A o Tatou Fetagofi Atu Nei i le Faamanatuga
O le taumafa i le faamanatuga e aumaia ai ia i tatou ni taimi paia i se nofoaga paia.
Sa ou maua le avanoa pe tusa ma se tausaga pe lua talu ai e asiasi atu ai i le Inisititiuti o Mataupu Faalelotu i Logan Utah. O le fale o loo fai ai le inisititiuti e lei leva talu ai nei ona faafouina. Sa tauina mai ia te au e faapea a o aveeseina mai e le aufaigaluega le pulelaa tuai mai le falesa, sa latou mauaina ai nisi o fata ua fai si umi o tapunia. I le aveeseina o le ufiufi, sa latou maua ai se fata faamanatuga. E foliga mai ua leva tausaga talu ai, ona o ipu faamanatuga e tioata. O se tasi o na ipu, e pei ona outou vaai mai i ai, sa aveeseina ma tuuina mai ia te au—atonu ona o au le tagata sa sili ona lava le matua e manatua ai aso sa faaaoga ai ipu mata’eta’e.
O le vaai atu i le ipu tioata na lofia ai o’u mafaufauga i ni manatunatuga mananaia. O ipu mata’eta’e o le faamanatuga sa faaaogaina i le taimi na atoa ai lo’u 12 tausaga, o se vaega sili lea ona taua i lo’u olaga. Na pau tonu lava lo’u aso fanau 12 i le Aso Sa. O le tele o tausaga sa ou vaaia ai le au tiakono o tufa le faamanatuga, ma tulimatai atu i le aso o le a faamanuiaina ai au e maua le Perisitua Arona ma maua ai lena faamanuiaga.
Ina ua oo mai lena aso, sa talosagaina au ina ia ou vave sau i le lotu ma feiloai ai ma Brother Ambrose Call, o le fesoasoani lua i le au epikopo o le matou uarota. Na valaaulia atu au e Brother Call i totonu o se potu o vasega ma talosaga mai ia te au ou te faia se tatalo. Ona ia susueina lea o tusitusiga paia ma faitau mai ia te au le vaega 13 o le Mataupu Faavae ma Feagaiga:
“I luga o oulua o’u uso a auauna e, i le suafa o le Mesia ou te tuuina atu ai le Perisitua o Arona, o loo i ai ki o asiasiga ma galuega a agelu, ma le Talalelei o le salamo, ma le papatisoga i le faatofuina mo le faamagaloina o agasala; ma e le toe aveesea lava mai le lalolagi seia toe osia e atalii o Levi se taulaga i le Alii i le amiotonu.”
Ona talosaga mai lea o Brother Call ia te au e fai sa’u faamatalaga i lenei vaega. Na mautinoa lava e lei atoatoa la’u faamalamalamaga, o lea na faaalu ai e Brother Call se taimi e faamalamalama mai ai ia te au le uiga o le avea ma se tasi e umia le perisitua paia. O le agavaa e umia le perisitua ua faatagaina ai au e faaaoga le mana na tuuina mai e le Atua i le tagata. O se tasi e umia ma le agavaa le perisitua e mafai, faatasi ai ma le pule, ona faatinoina sauniga a le Atua ua faamatalaina mo le faaolataga o le aiga o tagata. O lenei pule e sau sao lava mai le Faaola lava Ia, e ala i se laina faaauauina pea o e umia le perisitua.
Atonu o la’u faatalanoaga ma Brother Call sa faamanuiaina, aua sa ave au i le fonotaga a le korama a tiakono. O iina, na faaee ai lima o sui o le au epikopo i luga o lo’u ulu, ma o le epikopo, o lo’u tama lea, sa faaeeina mai i o’u luga le Perisitua Arona ma faauuina au i le tofi o le tiakono. Sa lagolagoina foi au e isi tiakono ina ia avea ma se tasi o i latou i totonu o se korama a le perisitua.
I le sauniga faamanatuga i lena afiafi, sa maua ai lo’u uluai avanoa e faaaoga ai le perisitua e ala lea i le tufaina o le faamanatuga i tagata o lo matou uarota. Na maua ai foi se uiga fou o le faamanatuga i lena lava aso. A o o’u vaavaai atu i le fata ma savali atu i laina o tagata o le Ekalesia, sa ou matauina ai e le tutusa uma ia uiga faaalia o tagata i le faamanatuga. Sa i ai i latou na foliga mai e na o le fetagofi atu lava i le faamanatuga e pei o se mea ua masani ai, ae o le toatele lava sa taliaina le faamanatuga ma le migao tele.
