ma le le mafaagaeetia, ia fua mai pea i galuega lelei”4 i aso taitasi o o tatou olaga. I le taimi nei, a o tupu le Ekalesia i atunuu e 170 i le lalolagi, o le auauna faamaoni atu i isi, e oo lava i tulaga faigata, o loo manaomia mai ia i latou o loo naunau moni lava “e tuputupu a’e i la le Atua.” O lenei faalauteleina o le Ekalesia, o lona uiga e toatele i tatou o le a maua avanoa e auauna ai i tagata faatoa liliu mai.
Sa ou auai i le faaaoaoga e manatua pea o lena ituaiga o auaunaga ma le naunautai ia i latou e fou i le talalelei, ina ua matou o faatasi ma na uso faamisiona faamaoni—o le tasi ua oti lana tane ma ua lata i le 80 ona tausaga a o le isi o se tina ua na o ia foi ae ua 60 ma ona tupu ona tausaga—[o ni tamaitai] faavaivaia i le feseseta’i solo i magaala. Sa ou molimauina foi se isi faataitaiga o lena mea, i le uarota lava lena e tasi.
O lenei uarota, e aofia ai tagata o vaitausaga eseese, mai atunuu eseese, e eseese uma foi o latou tulaga tau i le tamaoaiga ma poto masani i le Ekalesia. O le toatele o i latou ua poto masani i le Ekalesia, o ni ulugalii faauu e aooga ma e pisi tele ae e laiti foi a latou fanau.
O le mea sa ou vaaia o se tina talavou sa galue o se faiaoga o faiaoga asiasi mo tagata o le uarota faatoa liliu mai. A o vaai e lona toalua la la’ua pepe, na te faaalia ma le naunautai le tausiga alofa i ni uso Aferika se toalua. O lea tausiga alofa e aofia ai le aoaoina o nei uso e le gata i le auala e ola ai i se atunuu fou ae o le auala foi e fetuuna’i ai mo la la’ua lotu fou.
Sa ia aoaoina nei uso Aferika e ala i ana faataitaiga o le ala e finagalo le Alii tatou te auauna atu ai o le tasi i le isi. Ua faamatalaina lelei i upu a le Aposetolo o Paulo le mea na ou vaai i ai i faatinoga a lenei faiaoga o faiaoga asiasi, na fai i nei uso faatoa liliu mai: “Ua matou agamalu ina ua matou i ai ia te outou … sa faapea lava lo matou maelega i le alofa ia te outou … na matou manao i le fia avatu ia te outou e le na o le talalelei a le Atua, a o matou lava ola foi, aua na alofaina outou e matou.”5 I ana asiasiga taitasi, na avatu ai e lea faiaoga talavou le fiafia, o se lima fesoasoani agamalu, ma le savali a faiaoga asiasi.
E saunia faatasi e le usoga le savali a faiaoga asiasi e fetufaai i aiga o isi uso. O lo latou iloiloina o tulaga manaomia, vave ona tuuina atu le auaunaga pe a tau atu i ai, sa avea ai i latou ma uso faamaoni o le Aualofa ua tautino atu e sii a’e, e faamafanafana ma faamalosiau e le tasi le isi. Ailoga e i ai se taimi ou te toe faalogo ai i le fasifuaitau “ua fusia faatasi o latou loto i le lotogatasi ma le fealofani,“6 o le a ou le mafaufau ai i na tamaitai fiafia e toatolu, ma le alolofa—sa faaalia i la latou auaunaga ma le naunautai i isi—le uiga o le “tuputupu a’e i la le Atua.”