Ua tele tausaga o o’u auai, e pei o i tatou uma lava, i le tele o sauniga faamanatuga, ma ia te au lava ia ua sili atu, ua le na o se isi lava sauniga. O le taumafa i le faamanatuga e aumaia ai ia i tatou ni taimi paia i se nofoaga paia. Tatou te faia e tusa ai ma le poloaiga a le Alii na tuuina mai ia i tatou i le vaega e 59 o le Mataupu Faavae ma Feagaiga:
“Ina ia e tausi atili ai ia te oe lava ia mama nai le lalolagi, ia e ulu atu i le fale tatalo ma avatu ai au faamanatuga i lo’u aso paia” (f. 9).
Mai lava i le amataga, a o lei faatulagaina le lalolagi, na faataatia ai e le Atua se fuafuaga lea o le a Ia tuuina mai ai faamanuiaga i ana fanau e fuafua i lo latou usitaia o Ana poloaiga. Ae peitai, sa Ia malamalama, o le a i ai taimi e faalavelaveina ai i tatou e mea o le lalolagi ma o le a moomia ai ona faamanatu mai pea e le aunoa a tatou feagaiga ma Ana folafolaga.
O se tasi o uluai poloaiga na tuuina atu ia Atamu faapea e tatau ona ia tapuai atu i le Alii ma tuuina atu uluai fua o ana lafu e avea o se taulaga ia te Ia. O lenei sauniga na tuuina mai e faamanatu ai i tagata o le a afio mai Iesu Keriso i le lalolagi ma o le a ofoina mai o Ia lava e avea ma taulaga.
“Ma sa usiusitai lava Atamu i poloaiga a le Alii.
“Ma ina ua mavae aso e tele, ona alu ifo lea o se agelu a le Alii ia Atamu ma ua faapea ia Atamu: Se a le mea ua e osi atu ai taulaga i le Alii? Ona tali atu lea o Atamu ia te ia: Ou te le iloa, ae ua poloaiina ai au e le Alii.
“Ona fai mai lea o le agelu, ua faapea mai: O lenei mea, o se faatusa o le taulaga a le Alo e Toatasi na Fanaua e le Tama, o Le ua tumu i le alofa tunoa ma le upumoni” (Mose 5:5–7).
Mai lena aso seia oo mai i le taimi o lo tatou Faaola, sa poloaiina ai fanau a le Tama Faalelagi ina ia ofoina atu ia taulaga. Sa le toe faaauauina ona o le taulaga togiola a le Faaola. Ae, o le po a o lei faataunuuina e Ia lena taulaga, sa faatuina ai e le Faaola le faamanatuga o le Talisuaga a le Alii e fesoasoani ai ia i tatou e manatuaina o Ia ma le Togiola na Ia faia mo tagata uma. O lea, i le tulafono anamua o le taulaga ma le faamanatuga, e fesoasoani mai ai le Alii ia i tatou ina ia mautinoa tatou te le faagaloina Ana folafolaga ma le manaomia ona tatou mulimuli ia te Ia ma usiusitai i Lona finagalo.
I le Feagaiga Fou tatou te maua ai le tala i le faatinoina e le Alii o le faamanatuga i Ona soo. O loo maua lea i le Mataio, mataupu 26:
“O loo latou aai, a e tago Iesu i le areto, ua faafetai, ona tofitofi lea, ma avatu i le au soo, ua faapea atu, Ina tago ia, ina aai; o lo’u tino lenei.
“Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, Ina inu ia outou uma i ai;
“Aua o lo’u toto lenei, o le toto o le feagaiga fou ua faamaligiina mo tagata e toatele e faamagalo a’i agasala” (ff. 26–28).
O le Tusi a Mamona, i le 3 Nifae, mataupu 18, o loo tuuina mai ai ia i tatou se tala auiliili i le faatinoina e le Faaola o le faamanatuga i sa Nifae:
“Ua oo foi ina poloai atu Iesu i ona soo, ia latou aumaia ni areto ma sina uaina ia te ia.
“Ina ua latou o atu i le areto ma le uaina, ua ia poloai atu i le motu o tagata ia latou nonofo i lalo i le eleele.
“Ua o mai ona soo ma le areto ma le uaina, ona tago ai lea o ia i le areto, ma ua tofitofi ai ma faamanuiaina; na ia avatu foi i ona soo, ma ia poloai atu latou te aai.
“Ua latou aai, ma ua maoona, ona poloai atu ai lea o ia, ia latou avatu i le motu o tagata.
“Ua aai foi le motu o tagata ma ua maoona, ona fetalai atu lea o ia i ona soo: Faauta, e tofia se tasi o outou, o ia foi ou te tuuina atu i ai le pule, na te tofitofi le areto, ma faamanuia ai, ma avatu i tagata o la’u ekalesia, o i latou uma o e faatuatua ma papatisoina i lo’u igoa.
“Ia outou tausia pea lenei mea, ma faia e pei ona ou faia, e pei ona ou tofitofi le areto, ma faamanuiaina ai, ma avatu ai ia te outou.
“Ia outou faia lenei mea ma le faamanatua o lo’u tino ua ou faaalia atu ia te outou. E fai foi lenei mea ma mau i le Tama ua outou manatua pea a’u. Afai tou te manatua pea a’u, tou te mafuta ma lo’u Agaga.
“Ma ua oo ina fetalai atu o ia i nei upu, ona poloai atu ai lea o ia i ona soo, latou te ave le ipu ma feinu ai, ma ia latou avatu foi i le motu o tagata, ina ia latou feinu ai.
“Ma ua oo ina faapena ona latou faia, ma ua feinu ai ma ua malilie, ma ua latou avatu ai i le motu o tagata; ua latou feinu ai foi, ma ua malilie ai i latou.
“Ua uma foi ona faia lea mea e ona soo, ona fetalai atu ai lea o Iesu ia te i latou: Amuia outou ona o lenei mea ua outou faia, aua o le faataunuuina lea o a’u poloaiga, e molimau atu lenei mea i le Tama, tou te loto ina fai le mea ua ou poloaiina ai outou” (ff. 1–10).
O ana faatonuga e matuai manino lava faapea e tatau ona tatou naunau e faia mea ua Ia poloaiina ai i tatou e fai. O le a matuai mautinoa lava ua faamoemoe i o tatou taimi o le a toe poloaiina foi i tatou ina ia taumamafa i le faamanatuga. E pei ona tau mai e le Mataupu Faavae ma Feagaiga ia i tatou:
“E tatau ona potopoto soo le ekalesia e fetagofi i le areto ma le uaina i le faamanatuga o le Alii o Iesu” (MFF 20:75).
O le faamoemoega o le fetagofi i le faamanatuga o le faafouina lea o feagaiga na tatou osia ma le Alii.
Na aoaoina lelei i tatou e Elder Delbert L. Stapley i lenei mea ina ua ia saunoa e uiga i feagaiga:
“O le talalelei a lo tatou Alii o Iesu Keriso o se feagaiga lea i le va o le Atua ma lona nuu. Pe a papatisoina e se auauna faatagaina a le Atua, ua tatou osifeagaiga e faia le finagalo o le Atua ma usiusitai i ana poloaiga. O le fetagofi i le Faamanatuga tatou te faafouina ai feagaiga uma na tatou osia ma le Alii ma tautino atu i tatou lava ina ia tauave i o tatou luga le suafa o lona Alo, ia manatua pea o ia ma tausi i ana poloaiga” (i le Conference Report, Oct. 1965, 14).
O le faamanatuga o se tasi lea o sauniga sili ona paia i le Ekalesia. O le fetagofi i le faamanatuga ma le agavaa e maua ai e i tatou se avanoa mo le tuputupu a’e faaleagaga.
Ou te manatuaina a o o’u laitiiti, sa tataina ai se musika matagofie i le taimi e tufa ai le faamanatuga. E lei leva ae talosaga mai le Usoga ina ia taofi lena faiga aua ua faaautu o tatou mafaufau i le musika nai lo le taulaga togiola a lo tatou Alii ma le Faaola. I le taimi e faia ai le faamanatuga, tatou te tuueseina ai le lalolagi. O se taimi o le faafouga faaleagaga a o tatou iloaina le loloto faaleagaga o le taua o le sauniga ua ofoina mai ia i tatou taitoatasi. Afai tatou te faatalale i le fetagofi atu i le faamanatuga, o le a tatou le mauaina le avanoa mo le faatupulaia o le faaleagaga.