E le gata i le tautua faamaoni, ma le naunautai, ae o se tasi auala tatou te filifili ai e tuputupu a’e i la le Atua o le ala atu lea i lo tatou naunautai “e fetuleni atu i luma” i le faatuatua—tusa lava pe tatou te le o iloa tonu le mea e fai. Manatu i le tala a Nifae ina ua poloaiina e fau se vaa. Sa ia faamatalaina lena tulaga:
“Ua oo foi ina fetalai mai le Atua ia te au, ua faapea mai: Ia e fau se vaa e tusa ma le gaosiga ou te faailoa atu ia te oe …
“Ma ua ou fai atu: Le Atua e, po o fea le mea ou te alu i ai ou te maua ai u’amea e faaliusuavai, ina ia ou gaosi ai mea e fai a’i galuega … ? ”8
E lei fesiligia e Nifae le galuega e tatau ona fai. Ae, o lea tulaga, na ia faaalia ai e pei foi o isi taimi, lona malamalamaaga faaleagaga faatagata matua: “Ma ua faapea ona tatou iloa, e ao ina faataunuuina poloaiga a le Atua. Afai foi e tausi e le fanauga a tagata poloaiga a le Atua, na te fafaga ia te i latou, ma faamalosi ia te i latou, ma sauni ala e mafai ai ona fai le mea na te poloaiina ai i latou …”9 Sa na ona vaavaai Nifae mo se tonu, ae le o mea faavaatu’ia aua sa ia iloa—sa ia iloa—o lenei faagasologa o le tuputupu a’e i la le Atua—e mafai e le Atua ma o le a fesoasoani o ia i le faataunuuina o poloaiga uma sa tuuina atu ia te ia.
O iina foi i lena uarota tutotonu i le aai, sa ou matauina ai se ituaiga faatuatua faapena, i se epikopo agamalu ma le agaalofa, sa ia le faamaimauina lava se taimi e atuatuvale ai ona o tulaga manaomia e le anoanoa’i o tagata faatoa liliu mai. Ae, sa ia fetuleni atu i luma e ala i le faatulagaina o tagata ua tele atu le poto masani o korama a le Perisitua Arona ma le Perisitua Mekisateko, e fesoasoani e sauniuni ia tagata mai Aferika ma Amerika Latina faatoa liliu mai, mo o latou tiutetauave faaleperisitua. Sa aoaoina tuagane fou i le uuina o fata pe a pasi le faamanatuga, o le auala e tootutuli ai ma faapaia ma le migao le areto ma le vai. O le tele o taimi, o uso talavou, ua tele atu le poto masani, latou te faata’ita’ia faatasi ia upu o tatalo o le faamanatuga ina ia latou maua le lagona ua mafai ona latou faia. Ona talanoaina faatasi ai lea e i latou uma le natura paia o lenei sauniga taua faaleperisitua.
Ua tofusia i tatou uma ma aafiaga tatou te faaalia ai lo tatou naunautai e auauna atu i isi, ma lo tatou naunautai e fetaomi atu i luma i le faatuatua. Ina ua telefoni mai lo’u toalua e ta’u mai ia te au ua toe sui lo ma valaauga faamisiona i se isi tofiga faigata i Aferika, sa ou tali atu, “E mafai ona ou faia. Ou te manatu e mafai ona ou faia.” Sa ou faaalia i a’u upu ia la’u tautinoga e agai i luma i le faatuatua—sa ou toe faatuatua foi, o le a fesoasoani mai le Alii ia te au. Sa ou faaalia lo’u naunautai ou te “tuputupu a’e i la le Atua.”
Atonu ua mafai e lena epikopo faatuatua, o na uso faamaoni, ma a’u ona faamaonia le mea moni, i lenei faagasologa faifai pea o le tuputupu a’e i la le Atua, o le a poloaiina i tatou e faia mea uma tatou te mafaia, e i ai nisi tulaga, e sili atu nai lo le auala ua tatou iloa e faia ai. Atonu e faigata ia lu’itau ma o nisi foi taimi e le iloa le itu e agai i ai. Peitai, e ui lava ina o le a tatou feseseta’i i nisi o magaala, o i latou lava e taumafai ina ia avea moni e faapei o Keriso—o lo latou naunautaiga faamaoni e tautuaina isi—ma se naunautaiga e fetaomi atu i luma i le faatuatua—e mafai ai ona malamalama i lenei upumoni maoae faaleagaga sa faasoa mai e Nifae, a o ia galue pea i le fauina o le vaa: “Na ou alu … soo … ma ou tatalo soo i le Atua; o lea sa faaalia mai ai ia te au e le Atua o mea tetele.”10 O le faaalia i ai o ”mea tetele”—oka se meaalofa—oka se faamanuiaga—ia i latou ua filifili e “tuputupu a’e i la le Atua.” Talosia ia agamalu ma alolofa, ma ia mausali foi le matua faaleagaga o o tatou olaga, ou te tatalo ai ma le lotomaulalo i le suafa o Iesu Keriso, amene.