Na saunoa Elder Melvin J. Ballard i se tasi taimi:
“O au o se molimau o loo i ai se agaga e auai i le faiga o le faamanatuga lea e faamafanafanaina ai le tagata atoa e amata mai le ulu e oo i vae; e te lagonaina le faamaloloina o manu’a o le agaga, ma le aveeseina o le avega. O le faamafanafanaga ma le fiafia e oo mai i le agaga e agavaa ma moni ona faanaunauga e taumafa ai i lenei taumafa faaleagaga” (“The Sacramental Covenant,” Improvement Era, Oct. 1919, 1027).
Afai tatou te fetagofi atu ma le agavaa i le faamanatuga, ua tatou manatuaina le taulaga a lo tatou Alii ma le Faaola, lea na Ia tuuina atu ai Lona soifua ma tauaveina i Ona luga ia agasala a le lalolagi ina ia mafai ona tatou maua le faamanuiaga o le tino ola pea. Tatou te tauaveina i o tatou luga le suafa o lo tatou Faaola ma folafola atu e manatua pea o Ia ma tausia Ana poloaiga—o le “ola lea i upu uma e oo atu mai le fofoga o le Atua” (MFF 84:44).
Matua, o loo i ai lo outou tiutetauave o le aoaoina i o outou aiga le taua o le auai atu i sauniga faamanatuga i vaiaso taitasi. E tatau ona avea ma se faiga faifaipea a le aiga. E moomia e aiga uma lena taimi o le faafouina ma le tautino atu e ola i le talalelei e tusa ai ma aoaoga a le Faaola. O aiga, e saunia faalelei, o le a auai atu i le sauniga faamanatuga ma se agaga o le migao, ma le loto faafetai mo le avanoa e fetagofi atu ai i faatusa paia.
Ou te manatua se aafiaga na oo i ai lo matou aiga a o matou tafafao i se tasi o nofoaga mo malologa. Talu ai ona o le taimi o lo matou nonofo ai iina e aofia ai ma le Aso Sa, sa matou faia ai se fuafuaga e auai atu i se sauniga faamanatuga i se falelotu e lata ane. E faapena foi le fiaselau o isi sa nonofo ai i lena nofoaga. Sa faatumulia le falesa e oo atu i le vaega faaopoopo. A o lei amataina le sauniga, sa valaaulia mai e le epikopo soo se tiakono o loo agavaa ma laei lelei, ina ia auai i le tufaina o le faamanatuga. Sa lava se numera o e sa ofutino papae ma fusiua na oo atu i luma e taliaina ia faatonuga i le auala e taulimaina ai se aofia toatele faapea. Sa faatinoina le sauniga i le faaaloalo ma le sologa lelei. A o o’u matauina le aofia, sa ou vaaia ai le toatele na matuai ootia lava i le agaga o le sauniga.
Ina ua toe foi atu i le nofoaga e malolo ai sa matuai iloga lava le ese o gaoioiga o le aso Sapati e faatusatusa atu i aso o le vaiaso. Sa taula pea vaa i le uafu; sa toetoe lava a leai ni tagata e taeele i le vaituloto; ma o laei mo le aso Sapati sa matuai talafeagai lava. Na iloa e na aiga le faataunuuina o folafolaga a le Alii: e ala i le o atu i le fale tatalo i Lona aso paia ma faafouina a latou feagaiga ina ia usiusitai i poloaiga, sa mafai ona latou tausia i latou lava ia matuai mama mai le lalolagi (tagai MFF 59:9).
Ia mafai ona saga faamautuina i totonu o i tatou taitoatasi se faateleina o le faaaloalo mo le Sapati. Ia tatou matuai saga iloaina le faamanuiaga faapitoa o le mafai ona fetagofi atu i le faamanatuga faapea ma lona taua i o tatou olaga. Ia tatou manatua pea o Ia ma tausi Ana poloaiga, ua Ia tuuina mai ia te i tatou e faataunuu ai le faamoemoega o le olaga ma le faamoemoe o le faavavau o le a oo mai. O le galuega lenei a le Alii o loo tatou punoua’i ai. O loo soifua le Atua. O Iesu o le Keriso, o le Faaola o le lalolagi. Ua faatagaina i tatou e avea o se vaega o lenei fuafuaga maoae o le talalelei, lea e avea ai le faamanatuga ma se vaega taua tele. I le suafa o Iesu Keriso, amene.